Mahungu Ya Ku Tsakisa Ya Ku Tsaliwa Hi Marka 9:1-50
-
Ku txintxiwa ka Yesu (1-13)
-
Ku hanyisiwa ka mufana lweyi a a ni dimoni (14-29)
-
Swilo hinkwaswu swa koteka ka lweyi a nga ni lipfumelo (23)
-
-
Yesu a tlhela a vulavula hi lifu la yena (30-32)
-
Vadjondzisiwa va holovisana hi leswaku i mani wamukulu ka vona (33-37)
-
Lweyi a kalaka a nga lwisani na hina a nyima na hina (38-41)
-
Leswi hi yendlaka hi djoha (42-48)
-
“Mi fanele mi va munyu” (49, 50)
9 Yesu a tlhela a ku: “Ni mi byela ntiyiso: Van’wani ka lava nga nyima lani a va nga ta fa na va nga rhanganga hi ku vona Mfumu wa Xikwembu na wu fuma.”+
2 Nkama ku nga hundza 6 wa masiku, Yesu a teke Pedru, Yakobe na Yohani, a famba na vona ka ntshava ya ku leha na va li voxe. Se a txintxiwa na va swi vona;+
3 mpahla ya yena yi sungula ku phatima yi tlhela yi basa yi ku baa, naswona a ku na munhu lweyi a nga hlampsaka mpahla yi basa ku fana na yona.
4 Ku tlhela ku humelela Eliya na Moxe na va bula na Yesu.
5 Se Pedru a byela Yesu a ku: “Rabi, swa tsakisa ku va lani. Hi pfumeleli ku hamba minchacha yinharhu, wun’we wu va wa wena, wun’wani wu va wa Moxe se wun’wanyani wu va wa Eliya.”
6 Ntiyiso wa mhaka hi leswaku Pedru a a nga xi tivi ni xa ku xi yendla hikusa a va chava hintamu.
7 Kutani ku humelela rhefu li va funengeta, se ku twala rito+ na li huma hi ka rhefu li ku: “Lweyi i N’wananga, lweyi ni mu rhandzaka.+ Mu yingiseni.”+
8 Nkama va nga txuvuka matlhelweni, a va ha vonanga munhu va yo vona Yesu ntsena.
9 Na va ha xika hi le ka ntshava, Yesu a va kawuka swaku va nga byeli munhu leswi va nga swi vona+ anze N’wana wa munhu a pfuxiwa ka lava nga fa.+
10 Va swi tekele nhlokweni leswi a nga swi vula,* kambe a va vutisana hi xivona swaku a a vula yini loko a ku a ta pfuxiwa ku feni.
11 Kutani va sungula ku mu vutisa va ku: “Hi mhaka muni vatsali va vula swaku ku fanele ku ta Eliya+ ku sungula?”+
12 A va hlamula a ku: “Eliya a ta rhanga a fika a lunghisa swilo hinkwaswu;+ kambe hi mhaka muni ku tsaliwile swaku N’wana wa munhu a ta xanisiwa+ hintamu a tlhela a poyiliwa?+
13 Kambe na mi byela: Vhela Eliya+ se a tile naswona va yendle ku rhandza hi yena, hi ku landza leswi swi nga tsaliwa hi ta yena.”+
14 Nkama va nga fika kusuhi ni vadjondzisiwa lavan’wani, va kume xitshungu xaxikulu na xi va rhendzelile naswona vatsali na va va holovisa.+
15 Kambe loko xi mu vona, xi hlamala, se xi tsutsuma xi mu tlhangaveta leswaku xi ya mu xoweta.
16 Yesu a vutisa xitshungu a ku: “I yini lexi mi holovisanaka hi xona ni vadjondzisiwa?”
17 Munhu mun’wani xikarhi ka xitshungu a mu hlamula a ku: “Mudjondzisi, ni tise n’wana wa mina ka wena hikusa a ni dimoni leli mu yendlaka mbheveve.+
18 Loko li mu nghena, li mu tlatlalatela hansi, se a humetela marhi* a tlhela a phorhela matinyu, a hela ni ntamu. Ni kombele vadjondzisiwa va wena swaku va li hlongola kambe a va swi kotanga.”
19 Se a hlamula a ku: “N’wina vanhu* va ku pfumala lipfumelo,+ kasi ni ta tama ni va na n’wina anze siku muni ke? Ni ta mi lehisela mbilu anze siku muni? Mu tiseni halenu.”+
20 Kutani va mu tisela n’wana yelweyo. Kambe nkama dimoni li nga vona Yesu li sungule ku hlasela n’wana yelweyo, kutani a wa hansi a wumbulukela na a humetela marhi.*
21 Yesu a vutisa papayi wa n’wana a ku: “Swi mu sungule siku muni?” A ku: “Ku sukela na wa ha li mutsongo,
22 minkama yin’wani a li mu hoxa ka ndzilu ni le ka mati swaku li mu dlaya. Kambe loko u swi kota ku hi pfuna, hi tweli wusiwana u hi pfuna.”
23 Yesu a ku: “Hi mhaka muni u ku: ‘Loko u swi kota’? Phela swilo hinkwaswu swa koteka ka lweyi a nga ni lipfumelo.”+
24 Kutani papayi wa n’wana a mu hlamula a ku: “Ni na lona lipfumelo! Ni pfuni ni va ni lipfumelo la ku tiya!”+
25 Nkama Yesu a nga vona swaku xitshungu a xi va tshinelela hi ku hantlisa, a laya dimoni a ku: “Wena dimoni ndziwena, u yendlaka swaku n’wana lweyi a nga swi koti ku khuluma ni ku twa, ni ku rhuma swaku u huma ka yena naswona u nga ha tlheli u mu nghenela.”+
26 Se dimoni li yendla swaku n’wana lweyi a huwelela a tlhela a rhurhumela hintamu, li gama li huma; n’wana a voneka ingaku a yo fa, vanhu va vanyingi va za va ku: “A file!”
27 Kambe Yesu a mu khoma hi voko a mu pfuxa, kutani a sekeleka.
28 Nkama va nga nghena ndlwini na va li voxe, vadjondzisiwa va yena va mu vutise va ku: “Hi mhaka muni hi nga swi kotanga ku li hlongola?”+
29 A va hlamula a ku: “Dimoni la ku tshamisa leswi li hlongoliwa ntsena hi xikhongelo.”
30 Nkama va nga suka kolanu, va khome ndlela va ya Galileya, kambe Yesu a a nga lavi swaku swi tiviwa hi munhu
31 hikusa a a djondzisa vadjondzisiwa va yena ni ku va byela a ku: “N’wana wa munhu a ta xavisiwa ka valala naswona va ta mu dlaya;+ kambe hambi o dlayiwa, a ta pfuxiwa hi siku la wunharhu.”+
32 Kambe a va nga swi twisisi leswi a a swi vula naswona a va chava ku mu vutisa.
33 Kutani va fika Kapernawume. Nkama va nga nghena ndlwini a va vutise a ku: “A mi holovisana hi yini andleleni?”+
34 A va mu hlamulanga nchumu hikusa a va holovisana hi mhaka ya leswaku i mani wamukulu ka vona.
35 Se a tshama hansi, a vitana lava 12 a ku: “Loko munhu a lava ku va wa ku sungula a fanele a tiveka hansi ka hinkwavu a tlhela a va tirhela.”+
36 Kutani a teka xin’wanani a xi nyimisa xikarhi ka vona, a xi barasara a ku:
37 “Lweyi a yamukelaka xin’wanani xa ku fana ni lexi+ hi vito la mina, na mina wa ni yamukela; naswona lweyi a ni yamukelaka, a nga yamukeli mina ntsena, kambe a yamukela ni Lweyi a nga ni rhuma.”+
38 Yohani a ku: “Mudjondzisi, hi vone munhu mun’wani na a hlongola madimoni hi vito la wena naswona hi zame ku mu tsimbisa hikusa a a nga fambi na hina.”+
39 Kambe Yesu a ku: “Mi nga mu tsimbisi, hikusa a ku na munhu lweyi a nga yendlaka masingita hi vito la mina kambe a tlhela a djika a vulavula ku biha hi mina.
40 Hikusa lweyi a kalaka a nga lwisani na hina a nyima na hina.+
41 Naswona lweyi a mi nyikaka mati leswaku mi nwa hi mhaka ya leswi mi nga vadjondzisiwa va Kreste,+ ni mi byela ntiyiso, a ta katekisiwa.+
42 Kambe lweyi a wisaka mun’we wa lavatsongo, lava nga ni lipfumelo, swi nga yampsa loko o boheleliwa ribye lalikulu* ka nhamu kutani a hoxiwa lwandle.+
43 “Loko voko la wena li ku djohisa,* li tsemi. Swa yampsa u kuma wutomi na u li xilima ku tlula ku nghena Gehena* ka ndzilu lowu nga ta kala wu nga timiwi+ na u ni mavoko mambirhi.
44 * ——
45 Naswona loko nenge wa wena wu ku djohisa,* wu tsemi. Swa yampsa u kuma wutomi na u khwita ku tlula ku hoxiwa Gehena* na u ni minenge yimbirhi.+
46 * ——
47 Naswona loko tihlo la wena li ku djohisa,* li txukumeti kule.+ Swa yampsa u nghena ka Mfumu wa Xikwembu na u ni tihlo lin’we ku tlula ku hoxiwa Gehena* ni matihlo ya wena mambirhi,+
48 lani swipungwani swa kona swi kalaka swi nga fi ni ndzilu wa kona wu kalaka wu nga timiwi.+
49 “Ndzilu wu fanele wu chululiwa henhla ka vanhu va ku fana ni lava, ku fana ni loko ku cheliwa munyu ka swakudla.+
50 Munyu i wunene, kambe loko munyu wu heleliwa hi ntamu wa wona, mi ta wu pfuxeta hi yini ke?+ Mi fanele mi va munyu+ mi hanyisana hi ku rhula ni van’wani.”+
Tinhlamunselu ta le hansi
^ Kumbexana: “A va byelanga munhu mhaka leyi”.
^ Kumbe: “a tlhutlha khuvi”.
^ Hi Xigriki: “nguva”.
^ Kumbe: “na a tlhutlha khuvi.”
^ Kumbe: “ribye la ku sila leli li rhendzelekisiwaka hi mbongolo”.
^ Hi Xigriki: “ku khunguvanyisa”.
^ Vona Ntlhamuselo.
^ Vona Xiyengetelo A3.
^ Hi Xigriki: “ku khunguvanyisa”.
^ Vona Ntlhamuselo.
^ Vona Xiyengetelo A3.
^ Hi Xigriki: “khunguvanyisa”.
^ Vona Ntlhamuselo.
