Hi June 2013 eYuropa Xikarhi ku ve ni mpfula leyikulu leyi nga tolovelekangiki leyi endleke leswaku ku va ni ndhambi. Le Hungary, Nkova wa Danube wu tale hi ndlela leyi a wu nga si tshama wu tarisa xiswona.

Hikwalaho ka xiyimo xa xihatla lexi a xi ri kona, Ndzawulo ya le Hungary ya Vuhlayiseki bya Vanhu yi kombele rhavi ra le Hungary ra Timbhoni ta Yehovha leswaku ti ta pfuna eka ndhambhi leyi a yi ri kona. Hi ku hatlisa, rhavi ri rhambe mavandlha lama tshamaka ekusuhi ni Nkova wa Danube leswaku ma ta pfuna ku sivela ndhambi laha a ma ta kongomisiwa hi vatirhelamfumo va kwalaho.

Mavandlha a ma ha yimayimanga. Eka masiku lama landzeleke, Timbhoni to tlula 900 ta le mavandlheni ya 72 ti pfunete ku lunghisa ribuwa ra nambu. Ti komberiwe ku ambala tibeji leti tsariweke marito lama nge “Timbhoni ta Yehovha” swin’we ni mavito ya tona ni doroba leri ti tshamaka eka rona.

Edorobeni rin’wana, muyimeri wa kwalaho wa Hungarian Red Cross u tsalele vandlha a ku: “Ha mi nkhensa swinene ni ku mi xixima, tanihi leswi swi kalaka ku vona vun’we byo tano ni ku tiyimisela ku pfuna—hi nga ha vuli mpfhuka lowu mi wu fambeke ku ta laha! Mi xikombiso lexinene laha dorobeni ra hina!”

Mutshamaxitulu wa ndzawulo ya mphalalo, tlhelo xirho xa Palamendhe ya le Hungary, u tsalele rhavi ra Timbhoni a nkhensa nseketelo wa tona.