• Va a hlawuriwe hi Xikwembu. “Mina ndzi veke hosi yanga . . . ndzi ta ku nyika matiko ma va ndzhaka ya wena ni makumu ya misava ma va rifuwo ra wena.”—Pisalema 2:6, 8.

• Va mudyandzhaka wa Hosi Davhida. “Hi velekeriwe n’wana, hi nyikiwe n’wana wa jaha . . . Ku tala ka ku fuma ka vuhosana ni ku rhula a swi nge vi na makumu, exiluvelweni xa Davhida ni le mfun’weni wa yena leswaku a wu simeka wu tiya.”—Esaya 9:6, 7. 

• Va a velekiwe eBetlehema. “Wena Betlehema . . . , eka wena ku ta huma loyi a nga ta va mufumi . . . U ta va lonkulu ku ya fika emakumu ka misava.”—Mikiya 5:2, 4. 

• Bakanyiwa hi vanhu a tlhela a dlayiwa. “A a languteriwa ehansi naswona hi n’wi khome kukota loyi a nga pfuniki nchumu. . . . A a tlhaviwa hikwalaho ka ku tlula ka hina nawu; a a pfotlosiwa hikwalaho ka swidyoho swa hina.”—Esaya 53:3, 5.

• Va a pfuxiwile eku feni a tlhela a dzunisiwa. “A wu nge wu tshiki moya-xiviri wa mina eSheol. A wu nge n’wi pfumeleli la tshembekeke wa wena a vona mugodi. . . . Ku ni ntsako evokweni ra wena ra xinene hi masiku.”—Pisalema 16:10, 11.

Eka matimu hinkwawo ya vanhu, i munhu un’we ntsena loyi a faneriwaka hi ku hlamuseriwa hi ndlela leyi naswona munhu yoloye i Yesu Kreste. Kahlekahle, ntsumi yi byele Mariya mana wa Yesu, yi ku: “Xikwembu [xi] ta n’wi nyika xiluvelo xa Davhida tata wakwe, . . . mfumo wakwe a wu nge vi na makumu.”—Luka 1:31-33.

Yesu a nga fumanga laha misaveni. Kambe, u ta fuma vanhu a ri Hosi ya Mfumo wa Xikwembu a ri etilweni. I yini leswi endlaka a faneleka ku va Mufumi? Anakanya hi leswi Yesu a swi endleke loko a ha ri laha misaveni.

•   Yesu a a khathala hi vanhu. U pfune vavanuna ni vavasati, vana ni lavakulu ku nga khathariseki leswaku va huma kwihi kumbe va fuwile kumbe i swisiwana. (Matewu 9:36; Marka 10:16) Loko wanuna loyi a a ri ni nhlokonho a komberile a ku: “Loko u swi lava, u nga ndzi basisa,” Yesu u n’wi twele vusiwana kutani a n’wi hanyisa.—Marka 1:40-42.

• Yesu u hi dyondzise ndlela leyi hi nga tsakisaka Xikwembu ha yona. U te: “A mi nge vi hlonga ra Xikwembu ni ra Rifuwo.” U tlhele a vula leswaku hi fanele hi khoma van’wana hi ndlela leyi hi lavaka ku khomiwa ha yona—ku nga nawu lowu dumeke wa mahanyelo. Ku engetela kwalaho, u hi kombe leswaku Xikwembu a xo tsakisiwa ntsena hi leswi hi swi endlaka kambe ni leswi hi swi ehleketaka ni ndlela leyi hi titwaka ha yona. Kutani leswaku hi tsakisa Xikwembu, hi fanele hi lawula ndlela leyi hi titwaka ha yona etimbilwini ta hina. (Matewu 5:28; 6:24; 7:12) Yesu u kandziyise mhaka ya leswaku loko hi lava ku tsaka hakunene, hi fanele hi dyondza leswi Xikwembu xi lavaka leswaku hi swi endla kutani hi swi endla.—Luka 11:28.

• Yesu u dyondzise leswi swi vulaka swona ku rhandza van’wana. Marito ni swiendlo swa Yesu a swi ri ni matimba swinene lerova swi khumbe timbilu ta vayingiseri va yena. “Mintshungu yi [hlamarisiwe] hi ndlela yakwe yo dyondzisa; hikuva a a va dyondzisa kukota munhu la nga ni vulawuri.” (Matewu 7:28, 29) U va dyondzise a ku: ‘Rhandzani valala va n’wina.’ U tlhele a khongelela ni lava a va katseka eku dlayiweni kakwe a ku: “Tatana, va rivalele, hikuva a va swi tivi leswi va swi endlaka.”—Matewu 5:44; Luka 23:34.

Yesu u faneleka kahle ku va Mufumi loyi a pfunaka ni ku va ni musa. Kambe u sungule rini ku fuma?