Vakorinto Va Ku Sungula 12:1-31
12 Vamakwerhu, ni lava swaku mi yi tiva kahle mhaka ya tinyiko ta moya wa ku kwetsima.+
2 Ma swi tiva swaku na ma ha li vanhu vamatiko,* a mi gandzela swikwembu leswi kalaka swi nga vulavuli+ naswona a mi yendla ku rhandza ka swona.
3 Swoswi ni lava mi swi tiva swaku a ku na munhu lweyi moya wa ku kwetsima wu nga mu yendlaka a vula a ku: “Yesu a rhukiwile,” naswona a ku na munhu lweyi a nga vulaka a ku: “Yesu i Hosi,” loko ku nga li hi mhaka ya moya wa ku kwetsima.+
4 Ku ni tinyiko ta ku hambanahambana kambe ko va ni moya wun’we ntsena wa ku kwetsima,+
5 ku ni tindlela ta ku hambanahambana ta ku tirhela van’wani+ kambe hi tirhela Hosi yin’we;
6 naswona ku ni mintirho ya ku hambanahambana leyi yendliwaka hi ku pfuniwa hi moya wa ku kwetsima, kambe i Xikwembu xin’we ntsena lexi tirhisaka vanhu hinkwavu swaku xi yendla minchumu hinkwayu.+
7 Kambe swa voneka ka vanhu hinkwavu leswi moya wa ku kwetsima wu va pfumelelaka ku swi yendla naswona Xikwembu xi va nyika wona swaku ku pfuneka hinkwavu.+
8 Hi ku tirhisa moya lowu, mun’wani a nyikiwe matimba ya ku vulavula hi wutlharhi, mun’wani a nyikiwe matimba ya ku vulavula minchumu leyi van’wani va kalaka va nga yi tivi,
9 mun’wani a nyikiwe lipfumelo,+ mun’wani a nyikiwe matimba ya ku hanyisa,*+
10 kasi mun’wanyani a nyikiwe matimba ya ku yendla masingita,*+ mun’wani a nyikiwe ku profeta, mun’wani a nyikiwe ku twisisa marito lama taka hi ka Xikwembu,+ mun’wani a nyikiwe ku vulavula tirimi ta ku hambanahambana,+ kasi mun’wani a nyikiwe ku tlhamusela tirimi.+
11 Kambe mintirho leyi hinkwayu yi yendliwa hi moya wolowo wa ku kwetsima, lowu yavelaka mun’wani ni mun’wani hi ku ya hi leswi wu swi lavisaka xiswona.
12 Hambileswi muzimbha wu nga wun’we, wu ni swirho swa swinyingi; naswona hambileswi swirho swa muzimbha swi nga swinyingi, hinkwaswu swi yendla muzimbha wun’we;+ swi hi ku fana na Kreste.
13 Hikusa hinkwerhu hi tsakamisiwe hi moya wun’we wa ku kwetsima swaku hi va ka muzimbha wun’we, hambi hi li Vayuda kumbe Vagriki, hambi hi li swikarawa kumbe hi chunsekile; hinkwerhu hi yamukele moya wolowo.
14 Ku vula ntiyiso, muzimbha a wu na xirho xin’we ntsena kambe wu ni swirho swa swinyingi.+
15 Loko nenge wo tshuka wu ku: “Leswi ni kalaka ni nga li voko, a ni xirho xa muzimbha,” leswo a swi vuli swaku a wa ha li xirho xa muzimbha.
16 Ni loko ndleve yo tshuka yi ku: “Leswi ni kalaka ni nga li tihlo, a ni xirho xa muzimbha,” leswo a swi vuli swaku a ya ha li xirho xa muzimbha.
17 Loko muzimbha hinkwawu a wu li tihlo, a hi ta yingisa hi yini ke? Loko muzimbha hinkwawu a wu li ndleve, a hi ta nun’hwetela hi yini ke?
18 Kambe Xikwembu xi veke xirho xin’wani ni xin’wani xa muzimbha hi ku ya hi leswi xi nga swi lavisa xiswona.
19 Loko hinkwaswu a swi li xirho xin’we, muzimbha a wu ta va kwini ke?
20 Kambe swirho i swinyingi kuve muzimbha i wun’we.
21 Tihlo a li nge byeli voko li ku: “A ni na mhaka na wena,” ni nhloko a yi nge byeli minenge yi ku: “A ni na mhaka na n’wina.”
22 Kambe swirho swa muzimbha leswi tikombaka ingaku a swi pfuni nchumu swa laveka
23 ni swirho leswi hi pimisaka swaku a hi swa lisima, hi swona hi swi nyikaka lisima hintamu;+ kutani swirho swa hina leswi hi kalaka hi nga lavi swaku swi voniwa hi vanhu hi swi nyika lisima hintamu,
24 kasi swirho swa hina swa ku saseka a swi lavi ku nyikiwa lisima la ku fana ni lelo. Kambe Xikwembu xi tlhanganise muzimbha, xi nyika lisima hintamu xirho lexi kalaka xi nga na lisima
25 leswaku muzimbha wu nga yavani kambe swirho swa wona swi hlayisana.+
26 Loko xirho xin’we xi hlupheka, swirho leswin’wani hinkwaswu na swona swi hlupheka na xona;+ kumbe loko xirho xin’wani xi dzunisiwa, swirho leswin’wani hinkwaswu swi tsaka na xona.+
27 Kutani n’wina mi muzimbha wa Kreste+ naswona mun’wani ni mun’wani wa n’wina i xirho xa muzimbha wa yena.+
28 Xikwembu xi lange vanhu va ku hambanahambana bandleni: Va ku sungula i vapostolo;+ va wumbirhi i vaprofeta;+ va wunharhu i vadjondzisi;+ ku landzela lava yendlaka masingita;*+ lava nga nyikiwa matimba* ya ku hanyisa;+ lava pfunaka van’wani; lava swi kotaka kahle ku rhangela+ ni lava vulavulaka tirimi ta ku hambanahambana.+
29 Indjhe hinkwavu i vapostolo ke? Indjhe hinkwavu i vaprofeta? Indjhe hinkwavu i vadjondzisi ke? Indjhe hinkwavu va yendla masingita?*
30 Indjhe hinkwavu va ni matimba* ya ku hanyisa ke? Indjhe hinkwavu va swi kota ku vulavula tirimi ta ku hambanahambana?+ Indjhe hinkwavu i vahundzuluxeli ke?+
31 Lwelani ku kuma tinyiko leti nga ta lisima hintamu.+ Kambe ni ta mi komba swa lisima ku tlula swin’wani.+
Tinhlamunselu ta le hansi
^ Ku nga lava kalaka va nga li vapfumeli.
^ Kumbe: “nyiko ya ku hanyisa”.
^ Kumbe: “mintirho ya ku hlamalisa”.
^ Kumbe: “nyiko”.
^ Kumbe: “mintirho ya ku hlamalisa.”
^ Kumbe: “mintirho ya ku hlamalisa.”
^ Kumbe: “nyiko”.
