Xana A Wu Swi Tiva?

Xana a ri ri njhani lunghiselelo ro khwaja naswona i vamani lava a va vuyeriwa eka rona?

▪ Nawu wa Muxe a wu yirisa varimi ku tshovela hinkwaswo leswi nga emasin’wini ya vona. Lava a va tshovela mavele a va nga fanelanga va tshovela ematlhelo ka nsimu ya vona hi ku helela. Lava a va tshovela madiriva, a va nga fanelanga va rholela lama weke kumbe va tlhelela leswaku va ya tshovela lawa a ma nga wupfanga loko va ya ro sungula. Lava a va hlakahla mirhi ya mutlhwari, a va fanele va tshika mihandzu leyi nga wangiki loko va hlakahla. (Levhitika 19:9, 10; Deteronoma 24:19-21) Swisiwana, vana lava nga riki na vatswari, tinoni ni vanhu lava nga riki Vaisrayele a va khwaja leswi saleke loko ku tshoveriwa.

Nawu wo khwaja a wu vuyerisa Vaisrayele hinkwavo. Leswi a swi pfuna Vaisrayele leswaku va kombisa malwandla, va nga vi na vutianakanyi naswona va nga kanakani leswaku Xikwembu xi ta va katekisa. Lava a va khwaja a swi va pfuna leswaku na vona va tirha hikuva ntirho wo khwaja a ku nga ri matlangwana. (Rhuti 2:2-17) Ku khwaja a swi pfuna swisiwana leswaku swi nga vi na ndlala kumbe swi va ndzhwalo eka vaaki. Nakambe a swi endla leswaku va nga titwi va nga pfuni nchumu hikwalaho ko famba va kombela kumbe va titshega hi leswi a va ta nyikiwa swona.

Ha yini Solomoni a xave timhandzi eLebanoni leswaku ku ta akiwa tempele eYerusalema?

▪ Rungula leri nga eka 1 Tihosi 5:1-10 ri hlamusela ntwanano lowu endliweke hi Solomoni na Hiramu hosi ya le Tiri. Hi ku ya hi ntwanano wa kona, mirhi ya mikedari ni ya yunipa a yi fanele yi tisiwa eIsrayele hi xikepe ku suka eLebanoni leswaku ku ta tirhisiwa yona loko ku akiwa tempele.

Mirhi ya mikedari a yi xaviwa ematikweni ya khale ya le Vuxa Xikarhi. Le Egipta ni le Mesopotamiya a yi tirhiseriwa ku endla timhandzi to seketela titempele ni swigodlho. Mapapila ya le vuhosini, tibuku ni marito lama kovotliweke emaribyeni, i swin’wana swa swilo leswi ni sweswi swa ha rhumeriwaka ku fana ni mirhi ya mikedari etindhawini to hambana-hambana ta le dzonga-vuxa bya Mesopotamiya, minkarhi yin’wana swi rhumeriwa ku fana ni nhundzu leyi phangiweke enyimpini kumbe nyiko. Le Egipta a yi tlhela yi tirhisiwa ku endla swikepe, mabokisi ya vafi ni swin’wana leswi tirhisiwaka enkosini.

Mirhi ya mikedari ya le Lebanoni a yi tiviwa hi ku tiya, ku saseka, ku nuhela kahle naswona switsotswana a swi nga yi hlaseli hi ku olova. Kutani Solomoni u tirhise swilo swa xiyimo xa le henhla loko a aka tempele. Namuntlha mirhi leyi, leyi a yi tele swinene emakhwatini ya le Lebanoni a ya ha talanga naswona yi hangalakile.

[Xifaniso lexi nga eka tluka 15]

Xifaniso lexi kombisaka swikepe leswi a swi fambisa mirhi ya mikedari ni swilo swo phalala Vaasiriya leswi a swi huma eka Sargoni

[Xihlovo Xa Kona]

Erich Lessing/Art Resource, NY