ROMAN a ha ri mufana loko munghana wakwe a fa eka mhangu ya movha. U ri: “Ku feriwa hi munghana wa mina swi ndzi khumbe swinene. Ku hundze malembe yo tala endzhaku ka mhangu yoleyo kambe a ndza ha tivutisa leswaku ku humelela yini hi hina loko hi fa.”

Swi tikomba onge a hi swa ntumbuluko ku va vanhu va fa. Ku nga khathariseki leswaku hi ni malembe mangani, hakanyingi a hi swi lavi ku fa. Vo tala va chava leswi endlekaka endzhaku ka loko vanhu va file.

Vo tala va tshemba leswaku loko munhu a fa, ku ni xiphemu lexi salaka xi hanya. Va tshemba leswaku vanhu lavanene va ta kuma hakelo etilweni, loko lavo biha va ta xupuriwa hilaha ku nga heriki hikwalaho ka swidyoho swa vona. Van’wana va anakanya leswaku loko munhu a fa u va a nga ha ri kona naswona a nga ha tsundzukiwi hi ku helela.

Nhlamulo yo sungula yi endla swi vonaka onge loko munhu a fa, u va a nga fanga hi ku helela. Ya vumbirhi yi endla swi vonaka onge vutomi a byi na xikongomelo. Lava ehleketaka leswaku vutomi a byi na xikongomelo va nga va ni langutelo leri hoxeke ra leswaku: “A hi dyeni hi nwa, hikuva mundzuku hi ta fa.”—1 Vakorinto 15:32.

Bibele a yi dyondzisi swona leswaku loko munhu a fa ku ni xiphemu xin’wana lexi hambetaka xi hanya. Xikwembu xi huhutele Hosi Solomoni leswaku a tsala a ku: “Lava hanyaka va swi tiva leswaku va ta fa; kambe loko ku ri lava feke, a va tivi nchumu nikatsongo.” (Eklesiasta 9:5) Lava nga ‘tiviki nchumu’ a va tivi nchumu hileswi endlekaka lomu va nga kona. A va koti ku endla nchumu. Kutani lava feke va nge swi koti ku pfuna kumbe ku vavisa lava hanyaka.

Ku hambana ni leswi vo tala va swi tshembaka, a ku nga ri xikongomelo xa Xikwembu leswaku vanhu va fa. Xi vumbe munhu wo sungula, ku nga Adamu, a ri na ntshembo wa ku hanya hilaha ku nga heriki laha misaveni. Nkarhi wo sungula lowu Xikwembu xi vulavuleke hi rifu hi loko xi byela Adamu hi nxupulo wa ku nga yingisi. Xi yirise  Adamu leswaku a nga dyi eka murhi wo karhi kutani xi n’wi lemukisa leswaku loko o wu dya, a a ta “fa hakunene.” (Genesa 2:17) Loko Adamu na Evha a va lo yingisa, vona swin’we ni vatukulu va vona lava tshembekaka eka Xikwembu a va ta va va hanye hilaha ku nga heriki laha misaveni.

Adamu u hlawule ku xi ba hi makatla xilemukiso xa Xikwembu. U dyohile hileswi a nga yingisangiki Xikwembu kutani u file. (Varhoma 6:23) Ku hava xiphemu xa Adamu lexi saleke xi hanya loko a fa. Ematshan’weni ya sweswo, loko Adamu a fa a nga ha vanga kona. Xikwembu xi byele Adamu xi ku: “U ta dya xinkwa hi nyuku wa xikandza xa wena kukondza u tlhelela emisaveni hikuva u humesiwe eka yona. Hikuva u ntshuri u ta tlhelela entshurini.” (Genesa 3:19) Leswi vanhu hinkwavo va humaka eka Adamu, hi tswariwe hi ri ni xidyoho ni rifu leswi sukaka eka yena.—Varhoma 5:12.

Hambileswi Adamu a hlawuleke ku nga yingisi, Xikwembu xi ta hetisisa xikongomelo xa xona xa ku tata misava hi vatukulu va Adamu. (Genesa 1:28; Esaya 55:11) Ku nga ri khale, Yehovha u ta pfuxa vanhu vo tala lava feke. Loko a vulavula hi nkarhi wolowo, muapostola Pawulo u te: “Ku ta va ni ku pfuxiwa ka lava lulameke ni ka lava nga lulamangiki.”—Mintirho 24:15.

Roman, loyi a tshahiweke eku sunguleni, u dyondze Bibele kutani a tiva leswi yi swi dyondzisaka hi rifu na Yehovha Xikwembu. Leswi a swi kumeke swi n’wi khumbe swinene. Hlaya rungula rakwe exihlokweni lexi nge “Bibele Yi Hundzula Vutomi Bya Vanhu”.