Vakorinto Va Wumbirhi 10:1-18
10 Mina Pawulo, na mi khongotela hi ku rhula ni timpsalu ta Kreste,+ hambileswi mi nge ni solekile loko ni li na n’wina,+ kuve loko ni li kule mi li ni ni matimba.+
2 Ni khongelela swaku loko ni ta ka n’wina, ni nga ti ni ta va kawuka hi ku va holovisa lava pimisaka swaku hi kongomisiwa hi mavonelo ya vanhu.
3 Hikusa hambileswi hi nga vanhu, a hi lwi nyimpi hi ku ya hi mavonelo ya vanhu.
4 Hikusa matlharhi lawa hi lwaka hi wona a ma yendliwanga hi vanhu,*+ kambe ma ni matimba ya ku nyikiwa hi Xikwembu+ lakakuva ma kota ku tsuvula ni leswi nga dzima timintsu.
5 Hikusa hi hahlulela mimpimiso ni swilo hinkwaswu leswi pfalelaka vanhu ku tiva Xikwembu,+ hi hlula mimpimiso hinkwayu yi va swib’ochwa swaku yi ta yingisa Kreste;
6 naswona loko se mi kombise swaku ma yingisa hi ku helela, hi lunghekele ku khatisa mun’wani ni mun’wani lweyi a kalaka a nga yingisi.+
7 Mi yavanyisa minchumu hi ku ya hi leswi mi swi vonaka. Loko munhu a kholwa swaku i wa Kreste, a a pimisi* hi mhaka leyi: Ku fana ni leswi yena a nga wa Kreste, na hina hi va Kreste.
8 A ni nge daniseki hambiloko no tibuma ku tlula mpimu hi matimba lawa Hosi yi nga hi nyika wona swaku hi mi tiyisa, hi nga mi heti ntamu.+
9 Hikusa a ni swi lavi swaku mi pimisa leswaku ni lava ku mi chavisela hi makarta ya mina.
10 Hikusa van’wani va li: “Makarta ya yena ma khumbana ngopfu naswona ma ni matimba, kambe loko a li kola na hina a nga na ntamu naswona leswi a swi vulavulaka a swi pfuni nchumu.”
11 Munhu yelweyo a a swi tivi swaku leswi hi swi vulaka ka makarta na hi nga li kona, hi ta swi yendla ni loko se hi li koseno.+
12 A hi nge tshuki hi tiringanisa kumbe ku tifananisa ni van’wani lava tibyelaka.+ Leswi va tikambelaka hi voxe va tlhela va tiyavanyisa hi ku ya hi leswi va pimisaka swaku i swinene, swi kombisa swaku a va twisisi.+
13 Loko ku li hina, a hi nge tibumi hi minchumu leyi hi kalaka hi nga yi yendlanga kambe hi ta tibuma hi ntirho lowu taka hi ka Xikwembu, lowu patsaka ku chumayela.+
14 Phela i Xikwembu xi nga hi rhuma nkama hi nga ta ka n’wina, a hi yo swi sukela naswona hi hina va ku sungula ku chumayela mahungu ya ku tsakisa hi Kreste.+
15 A hi tibumi hi mintirho ya van’wani kambe hi tshemba swaku loko lipfumelo la n’wina li ya li kula, ntirho lowu hi nga wu yendla wu ta tama wu kula xikarhi ka n’wina. Se hi ta swi kota ku yendla swa swinyingi
16 leswaku hi chumayela mahungu ya ku tsakisa ka matiko lama nga kule na n’wina, swaku hi nga tibumi hi ndhawu leyi ku nga tirha mun’wani.
17 “Kambe lweyi a tibumaka a a tibumi hi Yehovha.”*+
18 Hikusa lweyi a tidzunisaka hi yexe a nga yamukeleki,+ kambe ku yamukeleka lweyi a dzunisiwaka hi Yehovha.*+
Tinhlamunselu ta le hansi
^ Kumbe: “a hi ya nyama”.
^ Kumbe: “gayeli”.
^ Vona Xiyengetelo A5.
^ Vona Xiyengetelo A5.
