Leswi Vanhu Va Swi Vulaka Hi Xikhongelo

TLANGA

“Loko ndzi khongela, ndzi twa onge Xikwembu xi kwala tlhelo ka mina, xi ndzi khoma hi voko xi ndzi komba ndlela loko ndzi nga ha tivi ta mina.”—MARÍA.

“Nsati wa mina u lovile endzhaku ka loko a xanisiwe hi khensa malembe ya 13. Ndzi tsundzuka ndzi hamba ndzi khongela eka Xikwembu masiku hinkwawo naswona a ndzi swi vona leswaku Xikwembu xa xi yingisa xikhongelo xa mina. A ndzi titwa ndzi kume ndzhuti lowu titimelaka kahle loko ku hisa.”—RAÚL.

“Xikhongelo i nyiko leyinene leyi Xikwembu xi yi nyikeke vanhu.”—ARNE.

Eka María, Raúl, Arne ni van’wana vo tala, xikhongelo i nyiko yo hlawuleka leyi humaka eka Xikwembu. Va vula leswaku xikhongelo, xi endla leswaku va kota ku vulavula ni Xikwembu va xi khensa ni ku kombela ku pfuniwa. A va kanakani nikatsongo leswaku leswi Bibele yi swi vulaka hi xikhongelo i ntiyiso: “Ha tshemba leswaku Xikwembu xa hi twa loko hi kombela xin’wana ni xin’wana lexi fambisanaka ni ku rhandza ka xona.”—1 Yohane 5:14.

Kambe vanhu vo tala swa va tikela ku pfumela leswi Bibele yi swi vulaka hi xikhongelo. Steve u hlamusela ndlela leyi a a titwa ha yona hi xikhongelo, u ri: “Loko ndzi ri na malembe ya 17 vanghana va mina vanharhu va file. Un’we u kume mhangu ya movha kasi lavambirhi va nwele elwandle.” Steve u endle yini? U ri: “Ndzi khongele eka Xikwembu ndzi lava ku tiva leswaku hikwalaho ka yini swilo leswi swi endlekile, kambe a ndzi kumanga nhlamulo. Hiloko ndzi tivutisa leswaku ‘ndza ha khongelela yini?’” Vanhu vo tala va tshike ku khongela hileswi va vonaka onge swikhongelo swa vona a swi hlamuriwi.

Van’wana va vona swi nga ri swa nkoka ku khongela hikwalaho ka swivangelo swin’wana. Van’wana va vona onge leswi Xikwembu xi tivaka swilo hinkwaswo, leswi hi swi lavaka ni swiphiqo swa hina a swi bohi leswaku hi xi byela.

Van’wana va vona onge Xikwembu a xi va yingisi loko va khongela hikwalaho ka swidyoho leswi va tshameke va swi endla. Jenny u ri: “Mhaka leyi ndzi karhataka hi leswaku ndzi titwa ndzi nga pfuni nchumu. Ndzi endle swilo leswi ndzi tisolaka ha swona kutani ndzi tibyela leswaku Xikwembu a xi nge lavi ku ndzi yingisela.”

U titwa njhani hi xikhongelo? Loko na wena ku ri na swin’wana leswi ku kanakanisaka hi xikhongelo, tiyiseka leswaku Bibele yi na tona tinhlamulo leti enerisaka. Hi nga swi tshemba leswi Bibele yi swi vulaka hi xikhongelo; * yi nga ku pfuna leswaku u kuma tinhlamulo ta swivutiso swo tanihi leswi nge:

Xana Xikwembu xa swi yingisa swikhongelo swa hina?
Hikwalaho ka yini swikhongelo swin’wana swi nga hlamuriwi?
U fanele u khongela hi ndlela yihi leswaku Xikwembu xi yingisa xikhongelo xa wena?
Xi nga ku pfuna njhani xikhongelo?

^ par. 9 Bibele yi ni swikhongelo swo tala swa malandza ya Xikwembu ku katsa ni swa Yesu Kreste. Matsalwa ya Xiheveru lama vuriwaka Testamente ya Khale ma ni swikhongelo swo tlula 150.