Abrahama—Wanuna La Titsongahataka

Abrahama u tshame enxaxeni wakwe, a tiphina hi ndzhuti wa wona tanihi leswi siku rero a ku hisa. Loko a languta evugimamusi, u vone vavanuna vanharhu lava a va endzela ndhawu yoleyo. * Handle ko dya nkarhi, u tsutsume a ya va hlanganisa, a va kombela leswaku va wisanyana kutani va tiphina hi malwandla lawa a va kombiseke wona. U va byele leswaku u ta va nyika “xipandzwa xa xinkwa” kambe u ye emahlweni a lunghiselela swakudya swo tala leswi katsaka xinkwa lexa ha ku bakiwaka, phehlwa, ntswamba ni nyama. Abrahama a nga kombisanga malwandla lama xiyekaka ntsena hi ku va a nyike vaendzi vakwe swakudya sweswo hilaha hi nga vonaka hakona, kambe u kombise ku titsongahata ka xiviri.—Genesa 18:1-8.

I YINI KU TITSONGAHATA? Ku titsongahata swi vula ku va munhu a nga ri na manyunyu kumbe a nga tikukumuxi. Munhu loyi a titsongahataka wa swi xiya leswaku munhu un’wana ni un’wana u tlakukile eka yena hi ndlela yo karhi. (Vafilipiya 2:3) U yingisa swiringanyeto swa vanhu van’wana naswona u tiyimisela ku va endlela mintirho ya xiyimo xa le hansi.

XANA ABRAHAMA U SWI KOMBISE NJHANI LESWAKU WA TITSONGAHATA? Abrahama u tirhele vanhu van’wana hi ntsako. Hilaha swi hlamuseriweke hakona eku sunguleni, loko Abrahama a vona vaendzi vanharhu, u nambe a sungula ku endla hinkwaswo leswi vaendzi vakwe a va swi lava. Hi ku hatlisa, nsati wakwe Sara, u sungule ku lunghiselela swakudya. Kambe xiya leswaku i mani loyi a endleke ntirho lowukulu: Abrahama u tsutsume a ya hlanganisa vaendzi, a va byela leswaku u ta va nyika swakudya, u tsutsumele entlhambini kutani a hlawula xifuwo leswaku xi dlayiwa naswona u endle malunghiselelo hinkwawo emahlweni ko va vaendzi va famba. Ematshan’weni yo endla leswaku mintirho hinkwayo yi endliwa hi malandza yakwe, wanuna loyi wa ku titsongahata u endle swilo hinkwaswo leswi a swi fanela. Ku va a tirhela vanhu van’wana a a nga swi teki ku ri nchumu lowu a wu ta n’wi chicha xiyimo.

Abrahama u yingise swiringanyeto swa lava a va ri  ehansi ka vulawuri byakwe. EBibeleni hi kuma mabulo ma nga ri mangani ntsena ya Abrahama na Sara. Ku ringana kambirhi hi hlaya leswaku Abrahama u yingise mavonelo ya Sara kutani a endla hi ku landza mavonelo wolawo. (Genesa 16:2; 21:8-14) Eka rin’wana ra mabulo wolawo, eku sunguleni xiringanyeto xa Sara a xi n’wi “tsakisanga Abrahama nikatsongo.” Kambe loko Yehovha a vulavule na yena, a ringanyeta leswaku vonelo ra Sara i rinene, Abrahama u pfumelelane na yena hi ku titsongahata kutani a endla hilaha Sara a ringanyeteke hakona.

I YINI LESWI HI SWI DYONDZAKA? Loko hakunene hi titsongahata, hi ta swi tsakela ku tirhela van’wana. Hi ta kuma ntsako loko hi endla xin’wana ni xin’wana lexi hi nga xi kotaka leswaku hi endla leswaku va kuma ntsako lowu engetelekeke evuton’wini.

Hi nga ha tlhela hi kombisa ku titsongahata eka ndlela leyi hi angulaka ha yona eka swiringanyeto swa vanhu van’wana. Ematshan’weni yo swi bakanyela etlhelo swiringanyeto sweswo hikwalaho ka leswi hina hi nga ehleketangiki ha swona, hi nga ha swi amukela hi vutlhari. (Swivuriso 15:22) Langutelo ro tano ro amukela swiringanyeto swa vanhu van’wana ri va vuyerisa ngopfu vanhu lava nga ni vulawuri ehenhla ka vanhu van’wana. John murhangeri loyi a nga ni ntokoto u ri: “Ndzi dyondze leswaku mulanguteri lonene u endla leswaku vanhu va titwa va ntshunxekile ku vula mavonelo ya vona. Swi lava ku titsongahata ku xiya leswaku munhu wo karhi loyi a nga ehansi ka vulawuri bya wena a nga ha va ni ndlela yo antswa yo endla swilo ku tlula ndlela leyi wena u endlaka ha yona. A ku na munhu—hambi ku ri murhangeri—loyi a nga vulaka leswaku hi yena ntsena a nga ni mavonelo lamanene.”

Loko hi tekelela Abrahama hi ku yingisa swiringanyeto swa van’wana ni ku endlela van’wana mintirho ya xiyimo xa le hansi, hi endla leswaku Yehovha a hi tsakela. Phela “Xikwembu xi lwisana ni lava titlakusaka, kambe lava titsongahataka xi va nyika musa lowu nga faneriwiki.”—1 Petro 5:5.

[Nhlamuselo ya le hansi]