XANA minkarhi yin’wana swa ku tikela ku yingisa?— * A swi hlamarisi loko swi pfa swi ku tikela. Vanhu hinkwavo swi pfa swi va tikela ku yingisa. Xana a wu swi tiva leswaku hambi ku ri Yesu a a fanele a dyondza ku yingisa?—

Xana wa swi tiva leswaku vana hinkwavo va fanele va yingisa mani?— Ina, va fanele va yingisela vatswari va vona. Bibele yi ri: “Yingisani vatswari va n’wina evun’weni ni Hosi.” (Vaefesa 6:1) Xana i mani tata wa Yesu?— I Yehovha Xikwembu naswona i Tata wa hina. (Matewu 6:9, 10) Hambiloko a wu lo vula leswaku i Yosefa naswona Mariya i mana wakwe, a wu ta va u hlamule kahle. Xana wa swi tiva leswaku swi tise ku yini leswaku va va vatswari vakwe?—

Ntsumi Gabriyele yi byele Mariya leswaku u ta va manana hambileswi a a nga si tivana ni wanuna. Leswaku Mariya a tika, Yehovha u endle singita lerikulu. Gabriyele u byele Mariya a ku: “Matimba ya La nge Henhla-henhla ma ta ku funengeta. Hikwalaho ka sweswo lexi nga ta velekiwa na xona xi ta vuriwa lexo kwetsima, N’wana wa Xikwembu.”—Luka 1:30-35.

Xikwembu xi teke vutomi bya N’wana wa xona etilweni ivi xi byi nghenisa ekhwirini ra Mariya. Kutani vutomi byebyo byi kurile endzeni ka Mariya hilaha vana van’wana va kulaka hakona endzeni ka vamana wa vona. Endzhaku ka tinh’weti ta kaye, Yesu u velekiwile. Loko a nga si velekiwa, Yosefa u teke Mariya naswona vanhu vo tala a va ehleketa leswaku Yosefa i tata wa Yesu wa xiviri. Entiyisweni, Yosefa a a nga ri tata wa yena wa xiviri. Kutani hikwalaho ka leswi, ku nga ha vuriwa leswaku Yesu a a ri ni vatatana vambirhi!

Loko Yesu a ri ni malembe ya 12, u endle nchumu lowu nga kombisa ndlela leyi a n’wi rhandzaka ha yona Tata wakwe wa le tilweni, ku nga Yehovha. Hi nkarhi wolowo, ndyangu wa ka va Yesu, wu teke riendzo ro leha wu ya eYerusalema leswaku wu ya tlangela Paseka hilaha a wu tolovele ku endla hakona. Endzhaku ka sweswo, loko se va tlhelela ekaya eNazareta, Yosefa na Mariya a va swi xiyanga leswaku Yesu a a nga ri na vona. Swi nga ha endleka leswaku wa tivutisa leswaku i yini lexi endleke leswaku va n’wi rivala?—

Hi nkarhi wolowo Yosefa na Mariya a va ri ni vana van’wana. (Matewu 13:55, 56) Swi nga ha endleka leswaku a va famba ni maxaka ya vona, ku nga Yakobo na Yohane swin’we ni tata wa vona Zebediya ni mana wa vona Salome, loyi swi nga ha endlekaka leswaku a a ri sesi wa Mariya. Kutani Mariya a a ehleketa leswaku Yesu a a ri ni maxaka man’wana eka ntlawa wolowo.—Matewu 27:56; Marka 15:40; Yohane 19:25.

Loko Yosefa na Mariya va swi xiya leswaku Yesu a nga kona, va tlhelele eYerusalema hi xihatla. Loko va lavana ni n’wana wa vona a va karhatekile swinene. Hi siku ra vunharhu va n’wi kume etempeleni. Mariya u te eka yena: “Ha yini u hi endle hi ndlela leyi? Phela mina ni tata wa wena a hi ku lava hi tshikelelekile emianakanyweni.” Kambe Yesu u hlamule a ku: “Ha yini mi boheke ku famba mi ndzi lava? Xana a mi nga swi tivi leswaku ndzi fanele ku va endlwini ya Tatana?”—Luka 2:45-50.

 Xana u ehleketa leswaku a swi hoxile ku va Yesu a hlamule mana wakwe hi ndlela leyi?— Kahle-kahle vatswari va yena a va swi tiva leswaku u rhandza ku gandzela endlwini ya Xikwembu. (Pisalema 122:1) Phela Yesu a a ehlekete leswaku va ta rhanga va ya n’wi lava etempeleni ya Xikwembu.— Hi ku famba ka nkarhi, Mariya a a tshamela ku ehleketa hileswi Yesu a swi vuleke.

Xana Yesu a a va languta njhani Yosefa na Mariya?— Bibele yi ri: “[Yesu] a rhelela na vona ivi va fika eNazareta, naswona a hambeta a tiveka ehansi ka vona.” (Luka 2:51, 52) Xana hi nga dyondza yini eka xikombiso xa Yesu?— Ina, hi dyondza leswaku na hina hi fanele hi yingisa vatswari va hina.

Hambiswiritano, minkarhi yin’wana Yesu na yena a swi nga n’wi oloveli ku yingisa—hambi ku ri ku yingisa Tata wakwe wa le tilweni.

Hi vusiku bya le mahlweni ka rifu rakwe, Yesu u kombele Yehovha leswaku a cinca miehleketo yakwe malunghana ni leswi a a lava leswaku Yesu a swi endla. (Luka 22:42) Kambe Yesu u yingise Xikwembu hambileswi a swi tika. Bibele yi vula leswaku “u dyondze ku yingisa eka swilo leswi a xanisekeke ha swona.” (Vaheveru 5:8) Xana u ehleketa leswaku na hina hi nga kuma dyondzo leyi fanaka?—