MANILA ePhilippines—Xidzedze Lexikulu xa Haiyan (lexi vitaniwaka Yolanda ePhilippines), ku nga xin’wana xa swidzedze leswikulu leswi tshameke swi va kona etikweni, xi hlasele tiko ra Philippines hi November 8, 2013.

Hi November 13, 2013, rhavi ra Timbhoni ta Yehovha ra le Philippines leri nga edorobeni ra Manila, ri vike leswaku Timbhoni ta 27 ti file eka mhangu leyi. Makaya ya Timbhoni lama tlulaka 100 ni miako ya ntlhanu ya vugandzeri yi onhakile.

Huvo leyi Fumaka ya Timbhoni ta Yehovha yi kongomisa ntirho wo phalala ematikweni hinkwawo yi ri entsindza wa yona wa misava hinkwayo eBrooklyn le New York. Ehansi ka nkongomiso wa yona wo phalala, rhavi ra le Philippines ri endla matshalatshala yo rhumela swakudya, mati, mirhi ni swilo swin’wana etindhawini leti hlaseriweke. Hi Sonto, November 10, swibebe swa kwalomu ka khume swi yise swilo swo phalala ha swona ivi hi siku leri landzelaka swilo swo phalala swi yisiwa hi tilori.

Tiko ra Philippines a ri nga si hlakarhela eka mhangu ya ku tsekatseka ka misava loku a ku ri kukulu hi mpimo wa 7,2 loku veke kona hi October 15, 2013, loku dlayeke vanhu va 218. Ku vikiwe leswaku ku tsekatseka koloko lokukulu ka misava ku dlaye Timbhoni ta Yehovha tinharhu, yin’wana yi dlayiwe hi ku hirimuka ka misava kasi timbirhi ti dlayiwe hi ku weriwa hi tiyindlu ta tona. Ku tsekatseka ka misava ku endleke endzhakunyana ka masiku ku ve ni xidzedze xa Nari lexi hlaseleke Philippines hi October 12, 2013, lexi dlayeke vanhu va 13.

Huvo leyi Fumaka ya Timbhoni ta Yehovha yi tirhisa mali leyi nyikeriwaka entirhweni wa tona wa misava hinkwayo leswaku yi hakelela swikoxo swa mphalalo. Loko ku laveka vatirhi va ku tirhandzela lava nga ni ntokoto, yi kanerisana ni marhavi lama nga emisaveni hinkwayo leswaku ma rhumela vatirhi vo tano va ya phalala, va tirhisana ni vatirhela-mfumo va ndhawu leyi ku humeleleke mhangu eka yona ni minhlangano yo phalala.

Dean Jacek, muvulavuleri wa Timbhoni ta Yehovha ePhilippines, u te: “Hinkwerhu hi ni gome lerikulu hikwalaho ka vanhu vo tala lava dlayiweke hi timhangu leti, leta ha ku endlekaka. Vo tala va lava ku chaveleriwa hileswi va lahlekeriweke hi nhundzu ya vona nileswi va weriweke hi gome lerikulu. Hi ta hambeta hi endla leswi hi nga swi kotaka entirhweni wo phalala ni ku chavelela vanghana ni vaakelani va hina hi ku tirhisa matsalwa.”

Media Contact(s):

International: J. R. Brown, Office of Public Information, tel. +1 718 560 5000

Philippines: Dean Jacek, tel. +63 2 411 6090

Afrika-Dzonga: Mzamo Goloda, +27 11-761-1000