Xikwembu i munhu wa moya la nga vonakiki. Xi vumbe matilo, misava ni swilo hinkwaswo leswi hanyaka. Ku hava loyi a vumbeke Xikwembu—a xi na masungulo. (Pisalema 90:2) Xikwembu xi lava leswaku vanhu va xi lava ni leswaku va tiva ntiyiso malunghana na xona.—Hlaya Mintirho 17:24-27.

Xikwembu i munhu loyi hi nga n’wi tivaka hi vito. Hi nga xiya tin’wana ta timfanelo ta xona hi ku va hi anakanyisisa hi swilo leswi xi swi endleke. (Varhoma 1:20) Kambe leswaku hi xi tiva kahle Xikwembu, hi fanele hi hlaya Rito ra xona, ku nga Bibele. Ri hi byela hi vumunhu bya xona lebyinene.—Hlaya Pisalema 103:7-10.

Muvumbi wa hina, Yehovha, u venga vuhomboloki. U vumbe vanhu hi xifaniso xakwe. (Deteronoma 25:16) Hi yona mhaka leyi vo tala va hina hi vengaka vuhomboloki. Vuhomboloki lebyi nga kona a byi vangiwi hi Xikwembu. Xikwembu xi nyike vanhu ntshunxeko wa ku tihlawulela. Khombo ra kona, vanhu vo tala va tirhisa ntshunxeko wa vona wa ku tihlawulela leswaku va endla swilo swo biha. Yehovha u vavisekile embilwini yakwe.—Hlaya Genesa 6:5, 6; Deteronoma 32:4, 5.

Yehovha u rhandza vululami naswona a nge pfumeleli vuhomboloki leswaku byi hambeta byi va kona hilaha ku nga heriki. (Pisalema 37:28, 29) Bibele yi tshembisa leswaku Xikwembu xi ta herisa vuhomboloki hinkwabyo ku nga ri khale.—Hlaya 2 Petro 3:7-9, 13.