Dyondza Eka Rito Ra Xikwembu

I Yini Mfumo Wa Xikwembu?

Xihloko lexi xi tlakusa swivutiso leswi u nga ha vaka u tivutisa swona ni ku ku komba laha tinhlamulo u nga ti kumaka kona eBibeleni ya wena. Timbhoni ta Yehovha ti ta swi tsakela ku bula na wena hi tinhlamulo ta kona.

1. I yini Mfumo wa Xikwembu?

Mfumo wa Xikwembu i hulumendhe ya le tilweni. Wu ta siva tihulumendhe letin’wana hinkwato naswona ku rhandza ka Xikwembu ku ta endleka etilweni ni le misaveni. Kutani Mfumo wa Xikwembu i ntlhantlho wa xilaveko lexi hi nga na xona xa hulumendhe leyinene.—Hlaya Daniyele 2:44; Matewu 6:9, 10.

Mfumo wu fanele wu va ni hosi. Yehovha u tote N’wana wakwe, Yesu, leswaku a va Hosi ya Mfumo Wakwe.—Hlaya Luka 1:30-33.

2. Ha yini Yesu a ri Hosi leyi fanelekaka?

N’wana wa Xikwembu i Hosi leyi fanelekaka hikuva u ni musa, u yima a tiyile eka leswi lulameke naswona u ni matimba yo pfuna vanhu. (Matewu 11:28-30) Endzhaku ka loko Yesu a pfuxiwile, u tlhandlukele etilweni kutani a fika a rindza evokweni ra xinene ra Yehovha. (Vaheveru 10:12, 13) Eku heteleleni, Xikwembu xi n’wi nyike matimba leswaku a sungula ku fuma a ri etilweni.—Hlaya Daniyele 7:13, 14.

3. I vamani van’wana lava nga ta fuma na Yesu?

Ntlawa lowu vitaniwaka “vakwetsimi” wu hlawuriwe hi Xikwembu leswaku wu ta fuma na Yesu etilweni. (Daniyele 7:27) Vanhu vo sungula lava hlawuriweke ku va vakwetsimi a ku ri vaapostola vo tshembeka va Yesu. Yehovha u ya emahlweni a hlawula vavanuna ni vavasati vo tshembeka tanihi vakwetsimi ku fikela sweswi. Ku fana na Yesu, va pfuxiwa va ri ni mimiri ya moya.—Hlaya Yohane 14:1-3; 1 Vakorinto 15:42-45.

I vanhu vangani lava yaka etilweni? Yesu u va vitana “ntlhambinyana.” (Luka 12:32) Eku heteleleni, va ta endla nhlayo ya 144 000 naswona va ta fuma na Yesu ehenhla ka misava.—Hlaya Nhlavutelo 5:9, 10; 14:1.

  4. Xana Mfumo wa Xikwembu wu sungule rini ku fuma?

Yesu u ve Hosi hi 1914. * Endzhakunyana ka sweswo, u cukumetele Sathana ni madimona yakwe laha misaveni. (Nhlavutelo 12:7-10, 12) Ku sukela hi nkarhi wolowo, swiphiqo swa vanhu swi nyanye no tlurisa. Tinyimpi, ku tsekatseka ka misava, ndlala, mintungu ni vuhomboloki i xikombiso xa leswaku mafambiselo ya swilo lama nga kona sweswi ma le masikwini yo hetelela. (2 Timotiya 3:1-5) Vanhu hinkwavo lava lavaka ku vuyeriwa eka Mfumo wa Xikwembu va fanele va dyondza ndlela yo va valandzeri va Hosi Yesu.—Hlaya Luka 21:7, 10, 11, 31, 34, 35.

5. I yini leswi Mfumo wa Xikwembu wu swi hetisisaka?

Hikwalaho ka ntirho wo chumayela emisaveni hinkwayo, Mfumo wa Xikwembu wu le ku pfuneni ka vanhu va timiliyoni eka matiko hinkwawo leswaku va dyondza hi tindlela ta Xikwembu. (Matewu 24:14) Wu ta sirhelela “ntshungu lowukulu” wa vanhu lava tshembekeke va Yesu loko wu herisa fambiselo ro homboloka ra swilo leri nga kona sweswi emisaveni.—Hlaya Nhlavutelo 7:9, 10, 13-17.

Hi nkarhi wa gidi ra malembe, Mfumo wu ta endla misava yi va paradeyisi hakatsongo-tsongo. Eku heteleleni, Yesu u ta tlherisela Mfumo eka Tata wakwe. (1 Vakorinto 15:24-26) Xana ku ni munhu loyi u n’wi tivaka loyi u nga tsakelaka ku n’wi byela hi Mfumo wa Xikwembu?—Hlaya Pisalema 37:10, 11, 29.

Leswaku u kuma rungula leri engetelekeke, vona tindzima 8 na 9 ta buku leyi nge Xana Bibele Yi Dyondzisa Yini Hakunene?, leyi kandziyisiweke hi Timbhoni ta Yehovha.

[Nhlamuselo ya le hansi]