Leswi Yesu A Swi Dyondziseke Hi Xikwembu

“Munhu loyi a n’wi tivaka kahle Tatana i N’wana. Kutani N’wana u lava ku byela van’wana hi Tatana leswaku na vona va n’wi tiva.”—LUKA 10:22, CONTEMPORARY ENGLISH VERSION.

EMAHLWENI ko va munhu wa nyama, N’wana wa Xikwembu wa mativula u tshame nkarhi wo leha ni Tata wakwe etilweni. (Vakolosa 1:15) Xisweswo, N’wana u tive miehleketo ya Tata wakwe, ndlela leyi a titwaka ha yona ni tindlela takwe. Kutani loko a ta emisaveni, a a tiyimisele ku dyondzisa ntiyiso malunghana ni Tata wakwe. Hi nga dyondza swo tala hi Xikwembu hi ku yingisa leswi N’wana a nga swi vula malunghana na xona.

Vito ra Xikwembu Vito ra Xikwembu, leri nge Yehovha, a ri ri ra nkoka swinene eka Yesu. N’wana loyi, loyi a rhandzekaka a a lava leswaku vanhu va tiva vito ra Tata wakwe ni ku ri tirhisa. Vito ra Yesu ri vula leswaku “Yehovha i Muponisi.” Hi vusiku bya le mahlweni ka rifu rakwe, loko Yesu a khongela eka Yehovha u te: “Ndzi va tivise vito ra wena.” (Yohane 17:26) A swi hlamarisi leswi Yesu a tirhiseke vito ra Xikwembu a tlhela a ri tivisa van’wana. Vayingiseri va Yesu a va nga ta swi kota ku twisisa ntiyiso hi Yehovha handle ko tiva vito rakwe ni leswi ri yimelaka swona. *

Rirhandzu lerikulu ra Xikwembu Loko Yesu a khongela eka Xikwembu u tshame a ku: “Tatana, . . . u ndzi rhandzile misava yi nga si va kona.” (Yohane 17:24) Leswi Yesu a nga ri vona kahle rirhandzu ra Xikwembu loko a ri etilweni, loko a fika laha misaveni a a tiyimisele ku kombisa rirhandzu rero hi tindlela to tala.

Yesu u kombise leswaku rirhandzu ra Yehovha i rikulu swinene. U te: “Xikwembu xi rhandze misava swinene xi kala xi nyikela hi N’wana wa xona la tswariweke a ri swakwe, leswaku un’wana ni un’wana loyi a kombisaka ripfumelo eka yena a nga lovisiwi kambe a va ni vutomi lebyi nga heriki.” (Yohane 3:16) Rito ra Xigriki leri nge “misava,” a ri vuli “misava ya xiviri.” Ri kombetela eka vanhu hinkwavo. Kutani rirhandzu lerikulu ra Xikwembu ri vonake loko xi nyikela hi N’wana wa xona la rhandzekaka, leswaku vanhu lava tshembekaka va kutsuriwa eka xidyoho ni rifu naswona va va ni ntshembo wa vutomi lebyi nga heriki. A hi nge swi koti ku ri twisisa hi ku helela rirhandzu rero.—Varhoma 8:38, 39.

Yesu u vule ntiyiso lowu, lowu tiyisaka nhlana: Yehovha u rhandza mugandzeri un’wana ni un’wana wakwe. U dyondzise leswaku Yehovha u fana ni murisi loyi nyimpfu yin’wana ni yin’wana yakwe yi nga ya risima. (Matewu 18:12-14) U tlhele a vula leswaku ku hava xindzingiri ni xin’we lexi nga welaka ehansi Yehovha a nga swi tivi. U te: “Hambi ku ri misisi ya tinhloko ta n’wina yi hlayiwile hinkwayo.” (Matewu 10:29-31) Loko Yehovha a swi kota ku vona leswaku xindzingiri xin’we a xa ha ri kona exisakeni, swi le rivaleni leswaku a nga swi kota ku khathalela mugandzeri un’wana ni un’wana wakwe. Loko a kota ku xiya ni ku hlayela misisi ya hina, a swi kanakanisi leswaku a ku na lexi a nga xi tiviki hi vutomi bya hina, ku nga va swilaveko swa hina, swilo leswi hi karhataka ni leswi hi vilerisaka.

Tatana la nga etilweni Hilaha hi swi voneke hakona eka xihloko lexi nga hundza, Yesu i N’wana wa Xikwembu la tswariweke a ri swakwe. Kutani a swi hlamarisi leswi N’wana loyi la rhandzekaka minkarhi yo tala loko a vulavula hi Yehovha a a n’wi vula ‘Tata’ wakwe. Emaritweni yakwe yo sungula lawa a nga ma vula etempeleni loko a ri ni malembe ya 12 naswona ku nga wona yo sungula ku rhekhodiwa, u vule leswaku Yehovha i ‘Tata wakwe.’ (Luka 2:49) Rito leri nge “Tatana” ri humelela  minkarhi ya kwalomu ka 190 eka tibuku ta Tievhangeli. Yesu u tirhise swiga swo hambana-hambana ku hlamusela Yehovha, swin’wana swa swona hileswi nge “Tata wa n’wina,” “Tata wa hina” ni lexi nge “Tata wa mina.” (Matewu 5:16; 6:9; 7:21) Ku va Yesu a tirhise swiga leswi hi ku ntshuxeka swi kombisa leswaku vuxaka lebyi yena a nga na byona na Yehovha byi titshege ngopfu hileswi va lavaka ku pfuna vanhu lava nga ni xidyoho naswona va nga hetisekangiki.

U ni tintswalo naswona u lunghekele ku rivalela Yesu a a swi tiva leswaku vanhu lava nga hetisekangiki va lava tintswalo to tala ta Yehovha. Exifanisweni xakwe xa n’wana wa vusopfa, u fanise Yehovha ni tatana la nga ni ntwela-vusiwana naswona a rivalelaka, loyi a amukelaka n’wana wakwe la hundzukeke. (Luka 15:11-32) Marito ya Yesu ma hi komba leswaku Yehovha u languta ndlela leyi mbilu ya munhu la dyoheke yi tisolaka ha yona kutani a n’wi komba tintswalo. Yehovha u tshama a lunghekele ku rivalela mudyohi la hundzukaka. Yesu u te: “Xisweswo ndza mi byela leswaku ku ta va ni ntsako lowukulu swinene etilweni loko mudyohi un’we a hundzuka ku tlula lava lulameke va 99 lava swi nga lavekiki leswaku va hundzuka.” (Luka 15:7) Hakunene munhu un’wana ni un’wana a nga susumeteleka ku tshinela eka Xikwembu xo tano lexi nga ni tintswalo!

Mutwi wa swikhongelo Loko Yesu a ha ri etilweni, u tivonele hi yakwe leswaku Yehovha i “Mutwi wa xikhongelo” naswona u tsakela swikhongelo swa vagandzeri vakwe vo tshembeka. (Pisalema 65:2) Kambe hi nkarhi wa vutirheli byakwe, u dyondzise vayingiseri vakwe ndlela yo khongela ni leswi va faneleke va swi khongelela. U te: “U nga vuli swilo leswi fanaka hi ku phindha-phindha.” U tlhele a va khutaza ku va va khongelela leswaku ku rhandza ka Xikwembu ku “[endleka] emisaveni, hilaha ku endlekaka hakona etilweni.” Hi nga ha tlhela hi khongelela swakudya swa siku ni siku, ku rivaleriwa swidyoho swa hina ni ku papalata miringo. (Matewu 6:5-13) Yesu u dyondzise leswaku Yehovha u hlamula swikhongelo swa malandza yakwe ku fana ni tatana, hikuva u hlamula swikhongelo leswi va swi endlaka hi timbilu ta vona hinkwato naswona va ri ni ripfumelo.—Matewu 7:7-11.

Kutani swi le rivaleni leswaku Yesu a a swi lava swinene ku dyondzisa vanhu ntiyiso malunghana na Yehovha nileswaku i Xikwembu xa muxaka muni. Kambe ku na swin’wana leswi a a lava leswaku vanhu va swi tiva hi Yehovha, a a lava leswaku va tiva ndlela leyi a nga ta xi hetisisa ha yona xikongomelo xakwe hi misava, naswona xikongomelo xexo xi ta vanga ku cinca emisaveni hinkwayo ni le ka vanhu hinkwavo lava tshamaka eka yona. Mhaka leyi hi yona leyi a yi ri nhloko-mhaka ya ku chumayela kakwe.

[Nhlamuselo ya le hansi]