Mahungu Ya Ku Tsakisa Ya Ku Tsaliwa Hi Marka 3:1-35
3 Yesu a tlhela a nghena ka sinagoga* lomu a ku ni wanuna wa ku limala* voko.+
2 Vafarisi a va mu txuvukisisa kahle Yesu na va lava ku vona swaku a ta mu hanyisa hi Savata ke, leswaku va ta mu lumbeta.
3 Se a byela wanuna lweyi a ku: “Sekeleka u ta nyima lani xikarhi.”
4 A gama a va vutisa a ku: “I mpsini leswi pfumeleliwaka ku swi yendla hi Savata: Swaswinene kumbe swa ku biha? Ku ponisa wutomi kumbe ku dlaya?”+ Kambe va miyela va ku tititi.
5 Nkama a nga va txuvuka na a nga tsakanga, a hele ntamu swinene hi mhaka ya leswi a va nga na ntwelawusiwana,+ kutani a byela wanuna yelweyo a ku: “Tshandzavuta voko la wena.” Se a li tshandzavuta, kutani li wololoka.
6 Se Vafarisi va huma va ya mu hambela maplanu* ni vaseketeli va Heroda+ swaku va ta mu dlaya.
7 Kambe Yesu a suka ni vadjondzisiwa va yena va ya lwandle, kutani a landziwa hi xitshungu xaxikulu xa le Galileya ni le Yudiya.+
8 Ku te ni vanhu van’wani va vanyingi hi Yerusalema, Idumeya, ka tlhelo lin’wani la Yordani ni le ka tindhawu ta le kusuhi ni Tiru na Sidoni, lava nga twa hi ta minchumu ya ku hlamalisa leyi a a yi yendla.
9 Se a byela vadjondzisiwa va yena swaku va mu lunghiselela boti lalitsongo leli a a ta li tirhisa, leswaku vanhu va nga mu manyeteli.
10 Leswi a nga hanyisa vanhu va vanyingi, hinkwavu lava a va ni mavabyi ya ku chavisa a va mu talela swaku va ta mu khumba.+
11 Hambi madimoni,+ loko ma mu vona, a ma khizama phambheni ka yena ma huwelela ma ku: “Wena u N’wana wa Xikwembu.”+
12 Kambe minkama ya yinyingi a a ma kawuka swaku ma nga byeli vanhu swaku hi yena mani.+
13 Nkama Yesu a nga khwela ka ntshava, a vitane van’wani ka vadjondzisiwa va yena;+ se va famba na yena.+
14 Kutani a langa 12 wa vavanuna, lava a nga tlhela a va chula swaku i vapostolo, lava a va ta famba na yena naswona a a ta va rhuma leswaku va ya chumayela.
15 A va nyika ni matimba ya ku hlongola madimoni.+
16 Kutani a 12 wa vavanuna+ lava a nga va langa a ku li Simoni lweyi a nga mu chula swaku i Pedru,+
17 Yakobe na Yohani vana va Zebedewu (lava a nga tlhela a va chula Bowanerjesi, leswi vulaka: “Vana Lava Fanaka Ni Ku Dzindza Ka Tilo”),+
18 Andre, Filipi, Bartolomewu, Matewu, Tomasi, Yakobe n’wana wa Alfewu, Tadewu, Simoni wa Kanana*
19 na Yudasi Skariyota lweyi a nga gama a xavisa Yesu.
Kutani Yesu a nghena ndlwini
20 naswona ku tlhela ku ta vanhu va vanyingi lakakuva yena ni vadjondzisiwa va yena va nga ha wu kumi nkama wa ku dla swakudla.
21 Kambe loko maxaka ya yena ma twa mhaka leyi, ma ta leswaku ma ta mu khoma hikusa a ma ku: “Wa hlanya.”+
22 Na vona vatsali lava nga ta hi le Yerusalema a va ku: “A ni Belzebule,* naswona a hlongola madimoni hi hosi ya madimoni.”+
23 Se a va vitana, kutani a vulavula na vona hi ku tirhisa swifaniso a ku: “Sathana a nga mu hlongolisa ku yini Sathana?
24 Loko mfumu wu yavanile hi le xikarhi, a wu nge tiyi+
25 naswona loko ndjangu wu yavanile, a wu nge tiyi.
26 Loko swi ku Sathana a hlongola madimoni ya yena hi yexe, mfumu wa yena a wu nge tiyi, wu ta wa.
27 Phela loko munhu o lava ku nghena ka yindlo ya wanuna wa matimba a yiva tshomba la yena, a fanele a rhanga hi ku mu boha. Se hi kona a nga ta kota ku teka leswi nga ka yindlo ya yena.
28 Ni mi byela ntiyiso: Vanhu va ta rivaleliwa swidjoho swa vona hinkwaswu, ku nga na mhaka leswaku i xidjoho xa ku tshamisa ku yini lexi va xi yendlaka hambi ni mavulavulelo ya vona ya nhlambha.
29 Kambe lweyi a rhukaka moya wa ku kwetsima a nge tshuki a rivaleliwa,+ a ta va ni nandzu hi masiku ni masiku.”+
30 A vule leswo hikusa a va ku: “A ni dimoni.”*+
31 Kutani ku fika mamani wa yena ni vamakwavu,+ va nyima handle, se va rhuma munhu a ya mu vitana.+
32 A ku ni xitshungu lexi a xi tshamile xi mu rhendzela, xi ku ka yena: “Mamani wa wena ni vamakwenu va ku lava hala handle.”+
33 Kambe a xi hlamula a ku: “I mani mamani wa mina ni vamakwerhu?”
34 Kutani a txuvuka lava a va tshame kusuhi na yena a ku: “Vonani, mamani wa mina ni vamakwerhu hi lava!+
35 Hikusa lweyi a yendlaka ku rhandza ka Xikwembu, hi yena a nga makwerhu wa xinuna, wa xisati ni mamani ka mina.”+
Tinhlamunselu ta le hansi
^ Kumbe: “ku khwanyala.”
^ I ndhawu leyi Vayuda a va kumana ka yona swaku va khongela va tlhela va lerha matsalwa.
^ Kumbe: “makungu”.
^ Kumbe: “wa ku gingiriteka”.
^ Vito leli nga chuliwa Sathana.
^ Hi Xigriki: “moya wa chaka.”
