Yehovha Xikwembu u vumbe tintsumi ta timiliyoni loko a nga si vumba vanhu. (Yobo 38:4, 7) Tintsumi toleto i swivumbiwa swa moya leswi hoxaka xandla swinene entirhweni wa Xikwembu, minkarhi yin’wana xa ti rhuma leswaku ti ya kongomisa malandza ya xona ya laha misaveni ni ku ma sirhelela. (Pisalema 91:10, 11) Namuntlha tintsumi ti pfuna vanhu leswaku va vuyeriwa eka mahungu lamanene lawa valandzeri va Yesu va ma chumayelaka.—Hlaya Nhlavutelo 14:6, 7.

Xana loko hi lava mpfuno hi fanele hi khongela eka tintsumi? Doo! Xikhongelo i xiendlo xa vugandzeri naswona i Yehovha ntsena loyi a faneleke ku gandzeriwa. (Nhlavutelo 19:10) Tanihi leswi tintsumi ti nga malandza ya Xikwembu, ti yingisa nkongomiso wa xona ku nga ri wa vanhu. Hikokwalaho, minkarhi hinkwayo hi fanele hi khongela eka Xikwembu hi ku tirhisa vito ra Yesu.—Hlaya Pisalema 103:20, 21; Matewu 26:53.

Ku fana ni vanhu tintsumi ti vumbiwe ti ri ni ntshunxeko wa ku tihlawulela leswaku ti lava ku endla leswinene kumbe leswo biha. Lexi twisaka ku vava, tintsumi to tala ti xandzukele Xikwembu. (2 Petro 2:4) Ntsumi yo sungula ku xandzuka i Sathana; u landzeriwe hi tintsumi tin’wana leti hundzukeke madimona. Sathana ni madimona yakwe va hlongoriwile etilweni va lahleriwa laha emisaveni.—Hlaya Nhlavutelo 12:7-9.

Ku andza loku veke kona ka vubihi ni madzolonga ku sukela hi 1914, swi kombisa leswaku Xikwembu xi ta lovisa Sathana ni madimona ku nga ri khale. Kutani, Xikwembu xi ta endla misava leyi yi va ndhawu leyinene.—Hlaya Nhlavutelo 12:12; 21:3, 4.