Hi nga ha karhateka swinene loko hi tsandzeka ku pfuna munghana wa hina loyi a karhatiwaka hi ntshikilelo wa miehleketo. Kambe hi nga kombisa leswaku ha khathala hi ku n’wi pfuna a langutana ni xiyimo lexi a nga eka xona. Njhani?

“Hatla ku yingisa.”—YAKOBO 1:19.

Ndlela yin’wana ya nkoka i ku yingisela loko munghana wa wena a lava ku vulavula. U nga titwi onge swa boha ku hlamula hinkwaswo leswi a swi vulaka. N’wi tiyisekise leswaku u rhiye ndleve loko a vulavula naswona wa khathala hi yena. Ringeta ku twisisa ndlela leyi a titwaka hayona naswona u nga n’wi solasoli. Tsundzuka leswaku a nga ha vula swilo leswi humeke endleleni leswi endzhaku a nga ti solaka hi swona.—Yobo 6:2, 3.

“Chavelelani lava karhatekeke.” —1 VATESALONIKA 5:14.

Munghana wa wena a nga ha va a ri eku karhatekeni kumbe a ri eku lwisaneni ni miehleketo yo titwa a nga pfuni nchumu. Loko u n’wi tiyisekisa leswaku wa khathala hi yena, swi ta n’wi chavelela ni ku n’wi tiyisa hambiloko u nga swi tivi leswi u nga swi vulaka.

“Munghana wa ntiyiso u kombisa rirhandzu mikarhi hinkwayo.”—SWIVURISO 17:17.

Ringeta ku n’wi pfuna. Ematshan’weni yo endla onge wa swi tiva leswi u nga swi endlaka, n’wi vutise leswaku u nga n’wi pfuna njhani. Loko munghana wa wena swi n’wi tikela ku hlamusela leswi a swi lavaka, ringeta ku ringanyeta swin’wana leswi mi nga swi endlaka swin’we, swo tanihi ku huma swin’we mi ya beriwa hi moya. Kumbe u nga kombela ku n’wi pfuna hi ku n’wi  yela exitolo, ku n’wi basisela ekaya kumbe ku n’wi endlela mitirho yin’wana.—Vagalatiya 6:2.

‘Lehisa mbilu.’—1 VATESALONIKA 5:14.

A hi mikarhi hinkwayo munghana wa wena a nga ta lava ku vulavula. N’wi tiyisekise ku u ta tshama u ri kona leswaku u ta n’wi yingisela mikarhi hinkwayo loko a lava ku vulavula. Leswi a nga ni ntshikilelo, a nga ha vula kumbe ku endla swilo leswi nga ku twisaka ku vava. A nga ha cinca swilo leswi a mi kunguhate ku swi endla kumbe mikarhi yin’wana a titwa a nga tsakanga. Lehisa mbilu u tlhela u twisisa xiyimo xakwe loko u ri karhi u n’wi seketela.—Swivuriso 18:24.

“Ndza ringeta swinene leswaku ndzi tshama ndzi ri kona loko a ndzi lava. Hambiloko ndzi nga ri na xitshunxo eka swiphiqo swakwe kambe ndza ringeta swinene ku yingisela leswi a lavaka ku swi vula. Mikarhi yin’wana leswi a swi lavaka i ku va ndzi rhiya ndleve loko a tiphofula leswaku a ta titwa a antswa.”—Farrah, a loyi munghana wakwe a karhatiwaka hi mavabyi ya madyelo, ku vilela ni ntshikilelo lowukulu wa miehleketo.

“Un’wana wa vanghana va mina u ni tintswalo naswona wa ndzi khutaza. U ndzi rhambe ekaya kakwe hi ya tiphina hi swakudya swo nandziha. U ndzi kombise rirhandzu naswona u endle swi ndzi olovela ku tiphofula. Sweswo swi ndzi khutazile swinene!”—Ha-eun, loyi a karhatiwaka hi ntshikilelo lowukulu wa miehleketo.

“Ku lehisa mbilu i swa nkoka swinene. Loko nsati wa mina a endla swilo leswi ndzi kwatisaka, ndzi hatla ndzi ti tsundzuxa leswaku a nga ti endlisi kambe ntshikilelo wa miehleketo hi wona wu endlaka a va tano. Leswi swi ndzi pfuna leswaku ndzi nga kwati naswona ndzi n’wi anakanyela.”—Jacob, loyi nsati wakwe a karhatiwaka hi ntshikilelo lowukulu wa miehleketo.

“Nsati wa mina u ve nseketelo ni nchavelelo lowukulu eka mina. Loko ku vilela swi ndzi endla ndzi titwa ndzi nga lavi ku endla nchumu, a nga ndzi sindzisi ku endla swilo leswi ndzi nga swi laviki. Sweswo swi vula leswaku mikarhi yin’wana a nga swi endli swilo leswi a ta tsakela ku swi endla. I wa nkoka swinene eka mina hikuva u ni malwandla naswona a nga lavi leswi vuyerisaka yena ntsena.”—Enrico, loyi a karhatiwaka hi mavabyi ya ku tshamela ku vilela.