RUNGULA ra Evhangeli ya Matewu ri vula leswaku, “Yesu [u nghene] etempeleni a hlongola hinkwavo lava xavisaka ni lava xavaka etempeleni, a wisetela matafula ya vacinci va mali ni switshamo swa lava xavisaka matuva. Kutani a ku eka vona: ‘Ku tsariwile, “Yindlu ya mina yi ta vuriwa yindlu ya xikhongelo,” kambe n’wina mi yi endla bako ra swigevenga.’”—Mat. 21:12, 13.

Matimu ya Vayuda ma kombisa leswaku vaxavisi volavo a va dyelela vaxavi hi ku va durhisela swiharhi. Hi xikombiso, buku yin’wana ya khale ya Xiyuda, yi vula leswaku ku ve ni nkarhi lowu matuva mambirhi yo endla ha wona xitlhavelo a ma xavisiwa hi denari ya nsuku. Mali yoleyo a yi ringana ni leyi mutirhi loyi a nga dyondzangiki a ta yi hola endzhaku ko tirha masiku ya 25. Swisiwana a swi pfumeleriwa ku tirhisa matuva loko swi endla switlhavelo, kambe matuva wolawo se a ma durha lerova a swi nga ha swi koti ku ma xava. (Lev. 1:14; 5:7; 12:6-8) Sweswo swi n’wi hlundzukise ngopfu mufundhisi Simeon ben Gamaliel, lerova a hunguta nhlayo ya switlhavelo leswi a swi endliwa. Kutani hi ku hatlisa nxavo wa matuva wu hungutiwile swinene.

Rungula leri, ri kombisa leswaku a swi fanela leswi Yesu a vuleke leswaku vanhu lava a va xavisa etempeleni a va ri “swigevenga” hikwalaho ka leswi a va dyelela van’wana naswona a va ri ni makwanga.