XANA Yehovha wa ma xiya matshalatshala lawa vagandzeri vakwe va ma endlaka leswaku va n’wi tsakisa? Ina, wa ma xiya! Kambe a nga languti ntsena swiendlo swa vona swa ku n’wi tsakisa ni marito ya vona yo n’wi dzunisa. U xiya ni loko va anakanyisisa hi ndlela leyi va n’wi tlangelaka ha yona. Nakambe, Yehovha a nge pfuki a rivale vanhu vakwe ni swiendlo swa vona. Xana hi nga tiyiseka njhani hi mhaka leyi? Nhlamulo yi kumeka eka marito lama tsariweke hi muprofeta Malakiya.—Hlaya Malakiya 3:16.

Hi lembe-xidzana ra vuntlhanu B.C.E., loko Malakiya a profeta, xiyimo xa mahanyelo ni xa vukhongeri eIsrayele a xi chavisa. Vaprista a va honisa mintirho ya vona naswona vanhu va sungule mikhuva leyi nga xi tsakisiki Xikwembu yo tanihi vungoma, vuoswi ni vukanganyisi. (Malakiya 2:8; 3:5) Hambiswiritano, loko vukanganyisi byi ri hi ndlela yoleyo, a ku ri ni ntlawa wa Vaisrayele lowu tshameke wu tshembekile. Xana a wu endla yini?

Malakiya u ri: “Lava va chavaka Yehovha va vulavurisanile.” Ku chava Xikwembu i mfanelo leyinene. Laha Malakiya u hlamusela Vaisrayele lava a va xi xixima swinene Xikwembu va tlhela va tikarhatela ku tshama va ri karhi va xi tsakisa. Xiya leswaku vanhu lava, lava chavaka Xikwembu “va vulavurisanile.” Swi vonaka onge va hlanganile leswaku va vulavula hi Yehovha ni ku khutazana leswaku va nga heli matimba kumbe ku wongiwa hi vubihi lebyi a byi ri kona.

Vaisrayele lava tshembekaka va kombise xichavo eka Yehovha hi ndlela yin’wana ya nkoka: A va “[anakanya] hi vito ra yena.” Vuhundzuluxeri byin’wana byi vula leswaku a va “xixima vito ra Yena.” Vanhu volavo lava chavaka Xikwembu va kombise Yehovha xichavo ni hi swilo leswi a va swi anakanya. Etimbilwini ta vona, a va anakanyisisa hi Yehovha ni vito rakwe lerikulu. Xana Yehovha a a swi vona leswi va swi endlaka?

Malakiya u ri: “Yehovha a hambeta a rhiya ndleve, a yingisa.” Entiyisweni, Yehovha u va yingise a ri etilweni leswaku a twa marito hinkwawo lawa vagandzeri vakwe a va burisana ha wona. U tlhele a swi tekela enhlokweni swilo hinkwaswo leswi a va anakanyisisa ha swona. (Pisalema 94:11) Kambe u endle swin’wana swo tlula ku va a ma tekela enhlokweni marito lamanene ni leswi va swi anakanyaka.

Malakiya u ri: “Buku ya xitsundzuxo yi sungula ku tsariwa emahlweni ka yena.” Buku yoleyo i rhekhodo ya vanhu hinkwavo lava tirheleke Yehovha hi ku tshembeka. Xiya leswaku yi vitaniwa “buku ya xitsundzuxo.” * Leswi swi hi komba leswaku Yehovha a nge pfuki a rivale vagandzeri vakwe lava tshembekaka ni hinkwaswo leswi va swi endlaka leswaku va n’wi dzunisa—hi swiendlo leswinene, marito ni leswi va swi anakanyaka. Kambe Xikwembu xi ni xivangelo xo va tsundzuka. Lava mavito ya vona ya tsariweke ebukwini ya xona ya xitsundzuxo xi va tshembisa vutomi lebyi nga heriki. *—Pisalema 37:29.

Mawaku ndlela leyi swi chavelelaka ha yona ku tiva leswaku Yehovha u swi teka swi ri swa nkoka hinkwaswo leswi hi swi endlaka leswaku hi n’wi gandzela hi ndlela leyi amukelekaka! Marito lama nga eka Malakiya 3:16 ma fanele ma hi endla leswaku hi anakanyisisa swinene hi vuxaka bya hina na Yehovha. Swi ta va swinene ku tivutisa hi ku, ‘Xana vito ra mina ri kona eka “buku ya xitsundzuxo” ya Xikwembu?’ Ri ta va kona loko hi tikarhatela ku endla swilo, ku vulavula ni ku anakanya hi tindlela leti Yehovha a nga ta lava ku ti tsundzuka.