Nhlamulo ya le Bibeleni

 Nkhuvulo i ku nyuperisiwa hi ku helela ematini. a EBibeleni ku boxiwe minkhuvulo yo tala. (Mitirho 2:41) Wun’wana wa yona i nkhuvulo wa Yesu, laha a khuvuriweke eNambyeni wa Yordani. (Matewu 3:13, 16) Endzhakunyana ka malembe, wanuna wa Muetiyopiya u khuvuriwe hi “mati” lama a ma ri ekusuhi ni ndlela leyi a a famba hi yona.—Mitirho 8:36-40.

 Yesu u dyondzise leswaku valandzeri vakwe va fanele va khuvuriwa. (Matewu 28:19, 20) Muapostola Petro u tiyisekise dyondzo yoleyo.—1 Petro 3:21.

Eka nhlokomhaka leyi

•  Nkhuvulo wu vula yini?

•  Xana Bibele yi ri yini hi ku khuvuriwa ka tincece kumbe ku khuvuriwa hi ku n’wan’waseriwa mati?

•  Xana swi vula yini ku khuvuriwa hi vito ra Tatana, ra N’wana ni ra moya lowo kwetsima?

•  Xana ku va munhu a tlhela a khuvuriwa i xidyoho?

•  Minkhuvulo yin’wana leyi boxiweke eBibeleni

•  Mavunwa hi nkhuvulo wa Vakreste

 Nkhuvulo wu vula yini?

 Nkhuvulo i ku swi kombisa erivaleni leswaku munhu u hundzukile eka swidyoho swakwe ni ku endla xitshembiso eka Xikwembu leswaku u ta endla ku rhandza ka xona. Sweswo swi katsa ku yingisa Xikwembu na Yesu. Vanhu lava khuvuriwaka swi va pfulela ndlela ya leswaku va hanya hilaha ku nga heriki.

 Ku khuvuriwa ematini swi kombisa leswaku munhu u hundzukile evuton’wini byakwe. Njhani? Bibele yi fanisa nkhuvulo ni ku lahliwa. (Varhoma 6:4; Vakolosa 2:12) Loko munhu a nyuperisiwa ematini, u kombisa leswaku u file hi ndlela yo fanekisela eka vutomi byakwe bya khale. Kahlekahle, loko a huma ematini u sungula vutomi byakwe lebyintshwa tanihi Mukreste loyi a tinyiketeleke.

 Xana Bibele yi ri yini hi ku khuvuriwa ka tincece kumbe ku khuvuriwa hi ku n’wan’waseriwa mati?

 Bibele a yi ma boxi marito lama nge, “ku n’wan’wasela” kumbe ku n’wan’waseriwa,” b hambi ku ri ku dyondzisa leswaku tincece ti fanele ti khuvuriwa.

 Ku khuvuriwa ka tincece a swi fambisani ni Matsalwa. Bibele yi dyondzisa leswaku munhu loyi a lavaka ku khuvuriwa u fanele a fikelela swilaveko swo karhi. Hi xikombiso, u fanele a twisisa tidyondzo ta masungulo ta Rito ra Xikwembu ni ku hanya hi ku pfumelelana ni tidyondzo toleto. U fanele a hundzuka eka swidyoho swakwe. Hi xikhongelo, u nyiketela vutomi byakwe eka Xikwembu. (Mitirho 2:38, 41; 8:12) Tincece a ti swi koti ku endla swilo leswi.

 Xana swi vula yini ku khuvuriwa hi vito ra Tatana, ra N’wana ni ra moya lowo kwetsima?

 Yesu u lerise valandzeri vakwe ku “endla . . . , vadyondzisiwa. Mi va khuvula hi vito ra Tatana, ni ra N’wana, ni ra moya lowo kwetsima, mi va dyondzisa ku yingisa hinkwaswo leswi ndzi mi leriseke swona.” (Matewu 28:19, 20) “Hi vito ra” swi vula leswaku munhu loyi a khuvuriwaka u fanele a twisisa matimba ni vulawuri bya Tatana ni N’wana, ku katsa ni ndlela leyi moya lowo kwetsima wa Xikwembu wu tirhaka hayona. Hi xikombiso: Muapostola Petro u byele wanuna loyi a velekiweke a lamarile a ku: “Hi vito ra Yesu Kreste wa le Nazareta, famba!” (Mitirho 3:6) Mhaka leyi yi le rivaleni, Petro u xiye ni ku twisisa vulawuri lebyi Kreste a a ri na byona kutani hi singita u horise wanuna yoloye hi vito ra Yesu.

•   “Tatana” i Yehovha c Xikwembu. Leswi a nga Muvumbi, Munyiki wa Vutomi ni Xikwembu xa Matimba Hinkwawo, Yehovha u ni vulawuri lebyi tlakukeke.—Genesa 17:1; Nhlavutelo 4:11.

•   “N’wana” i Yesu Kreste loyi a nyikeleke hi vutomi byakwe hikwalaho ka hina. (Varhoma 6:23) A hi nge ponisiwi handle ka loko ntsena hi twisisa ni ku tlangela vulawuri bya Yesu eka xikongomelo xa Xikwembu hi vanhu.—Yohane 14:6; 20:31; Mitirho 4:8-12.

•   “Moya lowo kwetsima” i matimba ya Xikwembu kumbe moya wa xona lowu tirhaka. d Xikwembu xi tirhise moya wa xona lowo kwetsima ku endla swilo, ku tumbuluxa vanhu, ku hundzisa marungula eka vaprofeta va xona ni van’wana ni ku va nyika matimba yo endla ku rhandza ka xona. (Genesa 1:2; Yobo 33:4; Varhoma 15:18, 19) Xikwembu xi tlhele xi tirhisa moya lowo kwetsima ku huhutela vatsari va Bibele leswaku va tsala miehleketo ya xona.—2 Petro 1:21.

 Xana ku va munhu a tlhela a khuvuriwa i xidyoho?

 Swi tolovelekile leswaku vanhu va cinca vukhongeri bya vona. Kambe ku vuriwa yini loko va khuvuriwe eka vukhongeri bya vona bya khale? Xana va ta va va endla xidyoho loko va tlhela va khuvuriwa? Van’wana va nga hlamula va ku ina hikwalaho ka leswi va swi hlayeke eka Vaefesa 4:5 leyi nge: “Hosi i yin’we, ripfumelo i rin’we, nkhuvulo i wun’we.” Hambiswiritano, ndzimana leyi a yi vuli swona leswaku munhu a nge tlheli a khuvuriwa. Njhani?

 Mongo. Mongo wa Vaefesa 4:5 wu kombisa leswaku muapostola Pawulo a a kandziyisa xilaveko xa leswaku Vakreste va ntiyiso va fanele va hlanganisiwa hi leswi va swi pfumelaka ni hi ripfumelo. Vun’we byo tano byi nga va kona ntsena loko va gandzela Xikwembu xin’we, va va ni ripfumelo rin’we, kumbe va twisisa leswi Bibele yi swi dyondzisaka; ni ku landzela milawu ya Matsalwa leyi fanaka hi nkhuvulo.

 Muapostola Pawulo u khutaze van’wana lava se a va khuvuriwile leswaku va tlhela va khuvuriwa. U va khutaze ku endla tano hikuva a va khuvuriwe handle ko twisisa dyondzo ya Vukreste.—Mitirho 19:1-5.

 Xikongomelo lexinene xo khuvuriwa. Leswaku nkhuvulo wa munhu wu amukelaka eka Xikwembu, u fanele a wu tiva kahle ntiyiso wa le Bibeleni. (1 Timotiya 2:3, 4) Loko munhu a khuvuriwe hi ku ya hi tidyondzo leti lwisanaka ni Bibele, nkhuvulo wolowo a wu amukeleki eka Xikwembu. (Yohane 4:23, 24) Munhu yoloye a nga ha va a tsakela ku endla leswinene, kambe a nga ri na “vutivi lebyi kongomeke.” (Varhoma 10:2) Leswaku a amukeleka eka Xikwembu, u fanele a dyondza ntiyiso wa le Bibeleni, a nyiketela vutomi byakwe eka xona kutani a tlhela a khuvuriwa. Eka swiyimo swo tano, ku va a tlhela a khuvuriwa ku ta va ku nga ri xidyoho. Kahlekahle, u ta va a endla kahle.

 Minkhuvulo yin’wana leyi boxiweke eBibeleni

 Bibele yi boxa minkhuvulo yin’wana leyi nga ni tinhlamuselo leti hambaneke, ku sukela eka ku nyuperisiwa ematini ka valandzeri va Kreste Yesu. Xiya swikombiso swin’wana.

 Nkhuvulo lowu endliweke hi Yohane Mukhuvuri. e Vayuda ni Vayuda lava a va ri vaproselita va khuvuriwe hi Yohane ku kombisa leswaku va hundzukile eka swidyoho leswi va swi endleke hi ku ya hi Nawu wa Muxe, Nawu lowu Xikwembu a xi wu nyike Vaisrayele hi ku tirhisa Muxe. Nkhuvulo wa Yohane wu lunghiselele vanhu ku va va xiya ni ku amukela Mesiya, ku nga Yesu wa le Nazareta.—Luka 1:13-17; 3:2, 3; Mitirho 19:4.

 Nkhuvulo wa Yesu. Nkhuvulo wa Yesu hi Yohane Mukhuvuri a wu hambanile ni ya van’wana. Yesu a a hetisekile a a nga ri na xidyoho. (1 Petro 2:21, 22) Kutani nkhuvulo wakwe a wu nga lavi leswaku a hundzuka kumbe a “kombela ripfalo lerinene eka Xikwembu.” (1 Petro 3:21) Ku ri na sweswo, wu kombise leswaku a a tinyiketele eka Xikwembu leswaku a endla ku rhandza ka Xona tanihi Mesiya loyi ku profetiweke hi yena kumbe Kreste. Sweswo a swi katsa leswaku a nyiketela vutomi byakwe hikwalaho ka hina.—Vaheveru 10:7-10.

 Ku khuvuriwa hi moya lowo kwetsima. Yohane Mukhuvuri na Yesu Kreste va vulavule hi ku khuvuriwa hi moya lowo kwetsima. (Matewu 3:11; Luka 3:16; Mitirho 1:1-5) Nkhuvulo wolowo a wu fani ni ku khuvuriwa hi moya lowo kwetsima. (Matewu 28:19) Hikwalahokayini hi vula tano?

 I nhlayo yitsongo ntsena ya valandzeri va Yesu lava khuvuriwaka hi moya lowo kwetsima. Lava va totiwe hi moya lowo kwetsima hikuva va hlawuriwe ku va na Kreste etilweni tanihi tihosi ni vaprista leswaku va fuma misava. f (1 Petro 1:3, 4; Nhlavutelo 5:9, 10) Va ta fuma valandzeri va Yesu va timiliyoni lava nga ni ntshembo wo hanya hilaha ku nga heriki eParadeyisini laha misaveni.—Matewu 5:5; Luka 23:43.

 Ku khuvuriwa eka Yesu Kreste ni hi rifu rakwe. Lava khuvuriweke hi moya lowo kwetsima va tlhela va ‘khuvuriwa eka Kreste Yesu.’ (Varhoma 6:3) Hikwalaho, nkhuvulo lowu wu tirha eka valandzeri va Yesu lava totiweke, lava nga ta fuma na yena etilweni. Leswi va khuvuriwaka eka Yesu, va va swirho swa vandlha rakwe leri totiweke. Yena i Nhloko kasi vona i miri.—1 Vakorinto 12:12, 13, 27; Vakolosa 1:18.

 Vakreste lava totiweke va tlhela va ‘khuvuriwa eka rifu ra Yesu.’ (Varhoma 6:3, 4) Hi ku tekelela Yesu, va hanya vutomi bya ku titsona swo karhi leswaku va yingisa Xikwembu naswona ku fana na yena va swi tiva leswaku a va nge hanyi hilaha ku nga heriki emisaveni. Va heta nkhuvulo lowu wo fanekisela loko va fa kutani va pfuxiwa leswaku va ya hanya etilweni tanihi swivumbiwa swa moya.—Varhoma 6:5; 1 Vakorinto 15:42-44.

 Ku khuvuriwa hi ndzilo. Yohane Mukhuvuri u vule leswi eka valandzeri vakwe: “Yoloye [Yesu] u ta mi khuvula hi moya lowo kwetsima ni hi ndzilo. U khome rihlelo rakwe ro peperha, naswona u ta basisa xivuya xakwe, a hlengeleta koroni yakwe exitlatini, kambe muhungu u ta wu hisa hi ndzilo lowu nga timekiki.” (Matewu 3:11, 12) Xiya leswaku ku ni ku hambana eka ku khuvuriwa hi ndzilo ni ku khuvuriwa hi moya lowo kwetsima. Xana Yohane a a vula yini hi xifaniso lexi?

 Koroni yi yimela lava nga ta yingisa Yesu. Va ni nkateko wo khuvuriwa hi moya lowo kwetsima. Muhungu wu fanekisela lava nga taka va nga n’wi yingisi Yesu. Makumu ya vona i ku khuvuriwa hi ndzilo, leswi fanekiselaka ku va va loviseriwa makumu.—Matewu 3:7-12; Luka 3:16, 17.