Hi marito ma nga ri mangani yo olova, Genesa i buku yo sungula ya Bibele leyi hlamuselaka masungulo ya vuako hinkwabyo, yi ri: “Eku sunguleni Xikwembu xi tumbuluxe matilo ni misava.” (Genesa 1:1) Endzhaku ka loko Xikwembu xi tumbuluxe swimilana ni swiharhi, xi tumbuluxe vanhu vo sungula, ku nga Adamu na Evha. A va hambane ni swiharhi hikuva vanhu va swi kota ku tekelela timfanelo ta Xikwembu naswona va ni ntshunxeko wa ku tihlawulela. Xisweswo, a va ta tihlamulela eka swiendlo swa vona. Loko a va lo yingisa swiletelo swa Xikwembu, a va ta katseka eka xikongomelo xa xona tanihi vatswari vo sungula va ndyangu wa vanhu wa misava hinkwayo lava a va ta tiphina hi ku rhula ni vutomi lebyi hetisekeke emisaveni hilaha ku nga heriki.

Hambiswiritano, ntsumi yo karhi kumbe xivumbiwa xa moya, xi kume nkarhi wo tirhisa vanhu leswaku va endla leswi xona xi lavaka swona. Xisweswo, xi hundzuke Sathana, leswi vulaka “Mukaneti.” Hi ku tirhisa nyoka, Sathana u kanganyise Evha, a n’wi byela leswaku a nga swi kota ku hanya handle ko kongomisiwa hi Xikwembu. Adamu na Evha va landzele Sathana, va dlaya vuxaka lebyi a va ri na byona ni Muvumbi wa vona. Hikwalaho ka ku hlawula ka vona loku hoxeke, vatswari va hina vo sungula va lahlekeriwe hi vutomi lebyi nga heriki ni ku endla leswaku vanhu hinkwavo va va ni xidyoho, va va lava nga hetisekangiki ni ku weriwa hi rifu leri nga papalatekiki.

Hi ku hatlisa, Xikwembu xi boxe makungu ya xona yo lulamisa xiyimo lexi xo biha ni ku nyika vatukulu va Adamu ndlela yo kuma vutomi lebyi nga heriki. Xikwembu xi profete leswaku “mbewu”—munhu wo hlawuleka—eku heteleleni a yi ta herisa Sathana ni ku xaniseka loku vangiweke hi Sathana, Adamu na Evha. (Genesa 3:15) Xana “mbewu” yoleyo a ku ta va mani? A swi ta vonaka hi ku famba ka nkarhi.

Hi nkarhi wolowo, Sathana u hambete a ringeta ku kavanyeta xikongomelo lexinene xa Xikwembu. Vanhu vo homboloka va ye va engeteleka. Hiloko Xikwembu xi tiyimisela ku herisa vanhu vo homboloka hi ndhambi. Xi lerise Nowa loyi a lulamile leswaku a aka ngalava—bokisi lerikulu leri papamalaka—leswaku a tiponisa yena ni ndyangu wakwe swin’we ni swiharhi leswi a a lerisiwe leswaku a nghena na swona engalaveni.

Endzhaku ka lembe ku ve ni Ndhambi, Nowa ni ndyangu wakwe va humile va ya emisaveni leyi basisiweke. Kambe “mbewu” a yi nga si fika.

—Byi sekeriwe eka Genesa, tindzima 1-11; Yudha 6, 14, 15; Nhlavutelo 12:9.