Swiendlo Swo Biha Swi Ta Herisiwa

XIKWEMBU xi hi nyike Rito ra xona leri huhuteriweke leri hlamuselaka swivangelo swo va vanhu va endla swilo swo biha. Xi hi nyike ntshunxeko wo tihlawulela ni vuswikoti byo tikhoma, lebyi hi pfunaka leswaku hi papalata ku endla swilo swo biha. (Deteronoma 30:15, 16, 19) Kutani hi fanele hi xiya ku tsana kun’wana ni kun’wana loku hi nga na kona, ivi hi teka magoza lama faneleke. Hi ta va ni ntsako loko hi papalata ku endla swilo swo biha naswona vanhu lava hi tshamaka na vona va ta tsaka.—Pisalema 1:1.

Hambiloko ho wa hi pfuka leswaku hi papalata ku endla swilo swo biha, vanhu va ha ta ya emahlweni va swi endla emisaveni leyi hi hanyaka eka yona. Bibele yi ri: “Tiva leswi, leswaku emasikwini yo hetelela ku ta fika minkarhi ya mangava leyi swi nonon’hwaka ku langutana na yona.” Loko yi hlamusela swivangelo leswi endlaka swi “[nonon’hwa] ku langutana”  ni masiku lawa hi hanyaka eka wona yi ri: “Vanhu va ta va lava tirhandzaka, varhandzi va mali, lava titivaka, lava titlakusaka, vasandzi, lava nga yingisiki vatswari, lava nga nkhensiki, lava nga tshembekiki, lava nga riki na xinakulobye xa ntumbuluko, lava nga laviki ntwanano hambi wu ri wihi, valumbeti, lava nga tikhomiki, lava nga ni tihanyi, lava nga rhandziki vunene, vaxengi, lava omeke tinhloko, lava tikukumuxaka hi ku tinyungubyisa, lava rhandzaka mintsako ku ri ni ku rhandza Xikwembu, va ri ni xivumbeko xa ku tinyiketela loku nga ni vukwembu kambe va tikomba va nga tshembeki eka matimba ya kona; kutani lava u va fularhela.”—2 Timotiya 3:1-5.

Kumbexana u xi xiyile xiga lexi nge ‘masiku yo hetelela’ eka ndzimana leyi nga laha henhla. Xana xi ku byela yini? Loko vanhu vo tala va twa xiga lexi nge ‘masiku yo hetelela’ va swi tiva leswaku ku ni swilo leswi nga ta fika emakumu ku nga ri khale. Xana ku nga va ku ri yini swilo swa kona? Xiya leswi Xikwembu xi swi tshembisaka eRitweni ra xona.

Lavo homboloka va ta herisiwa.

“Hi nkarhinyana, lowo homboloka a nge he vi kona; Kunene u ta languta endhawini yakwe, u ta va a nga ri kona. Kambe lavo rhula va ta dya ndzhaka ya misava, hakunene va ta kuma ntsako lowu heleleke eku rhuleni lokukulu.”—PISALEMA 37:10, 11.

“Yehovha wa va rindza hinkwavo lava n’wi rhandzaka, kambe lavo homboloka hinkwavo u ta va lovisa.”—PISALEMA 145:20.

Ntshikilelo a wu nge he vi kona.

“[Xi] ta kutsula xisiwana lexi kombelaka ku pfuniwa. [Xi] ta kutsula moya-xiviri wa vona eku tshikileriweni ni le madzolongeni.”—PISALEMA 72:12, 14.

“Ntumbuluko hi woxe na wona wu ta ntshunxiwa evuhlongeni bya ku onhaka kutani wu va ni ntshunxeko lowu vangamaka wa vana va Xikwembu.”—VARHOMA 8:21.

Swilaveko swa vanhu swa nyama swi ta enerisiwa.

“Entiyisweni va ta tshama, un’wana ni un’wana ehansi ka murhi wakwe wa vhinya ni le hansi ka nkuwa wakwe, a ku nge vi na munhu loyi a va chavisaka.”—MIKIYA 4:4.

“Va ta aka tindlu va tshama eka tona; kunene va ta rima masimu ya vhinya va dya mihandzu ya wona. A va nge aki kutani ku tshama un’wana; a va nge rimi kutani ku dya un’wana. Hikuva masiku ya vanhu va mina ma ta fana ni masiku ya murhi; ni ntirho wa mavoko ya vona, vahlawuriwa va mina va ta wu tirhisa hi xitalo.”—ESAYA 65:21, 22.

Ku ta va ni vululami.

“Kutani, xana Xikwembu a xi nge endli hakunene leswaku ku endliwa vululami eka vahlawuriwa va xona lava huwelelaka eka xona vusiku ni nhlikanhi . . . ? Ndza mi byela, xi ta endla leswaku ku endliwa vululami eka vona hi ku hatlisa.”—LUKA 18:7, 8.

“Yehovha u rhandza vululami, naswona a nge va siyi lava tshembekeke vakwe. Kunene va ta rindziwa hilaha ku nga riki na makumu.”—PISALEMA 37:28.

Vutianakanyi byi ta siviwa hi vululami.

“Kunene vaaki va tiko leri noneke va ta dyondza ku lulama.”—ESAYA 26:9.

“Ku ni matilo lamantshwa ni misava leyintshwa leswi hi swi rindzeleke hi ku ya hi xitshembiso xa yena, naswona ku ta va ni ku lulama eka swona.”—2 PETRO 3:13.

Ninamuntlha Vanhu Va Le Ku Cinceni Ka Mahanyelo

A swi kanakanisi leswaku hinkwerhu hi ta swi tsakela ku vona switshembiso leswi swi hetiseka. Kambe hi nga tiyiseka njhani leswaku swi ta hetiseka? Namuntlha hi ni vumbhoni lebyi kombisaka leswaku switshembiso swa Xikwembu swi ta hetiseka. Hi byihi vumbhoni  bya kona? Namuntlha vanhu va timiliyoni emisaveni hinkwayo va swi kotile ku tshika mahanyelo yo biha, vutianakanyi ni mikhuva yin’wana leyi nga riki yinene kutani va va vanhu lava tshembekaka, lava nga ni ku rhula ni musa. Timbhoni ta Yehovha leti tlulaka nkombo wa timiliyoni leti nga ni vun’we emisaveni hinkwayo ti swi kotile ku hlula moya wa xihlawu-hlawu, ku nga ngheneleli eka tipolitiki ni ku nga twanani etimhakeni ta ikhonomi, leswi nga vanga rivengo, madzolonga ni tinyimpi. * Ku tiva leswaku swilo leswi swi karhi swa endleka namuntlha, swi hi tiyisekisa leswaku hakunene switshembiso swa Xikwembu swi ta hetiseka hi ndlela leyi hlamarisaka.

Kambe i yini lexi endlaka leswaku vanhu va cinca hi ndlela leyi? Nhlamulo yi kumeka eka swin’wana swa switshembiso leswi nga eBibeleni, leswi tsariweke hi muprofeta Esaya. U te:

“Mhisi yi ta tshama nkarhinyana ni xinyimpfana xa xinuna, yingwe yi ta etlela ni ximbutana, rhole ni xinghalana ni xifuwo lexi wundliweke kahle swi ta tshama swin’we; kutani swi ta rhangeriwa hi mufana lontsongo. . . . Ni nghala yi ta dya byanyi kukota nkunzi. Kunene n’wana la an’waka u ta tlangela enceleni wa xivatlankombe; naswona n’wana la lumuriweke u ta nghenisa voko ra yena enkeleni wa nyoka leyi nga ni vuxungu. A va nge endli swo biha kumbe ku onha entshaveni ya mina hinkwayo yo kwetsima; hikuva kunene misava yi ta tala hi ku tiva Yehovha kukota mati lama funengetaka lwandle.”—Esaya 11:6-9.

Xana vuprofeta lebyi byi vulavula hi nkarhi lowu swiharhi swi nga ta tshama hi ku rhula ni vanhu ntsena? Doo, ku ni swo tala leswi byi vulaka swona. Xiya leswaku xiphemu xo hetelela xa ndzimana leyi xi kombisa leswi vangaka ku cinca koloko, loko xi ku: “Misava yi ta tala hi [vutivi bya] Yehovha.” Xana vutivi bya Yehovha byi nga cinca mahanyelo ya  swiharhi? Doo! Kambe bya swi kota ku cinca vanhu! Vuprofeta lebyi byi kombisa leswaku vanhu vo tala lava nga ni mahanyelo ya vuharhi va ta ma tshika kutani va va ni vumunhu bya Kreste loko va dyondza ni ku tirhisa leswi Bibele yi swi dyondzisaka.

Xiya xikombiso xa Pedro. * A a tibyela leswaku u lwela ku tisa vululami loko a va xirho xa nhlengeletano ya matherorisi. Endzhaku ko leteriwa, u lerisiwe ku ya hlasela komponi ya maphorisa. Loko a ha endla malunghiselelo yo endla tano, u khomiwile. U hete tin’hweti ta 18 a ri ekhotsweni, kambe u ye emahlweni ni rhengu rakwe. Hi nkarhi wolowo, nsati wakwe u sungule ku dyondza Bibele ni Timbhoni ta Yehovha. Loko a huma ekhotsweni, na yena u sungule ku dyondza Bibele naswona leswi a swi dyondzeke hi Yehovha Xikwembu, swi n’wi susumetele ku cinca ndlela leyi a a swi languta ha yona swilo swin’we ni vutomi. U ri: “Ndzi nkhensa Yehovha leswi ndzi nga dlayangiki munhu loko ndza ha ri therorisi. Sweswi ndzi tirhisa tlhari ra moya wa Xikwembu, ku nga Bibele, ku nyika vanhu rungula ra ku rhula ka ntiyiso ni vululami, ku nga mahungu lamanene ya Mfumo wa Xikwembu.” Pedro u yi endzerile komponi leyi a a kunguhate ku yi hlasela, kambe sweswi a ye hi xikongomelo xo ya yi byela hi rungula ra ku rhula ni hi misava leyi nga riki na madzolonga.

 Ndlela leyi Rito ra Xikwembu ri nga ni matimba ha yona yo cinca vanhu yi hi tiyisekisa leswaku hakunene xitshembiso xa Xikwembu malunghana ni ku herisiwa ka vuhomboloki xi ta hetiseka. Vanhu a va nge endli swilo swo biha hilaha ku nga heriki kambe va ta cinca va endla leswinene. Ku nga ri khale, Yehovha u ta herisa muvangi wa vuhomboloki, ku nga Sathana Diyavulosi, loyi ku nga yena la endlaka leswaku vanhu va endla swilo swo biha naswona a fumaka misava. Bibele yi ri: “Misava hinkwayo yi le hansi ka matimba ya lowo homboloka.” (1 Yohane 5:19) Kambe ku nga ri khale u ta lovisiwa. Vanhu van’wana lava nga ta lovisiwa hi lava sihalalaka ku tshika mahanyelo ya vona yo biha. Mawaku ndlela leyi swi nga ta tsakisa ha yona ku hanya hi nkarhi wolowo!

I yini leswi munhu a faneleke a swi endla leswaku a ta tiphina hi mikateko yoleyo? Tsundzuka leswaku i “[vutivi bya] Yehovha” lebyi endlaka leswaku vanhu va cinca naswona hi byona lebyi nga ta tisa ku cinca emisaveni hinkwayo ku nga ri khale. Hi ku kuma vutivi lebyi kongomeke bya Bibele hi tlhela hi byi tirhisa—hilaha Pedro a endleke hakona—na wena u nga swi langutela hi mahlo-ngati ku hanya emisaveni leyi ku nga ta va ni ku ‘lulama eka yona.’ (2 Petro 3:13) Kutani hi ku khutaza ku tirhisa nkarhi lowu saleke leswaku u dyondza swo tala hi Xikwembu na Yesu Kreste, naswona leswi swi ta ku pfuna leswaku u kuma vutomi lebyi nga heriki.—Yohane 17:3.

[Tinhlamuselo ta le hansi]

[Marito lama tshahiweke exihlokweni lama nga eka tluka 9]

Na wena u nga swi langutela hi mahlo-ngati ku hanya emisaveni leyi ku nga ta va ni ku ‘lulama eka yona.’—2 PETRO 3:13