Xana u tshame u tivutisa swivutiso swo fana ni leswi? Loko swi ri tano, a wu wexe. Vanhu emisaveni hinkwayo va le ku anakanyeni hi swivutiso leswi swa nkoka. Xana u nga tikuma tinhlamulo ta swona?

Timiliyoni ta vanhu ti nga ku, “Ina.” Ha yini? Hikuva tikume tinhlamulo leti enerisaka ta swivutiso swa tona eBibeleni. Xana u nga tsakela ku tiva leswi Bibele yi swi vulaka? U ta pfuneka swinene eka lunghiselelo ra dyondzo ya Bibele ya mahala ra Timbhoni ta Yehovha. *

I ntiyiso leswaku loko swi ta emhakeni yo dyondza Bibele, vanhu van’wana va ri: “Ndzi khomeke ngopfu.” “Swa tika.” “A ndzi lavi ku tiboha.” Kambe van’wana va ni mavonelo lama hambaneke. Va tinyika nkarhi wo dyondza leswi Bibele yi swi dyondzisaka. Xiya swikombiso swi nga ri swingani:

• “A ndzi nghena kereke ya Khatoliki ni ya Protestente, etempeleni ya Sikh ni yindlu ya tinghwendza ya Mabudha naswona ndzi dyondze dyondzo leyi vulavulaka hi Xikwembu ni vukhongeri eyunivhesiti. Kambe swivutiso swa mina swo tala a swi hlamuriwanga. Mbhoni ya Yehovha yi ndzi endzerile ekaya. Leswi ndzi tsakisiweke hi tinhlamulo ta yona leti sekeriweke eBibeleni, ndzi amukele dyondzo ya Bibele.”—Gill wa le Nghilandhi.

• “A ndzi ri ni swivutiso swo tala hi rifu, kambe tinhlamulo ta mufundhisi wa kereke ya mina a ti ndzi enerisanga. Hambiswiritano, un’wana wa Timbhoni ta Yehovha u hlamule swivutiso swa mina hi ku tirhisa Bibele ntsena. U ndzi vutisile loko ndzi ta swi tsakela ku dyondza leswi engetelekeke, ndzi swi amukele hi ntsako.”—Koffi wa le Benin.

• A ndzi lava ku tiva swo tala hi xiyimo xa vafi. A ndzi pfumela leswaku vafi va nga vavisa lava hanyaka, kambe a ndzi lava ku tiva leswi Bibele yi swi vulaka. Hikwalaho ka sweswo, ndzi sungule ku dyondza Bibele ni munghana wa mina loyi a a ri Mbhoni.”—José wa le Brazil.

• “Ndzi ringete ku hlaya Bibele kambe a ndzi nga yi twisisi. Kutani Timbhoni ta Yehovha ti ndzi endzerile naswona ti ndzi hlamusela vuprofeta byo hlayanyana lebyi nga eBibeleni hi ndlela leyi twisisekaka. Ndzi lava ku dyondza leswi engetelekeke.”—Dennize wa le Mexico.

• “A ndzi tivutisa loko Xikwembu xi khathala hakunene hi mina. Kutani ndzi endle xiboho xo khongela eka Xikwembu xa le Bibeleni. Hi siku leri landzelaka Timbhoni ta Yehovha ti ndzi endzerile endlwini ya mina, kutani ndzi amukela dyondzo ya Bibele.”—Anju wa le Nepal.

Mintokoto leyi yi hi tsundzuxa marito ya Yesu lama nge: “Va tsaka lava khathalaka hi xilaveko xa vona xa moya, hikuva mfumo wa matilo i wa vona.” (Matewu 5:3) Ina, vanhu va vumbiwe va ri ni xilaveko xa swilo swa moya. I Xikwembu ntsena lexi nga enerisaka xilaveko xolexo naswona xi endla sweswo hi ku tirhisa Rito ra xona ku nga Bibele.

Hikwalaho, xana dyondzo ya Bibele yi katsa yini? Yi nga ku pfuna njhani? Swivutiso leswi swi ta hlamuriwa eka xihloko lexi landzelaka.