“Xikwembu A Xi Ri Kwihi?”
“NDZI TSHAMELA KU TIVUTISA XIVUTISO LEXI: XIKWEMBU A XI RI KWIHI?”—Pope Benedict XVI, loko a endzele khale ka kampa ya nxaniso ya le Auschwitz, ePoland.
LOKO KU HUMELELA MHANGU, XANA U TSHAME U TIVUTISA LESWAKU ‘XIKWEMBU A XI RI KWIHI?’ KUMBEXANA EVUTON’WINI U TSHAME U HUMELELA HI SWILO SWO BIHA LESWI NGA ENDLA LESWAKU U TIVUTISA LOKO XIKWEMBU XI RI NI MHAKA NA WENA?
Kumbexana na wena u titwa ku fana na Sheila, loyi a tshamaka eUnited States. U kurisiwe endyangwini lowu a wu byi rhandza swinene vukhongeri naswona u ri: “Ku sukela loko ndza ha ri ntsongo, ndzi sungule ku rhandza Xikwembu hikuva hi xona xi nga hi Vumba. Kambe, a ndzi nga si tshama ndzi titwa ndzi ri na vuxaka na xona. A ndzi swi tiva leswaku xa ndzi vona kambe xi nga ri na mhaka na mina. A ndzi swi tiva leswaku Xikwembu a xi ndzi vengi kambe a ndzi nga swi tshembi ni leswaku xi ni mhaka na mina.” Hikwalaho ka yini Sheila a kanakana leswaku Xikwembu xi ni mhaka na yena? U ri: “Ndyangu wa ka hina wu weriwe hi makhombo hi ku landzelelana naswona swi tikombe onge Xikwembu a xi nga hi pfuni.”
Ku fana na Sheila, u nga ha va u tshemba leswaku ku ni Xikwembu xa Matimba Hinkwawo. Kambe u nga tivutisa loko hakunene xi ri ni mhaka na wena. Wanuna wo lulama Yobo loyi a ri ni ripfumelo leri tiyeke eka matimba ni vutlhari bya Muvumbi, na yena u ve ni ku kanakana loku fanaka. (Yobo 2:3; 9:4) Endzhaku ka loko Yobo a hlaseriwe hi makhombo hi ku landzelelana, u vutise Xikwembu a ku: “Hikwalaho ka yini u tumbeta xikandza xa wena U ndzi teka ndzi ri nala wa wena?”—Yobo 13:24.
I yini leswi Bibele yi swi vulaka? Xana hi fanele hi sola Xikwembu loko hi humeleriwa hi swilo swo biha? Xana byi kona vumbhoni lebyi kombaka leswaku Xikwembu xi ni mhaka ni vanhu hambi ku ri un’wana ni un’wana wa hina? Xana un’wana ni un’wana wa hina a nga swi kota ku tiva loko hakunene Xikwembu xi ri ni mhaka na hina, xi hi twisisa, xi hi twela vusiwana kumbe xi hi pfuna loko hi ri ni swiphiqo?
Eswihlokweni leswi landzelaka, hi ta kambisisa ndlela leyi ntumbuluko wu hi dyondzisaka ha yona leswaku Xikwembu xi na mhaka na hina. (Varhoma 1:20) Kutani hi ta kambisisa ndlela leyi Bibele yi swi kombisaka ha yona leswaku Xikwembu xi na mhaka na hina. Loko u ya u xi “tiva” hi ku xiya ntumbuluko ni ku dyondza Rito ra xona, u ta ya u swi vona leswaku ‘xa ku khathalela.’—1 Yohane 2:3; 1 Petro 5:7.
U Nga Ha Tsakela
XIHONDZO XO RINDZA
Xana Xikwembu Xi Ni Mhaka Na Wena?
Hi byihi vumbhoni lebyi kombaka leswaku Xikwembu xa khathala hi hina?
