Ku hambana ni vanhu va nyama, Yesu u hanye etilweni tanihi munhu wa moya emahlweni ko va a velekiwa laha misaveni. (Yohane 8:23) A a ri xivumbiwa xo sungula xa Xikwembu naswona u hoxe xandla loko ku tumbuluxiwa swilo leswin’wana hinkwaswo. Hi yena a ri swakwe loyi Yehovha a nga n’wi vumba hi yexe kutani u vitaniwa N’wana wa Xikwembu “la tswariweke a ri swakwe.” Yesu a a tirha tanihi Muvulavuleri wa Xikwembu, kutani u tlhela a vitaniwa “Rito.”—Yohane 1:1-3, 14; hlaya Swivuriso 8:22, 23, 30; Vakolosa 1:15, 16.

Xikwembu xi rhumele N’wana wa xona emisaveni hi ku hundzisela vutomi byakwe ekhwirini ra nhwana wa Muyuda la vuriwaka Mariya. Kutani Yesu a nga vanga na yena tatana la nga munhu wa nyama. (Luka 1:30-35) Yesu u te laha misaveni (1) leswaku a ta dyondzisa ntiyiso malunghana ni Xikwembu, (2) a veka xikombiso xo endla ku rhandza ka Xikwembu ni ku (3) nyikela hi vutomi byakwe lebyi hetisekeke tanihi “nkutsulo.”—Hlaya Matewu 20:28; Yohane 18:37.

Nkutsulo i mali leyi hakeriwaka leswaku ku ntshunxiwa hlonga. Xikongomelo xo sungula xa Xikwembu hi vanhu a ku nga ri swona leswaku va dyuhala kutani va fa. Hi swi tivisa ku yini sweswo? Xikwembu xi byele munhu wo sungula, ku nga Adamu, leswaku loko o endla leswi Bibele yi swi vitaka xidyoho, u ta fa. Loko Adamu a a nga dyohanga, a a ta va a nga fanga. Hambileswi Adamu a hanyeke malembe yo tala, u sungule ku fa hi siku leri a nga xi yingisangiki Xikwembu ha rona. (Genesa 2:16, 17; 5:5) Adamu u hundzisele xidyoho eka vatukulu vakwe hinkwavo ni vuyelo bya xona, ku nga rifu. Xisweswo, rifu ri ‘nghene’ emisaveni hi Adamu. Leswi hi swona swi endlaka hi lava nkutsulo.—Hlaya Varhoma 5:12; 6:23.

I mani loyi a a ta hakela nkutsulo leswaku a hi ntshunxa eka rifu? Loko hi fa, hi hakela xigwevo xa swidyoho swa hina. Munhu la nga hetisekangiki a nge swi koti ku hakela swidyoho swa van’wana.—Hlaya Pisalema 49:7-9.

Leswi Yesu a a hetisekile, a nga fanga hikwalaho ka leswi a dyoheke kambe u fe hikwalaho ka swidyoho swa van’wana. Xikwembu xi rhumele N’wana wa xona leswaku a ta hi fela tanihi xikombiso xa rirhandzu ra xona lerikulu leri xi nga na rona hi vanhu. Yesu u tlhele a kombisa leswaku wa hi rhandza hi ku yingisa Tata wakwe ni hi ku nyikela vutomi byakwe hikwalaho ka swidyoho swa hina.—Hlaya Yohane 3:16; Varhoma 5:18, 19.

Hi ku hanyisa lava vabyaka, ku pfuxa lava feke ni ku ponisa vanhu emaxangwini, Yesu u kombise leswi eku heteleleni a a ta swi endlela vanhu hinkwavo lava yingisaka. (Luka 18:35-42; Yohane 5:28, 29) Endzhaku ka loko a file, Xikwembu xi n’wi pfuxile tanihi munhu wa moya. (1 Petro 3:18) Kutani u rindze evokweni ra xinene ra Xikwembu kukondza xi n’wi nyika matimba yo fuma tanihi Hosi emisaveni hinkwayo. (Vaheveru 10:12, 13) Sweswi u fuma tanihi Hosi etilweni naswona valandzeri vakwe va chumayela mahungu lamanene emisaveni hinkwayo.—Hlaya Daniyele 7:13, 14; Matewu 24:14.

Ku nga ri khale, Yesu u ta tirhisa matimba yakwe tanihi Hosi leswaku a herisa ku xaniseka hinkwako ni lava ku vangaka. Vanhu va timiliyoni lava kombisaka ripfumelo eka yena ni ku n’wi yingisa, va ta tiphina hi vutomi eparadeyisini leyi nga ta va laha misaveni.—Hlaya Pisalema 37:9-11.