Vayuda a va lahla vanhu lava feke hi ku hatlisa loko va ha ku fa, hi ntolovelo hi siku rolero. A ku ri ni swivangelo swimbirhi leswi a swi endla va endla hi ndlela yoleyo. Xo sungula, ntsumbu wu hatla wu bola eVuxa Xikarhi laha ku hisaka swinene. Xa vumbirhi, hi ku ya hi ndlela leyi a va anakanya ha yona hi nkarhi wa kona, ku tshika ntsumbu wu hundza masiku wu nga si lahliwa a swi kombisa ku nga xiximi munhu loyi a feke ni ndyangu wakwe.

Tievhangeli ni buku ya Mintirho, ti ni swiendlakalo swa mune swa ku lahla vafi leswi endlekeke hi siku leri munhu a feke ha rona. (Matewu 27:57-60; Mintirho 5:5-10; 7:60–8:2) Eka malembe-xidzana lama hundzeke, nsati wa Yakobe loyi a rhandzekaka ku nga Rahele, u file loko Yakobe ni ndyangu wakwe va ri eriendzweni. Ematshan’weni yo tlherisela ntsumbu wakwe eswilahlweni swa ndyangu wakwe, Yakobe u n’wi lahle esirheni leri a ri ri “endleleni leyi yaka . . . eBetlehema.”—Genesa 35:19, 20, 27-29.

Marungula ya le Bibeleni ya swi veka erivaleni leswaku Vayuda a va ri ni vuxiyaxiya swinene loko va lava ku lahla ntsumbu. Maxaka na vanghana a va hlambisa mufi, va n’wi tota swinun’hwerisi ni mafurha lamanene kutani va n’wi phutsela hi malapi. (Yohane 19:39, 40; Mintirho 9:36-41) Vaakelani ni van’wana a va ta va ta kombisa gome leri a va ri na rona ni ku chavelela vandyangu.—Marka 5:38, 39.

Mindyangu yo tala ya Vayuda a yi lahla vafi va yona emabakweni lama a ma kovotliwe emaribyeni lama nga tiyangiki ngopfu lama a ma tolovelekile etindhawini to tala ta le Israyele. Hi ku endla tano, a yi landzela xikombiso lexi vekiweke hi vapatriyaka. Abrahama, Sara, Isaka, Yakobe ni van’wana va lahliwe ebakweni ra Makapela ekusuhi ni le Hebroni.—Genesa 23:19; 25:8, 9; 49:29-31; 50:13.

Yesu u lahliwe eka sirha-bako leri kovotliweke eribyeni lerikulu. (Marka 15:46) Hi ntolovelo, sirha ro tano a ri ri ni nyangwa wo lala. Endzeni, a ku kovotliwa tindhawu leti endliweke ku fana ni tixelufu, laha a ku latiwa mintsumbu ya swirho swa ndyangu. Endzhaku ka loko ntsumbu wu borile, marhambu lama omeke a ma hlengeletiwa kutani ma vekiwa endzeni ka bokisi leri endliweke hi ribye, hilaha a swi endliwa hakona enkarhini wa Yesu. Hi ndlela leyi, ndyangu a wu ta kota ku kuma ndhawu endzeni ka bako leswaku wu ta kota ku lahla van’wana enkarhini lowu taka.

Hi ku ya hi Nawu wa Muxe, hi Savata a swi nga fanelanga leswaku Vayuda va lunghiselela nkosi hi siku rero. Leswi Yesu a feke tiawara tinharhu Savata yi nga si sungula, Yosefa wa le Arimatiya ni van’wana va n’wi lahle va nga kalanga va lunghiselela ntsumbu wakwe leswaku wu ta lahliwa. (Luka 23:50-56) Hikwalaho ka sweswo, van’wana va vanghana va Yesu va ye eka sirha-bako rakwe endzhaku ka Savata, va ri ni ntshembo wa leswaku va ta hetisa leswi saleke.—Marka 16:1; Luka 24:1.