I Vamani Lava Chumayelaka Mahungu Lamanene?

“ . . . ma ta chumayeriwa emisaveni hinkwayo.”—MATEWU 24:14.

TIMBHONI TA YEHOVHA ti chumayela mahungu lamanene emisaveni hinkwayo. Leswi ti swi endla hi tindlela to hambana-hambana. Ti tirhisa . . .

Rito Leri Vuriweke. Ku fana na Yesu ni vadyondzisiwa vakwe, Timbhoni ta Yehovha ti ya eka vanhu leswaku ti va chumayela mahungu lamanene. (Luka 8:1; 10:1) A ti langutelanga swona leswaku vanhu va ta eka tona. Timbhoni leti nhlayo ya tona yi tlulaka nkombo wa timiliyoni ti chumayela hi Mfumo wa Xikwembu. Ti chumayela hi yindlu ni yindlu, eswitarateni, hi riqingho ni hi tindlela tin’wana. N’wexemu, ti hete tiawara to tlula biliyoni yin’we ni hafu entirhweni wo chumayela.

Timbhoni a to dyondzisa vanhu hi Mfumo wa Xikwembu ntsena, kambe ti va dyondzisa ni ‘swilo hinkwaswo leswi Yesu a leriseke swona.’ (Matewu 28:20) Nkarhi na nkarhi ti fambisa tidyondzo ta le kaya ta Bibele to tlula nhungu wa timiliyoni.

Timbhoni ti chumayela ematikweni ya 236 emisaveni hinkwayo. Ti chumayela vanhu va mindhavuko hinkwayo. Ti chumayela emadorobeni, emakhwatini ya Amazon, etindhawini ta nhlangasi ta le Siberia, emakwandzasini ya le Afrika ni le Tintshaveni ta le Himalaya. A ti holi loko ti endla ntirho lowu; ti tirhisa mali ya tona ni nkarhi wa tona hi ku susumetiwa hi rirhandzu leri ti nga na rona hi Xikwembu ni hi vaakelani va tona. Ti tlhela ti chumayela mahungu lamanene hi ku tirhisa . . .

Minkandziyiso. Magazini lowu, lowu nhloko-mhaka ya wona yi nge Xihondzo Xo Rindza Xi Huwelela Mfumo Wa Yehovha, sweswi wu kandziyisiwa hi tindzimi ta 185 naswona ku hangalasiwa tikopi to tlula 42 wa timiliyoni ta nkandziyiso wun’wana ni wun’wana. Magazini lowu fambisanaka na wona wa Xalamuka! lowu na wona wu huwelelaka Mfumo, wu kandziyisiwa hi tindzimi ta 83 naswona ku hangalasiwa tikopi ta kwalomu ka 40 wa timiliyoni ta nkandziyiso wun’wana ni wun’wana.

Tibuku, tibroxara, swiphephana, ti-CD, ti-MP3 ni ti-DVD leti hlamuselaka tidyondzo ta Bibele, ti kumeka hi tindzimi ta kwalomu ka 540. Emalembeni ya khume lama hundzeke, Timbhoni ti kandziyise ni ku hangalasa switirhisiwa leswi, leswi tlulaka 20 wa tibiliyoni, leswi hi xiringaniso swi vulaka leswaku munhu un’wana ni un’wana laha misaveni u nyikiwe switirhisiwa swinharhu!

Timbhoni ta Yehovha ti kandziyise ti tlhela ti hakela tikhampani to kandziyisa tibuku leswaku ti ti kandziyisela vuhundzuluxeri bya Tibibele to hambana-hambana. Bibele leyi nge Vuhundzuluxeri Bya Misava Leyintshwa Bya Matsalwa Yo Kwetsima, leyi hundzuluxeriweke, yi kandziyisiwa ni ku hangalasiwa hi Timbhoni, sweswi yi kumeka hi tindzimi ta 96, yi helerile kumbe yi nga helelanga. Ku hangalasiwe tikopi to tlula 166 wa timiliyoni. Nakambe Timbhoni ti chumayela mahungu lamanene ya Mfumo . . .

Eminhlanganweni Ya Vukreste. Leswi endliwaka eminhlanganweni leyi Timbhoni ti vaka na yona  vhiki na vhiki eTiholweni ta Mfumo swi hambanile ni leswi endliwaka etikerekeni; minhlangano ya tona yi endleriwe ku dyondzisa. Ku nyikeriwa tinkulumo leti vulavulaka hi mhaka yo karhi ya le Bibeleni, endzhaku ka sweswo ku dyondziwa Bibele hi ku tirhisa magazini wa Xihondzo xo Rindza ni minkandziyiso yin’wana. Ti tlhela ti dyondzisiwa ndlela yo chumayela mahungu lamanene.

Emavandlheni ya tona yo tlula 107 000, Timbhoni ti dyondza swilo leswi fanaka emisaveni hinkwayo, naswona leswi swi endla leswaku ti va ni vun’we. Vanhu hinkwavo va amukelekile eminhlanganweni ya tona. A ku hlengeletiwi minyikelo. Leswi hinkwaswo a swi nga ta koteka loko Timbhoni a ti nga hanyi hi swona leswi ti swi dyondzisaka. Hikokwalaho, ti chumayela mahungu lamanene hi ku . . .

Veka Xikombiso Lexinene. Ti tikarhatela ku hanya hi ndlela ya Vukreste naswona ti khoma van’wana hi ndlela leyi na tona ti lavaka ku khomiwa ha yona. (Matewu 7:12) Hambileswi ti nga hetisekangiki naswona minkarhi yin’wana ti endlaka swihoxo, ti tikarhatela ku khoma vanhu hinkwavo hi ndlela ya rirhandzu, ku nga ri hi ku va chumayela mahungu lamanene ntsena, kambe ni hi ku va pfuna hi tindlela tin’wana loko swi koteka.

Timbhoni ta Yehovha a ti ringeti ku hundzula vanhu hi ntirho wa tona wo chumayela. Loko ntirho wolowo se wu ta va wu endliwe hi ndlela leyi Yehovha a lavaka ha yona, makumu ma ta fika hilaha Yesu a profeteke hakona. Xana leswi swi ta vula yini eka misava ni vanhu lava hanyaka eka yona?

[Xifaniso lexi nga eka tluka 7]

Timbhoni ta Yehovha ti chumayela mahungu lamanene emisaveni hinkwayo