Mahungu Ya Ku Tsakisa Ya Ku Tsaliwa Hi Matewu 19:1-30
19 Nkama Yesu a nga gama ku vulavula hi timhaka leti, a suke aGalileya a ya lomu tiko la Yudiya li gamelaka kona, ka tlhelo lelin’wani la Yordani.+
2 Se xitshungu xaxikulu xi mu landza, kutani a xi hanyisa kolanu.
3 Se Vafarisi va ta ka yena na va lava ku mu ringa. Va mu vutisa va ku: “Swa pfumeleliwa swaku wanuna a tshika* nsati wa yena hi nchumu xin’wani ni xin’wani?”+
4 A va hlamula a ku: “A mi lerhanga swaku ku sukela ku sunguleni Xikwembu xi yendle wanuna ni wansati,+
5 se xi gama xi ku: ‘Hi mhaka leyo, wanuna a ta siya papayi wa yena ni mamani wa yena kutani a namarhela* nsati wa yena, se havambirhi va ta va nyama yin’we’?+
6 Leswo swi vula swaku a va ha li vambirhi, kambe se i nyama yin’we. Hi mhaka leyo, leswi Xikwembu xi nga swi patsa xikan’we,* swi nga tshuki swi hambanisiwa hi munhu.”+
7 Va mu vutisa va ku: “Se hi mhaka muni Moxe a vule swaku wansati a a nyikiwe papela la ku tima muchadu* a gama a hlongoliwa?”+
8 Yesu a ku: “Moxe a mi pfumelele ku tshika vasati va n’wina+ hi mhaka ya leswi mi nga tlanyala timbilu, kambe a swi nga tshamisanga leswo ku sunguleni.+
9 Lweyi a tshikaka nsati wa yena a gama a chada mun’wani, na ku nga li hi mhaka ya wuntunga la swa masangu,* o mbuyeta.”+
10 Vadjondzisiwa va ku: “Loko wukati li tshamise leswi, swa yampsa munhu a nga chadi.”
11 Yesu a ku: “A hi vanhu hinkwavu lava kotaka ku yendla leswo, kambe swi kotiwa ntsena hi lava nga ni nyiko ya kona.+
12 Hikusa ku ni vatheniwa lava nga psalisiwa swoleswo; ku ni vatheniwa lava nga yendliwa vatheniwa hi vanhu, naswona ku ni vatheniwa lava nga tithena hi voxe hi mhaka ya Mfumu wa matilo. Lweyi a kotaka ku yamukela wutomi la ku fana ni leli, a a li yamukeli.”+
13 Kutani ku tisiwa swivanani ka Yesu leswaku a swi katekisa a tlhela a swi khongelela; kambe vadjondzisiwa va kawuka vapsali va swona.+
14 Se Yesu a ku: “Swi tshikeni swivanani leswo naswona mi nga swi siveli ku ta ka mina, hikusa Mfumu wa matilo i wa lava fanaka na swona.”+
15 Se a swi tlhateka mavoko a gama a suka kolanu.
16 Kutani ku ta munhu mun’wani ka yena a fika a ku: “Mudjondzisi, ni fanele ni yendla yini swaswinene swaku ni kuma wutomi la ku kala li nga heli?”+
17 A mu hlamula a ku: “Hi mhaka muni u ni vutisa hi ta leswi nga swinene? Wamunene i mun’we ntsena.+ Kambe, loko u lava ku kuma wutomi, tama u hlayisa minawu.”+
18 Munhu yelweyo a ku: “Yihi ya kona?” Yesu a ku: “U nga tshuki u dlaya,+ u nga tshuki u mbuyeta,+ u nga tshuki u yiva,+ u nga tshuki u fakaza swa mavunhwa,+
19 hlonipha papayi wa wena ni mamani wa wena,+ naswona u fanele u rhandza vanhu van’wani ku fana ni leswi u tirhandzisaka swona.”+
20 Se djaha leli li ku: “Minawu leyi hinkwayu na yi yingisa; se ni choteliwa hi yini swin’wani?”
21 Yesu a ku: “Loko u lava ku va munhu wa ku hetiseka,* famba u ya xavisa leswi u nga na swona u teka male ya kona u yi nyika swisiwana, kutani u ta va ni tshomba tilweni,+ u gama u ta, u ta ni landzela.”+
22 Nkama djaha leli li nga twa leswo, li famba na li karhatekile hikusa a li ni minchumu ya yinyingi hintamu.+
23 Kutani Yesu a byela vadjondzisiwa va yena a ku: “Ni mi byela ntiyiso: Swi ta karhata leswaku munhu wa ku ganya a nghena ka Mfumu wa matilo.+
24 Naswona na mi byela swaku swi vevuka hintamu leswaku kamela yi hundza ka mbhovo wa nayethi ku tlula kuva munhu wa ku ganya a nghena ka Mfumu wa Xikwembu.”+
25 Nkama vadjondzisiwa va nga twa leswo, va hlamala hintamu va ku: “Kasi i mani lweyi a nga ta ponisiwa?”+
26 Yesu a va txuvukisisa, a ku: “Ka vanhu a swi nge koteki, kambe ka Xikwembu minchumu hinkwayu ya koteka.”+
27 Se Pedru a mu hlamula a ku: “Phela hi tshike minchumu hinkwayu hi ku landzela; kasi hi ta kuma yini?”+
28 Yesu a ku: “Ni mi byela ntiyiso: Nkama swilo hinkwaswu swi nga ta yendliwa swa nyuwani, ni nkama N’wana wa munhu a nga ta tshama ka xitshamu xa yena xa wuhosi lexi phatimaka, na n’wina mi ta tshama ka 12 wa switshamu swa wuhosi, mi yavanyisa 12 wa tinxaka ta Israyele hi mhaka ya leswi mi nga ni landzela.+
29 Naswona lweyi a nga tshika tiyindlo kumbe vamakwavu va xinuna kumbe vamakwavu va xisati, kumbe papayi kumbe mamani kumbe vana kumbe masimu hi mhaka ya vito la mina, a ta nyikiwa ka 100 ni ku tlula, a tlhela a kuma wutomi la ku kala li nga heli.+
30 “Kambe vanyingi lava nga va ku sungula va ta va va wugamu, kasi lava nga va wugamu va ta va va ku sungula.+
Tinhlamunselu ta le hansi
^ Kumbe: “divhorsiyara”.
^ Kumbe: “tshama ni”.
^ Hi Xigriki: “leswi Xikwembu xi nga swi pana xikan’we”.
^ Kumbe: “divhorsiyu”.
^ Hi Xigriki: “porneía”. Vona Ntlhamuselo.
^ Kumbe: “helela”.
