127 Ku Thwasa Ka Ntlawa Wa Vu-127 Wa Le Giliyadi

Varhumiwa Va Rhumeriwa “Ku Ya Fika eNdhawini Ya Le Kule Swinene Ya Misava”

YESU u lerise vadyondzisiwa vakwe ku va timbhoni “ku ya fika endhawini ya le kule swinene ya misava.” (Mintirho 1:8) Timbhoni ta Yehovha ti xi tekela enhlokweni xileriso xexo.

Entiyisweni, emalembeni yo tlula 65 lama nga hundza, varhumiwa lava nga leteriwa eka Xikolo xa Bibele xa Giliyadi xa Watchtower va hoxe xandla entirhweni lowu wo chumayela ematikweni yo tlula 200. Hi Mugqivela, September 12, 2009, vavanuna ni vavasati van’wana va 56 lava nga ni ntokoto entirhweni wo chumayela va thwasile endzhaku ko leteriwa tinh’weti ta ntlhanu exikolweni xa vurhumiwa lexi nga ePatterson, New York le U.S.A.

Mianakanyo Ya Wena Yi Nga Ku Pfuna Kumbe Yi Ku Hambukisa

Stephen Lett, xirho xa Huvo leyi Fumaka ya Timbhoni ta Yehovha loyi a a ri mutshama-xitulu eka nongonoko wo thwasa, u vulavule ni swichudeni hi nhloko-mhaka leyi nge “Yi Tirhise Hi Vutlhari Mianakanyo Ya Wena.” U rhange a lemukisa swichudeni hi tindlela ta mune leti swi nga ti tirhisaka ku letela mianakanyo ya swona. Tindlela tinharhu to sungula a ti ku: (1) U nga ehleketi leswaku swilo leswi vonakaka swi nga ku nyika nsirhelelo wa hilaha ku nga heriki; (2) papalata ku ehleketa hi swilo swo biha; (3) ku vilela ngopfu ni ku ehleketa hi ndlela leyi siku leri landzelaka ri nga ta va ri bihise xiswona. (Swivuriso 18:11; Matewu 5:28; 6:34) Malunghana ni ndlela leyi ya vunharhu, xivulavuri xi vule leswaku ku vilela ngopfu swi endla leswaku munhu a katsa mivilelo ya siku leri nga hundza ni ya namuntlha kutani a tlhela a teka mivilelo ya siku leri landzelaka a yi katsa ni ya namuntlha. Makwerhu Lett u te: “Wolowo i ndzhwalo wo tika swinene ku wu rhwala.” Xana ndlela ya vumune a yi vulavula hi yini? Swichudeni swi lemukisiwe leswaku swi nga ehleketi leswaku vutomi bya swona a byi antswa loko swi nga si amukela swiavelo swa swona swa vurhumiwa, hikuva sweswo swi nga endla leswaku swi nga vi na ntsako ematikweni lawa swi nga ta averiwa eka wona.

Endzhaku ka sweswo, Makwerhu Lett u khutaze swichudeni leswaku swi tirhisa mianakanyo ya swona hi tindlela letinene ta mune. U te: (1) Xalamukelani swiyimo leswi nga ha mi hoxaka ekhombyeni hi tlhelo ra moya kumbe hi tlhelo ra nyama kutani mi papalata makhombo ya kona; (2) swiendlakalo leswi u swi hlayaka eBibeleni swi vone hi mahlo ya mianakanyo naswona u tivona u ri eka xiendlakalo lexi u hlayaka ha xona; (3) languta munhu un’wana ni un’wana loyi u vulavulaka na yena exiavelweni xa wena lexintshwa tanihi mugandzeri wa Yehovha wa nkarhi lowu taka; ni (4) ku hlakulela ku va ni ntwela-vusiwana hi ku tiveka exiyin’weni xa lava u va chumayelaka.—Swivuriso 22:3.

Nkoka Wo Letela Van’wana

David Splane, xirho xa Huvo leyi Fumaka, u nyikele nkulumo leyi nga ni nhloko-mhaka leyi nge “Swilo Leswi Swi Nyike Vanhu Vo Tshembeka,” leyi sekeriweke eka 2 Timotiya 2:2. Loko muapostola Pawulo a byela Timotiya leswaku a letela vavanuna vo tshembeka, xikongomelo xakwe a ku nga ri leswaku Timotiya a dyondzisa vavanuna volavo ntiyiso ntsena kambe ni ku va khutaza ku letela van’wana. Xivulavuri xi byele swichudeni leswaku ku ni xilaveko lexikulu xa vavanuna lava faneleke va rhangela emintirhweni ya Vukreste. Xana vavanuna volavo a va ta leteriwa rini naswona njhani? Makwerhu Splane u khutaze swichudeni leswaku swi sungula ku va letela loko swi sungula ku dyondza Bibele na vona.

Hi yihi ndlela yo hlawuleka leyi varhumiwa va nga swi letelaka ha yona swichudeni swa Bibele leswaku swi va swikombiso swo tshembeka eka van’wana? Xivulavuri xi xaxamete tindlela to hlayanyana. Varhumiwa va fanele va swi dyondzisa ku lunghiselela kahle dyondzo ya swona vini ya Bibele. Kutani loko swichudeni swi sungula ku va kona eminhlanganweni ya vandlha, swi fanele swi dyondza ku tilunghiselela minkandziyiso leyi sekeriweke eBibeleni leyi ku nga ta dyondziwa  yona eminhlanganweni. Xivulavuri xi tlhele xi ku: “Loko munhu a nga swi koti ku tihlayela Bibele, a nge swi koti ku dyondzisa van’wana.” Makwerhu Splane u tlhele a vula leswaku varhumiwa va nga pfuna swichudeni leswintshwa swa Bibele leswaku swi fika hi nkarhi eminhlanganweni, swi wu seketela hi timali ntirho wo chumayela ni ku yingisa lava rhangelaka sweswi. U vule leswaku ndlela leyinene leyi va nga swi endlaka ha yona sweswo i ku va va va swikombiso leswinene.

Lunghelo Ra Ku Va Mbhoni

Guy Pierce, loyi na yena a nga xirho xa Huvo leyi Fumaka u vulavule hi nhloko-mhaka leyi nge, “Mi Ta Va Timbhoni Ta Mina,” leyi sekeriweke eka marito ya Yesu lama nga eka Mintirho 1:8. U tsundzuxe swichudeni leswaku hi lembe-xidzana ro sungula C.E., tiko ra Israyele ri lahlekeriwe hi lunghelo ro va timbhoni ta Yehovha. Lunghelo rero ri nyikiwe tiko leri humesaka mihandzu ya Mfumo. (Matewu 21:43) Vandlha ra Vakreste lava totiweke ri tikombe ri ri tiko rero. Xivulavuri xi tshahe muapostola Petro loyi a vuleke leswaku “tiko ro kwetsima” ra Vakreste lava totiweke ri ta ‘twarisa vunene bya Yehovha hinkwako-nkwako.’ (1 Petro 2:6-9) Yesu a a nga vuli swona leswaku Vakreste va fanele va va timbhoni takwe ntsena kutani va nga ha vi timbhoni ta Yehovha. Ku tlula kwalaho, Yesu u vitaniwa “Mbhoni yo Tshembeka.” (Nhlavutelo 1:5; 3:14) Hi yena Mbhoni yo sungula ya Yehovha naswona hi fanele hi landzela mikondzo yakwe.—1 Petro 2:21.

Loko xivulavuri xi vulavula ni swichudeni hi minkarhi leyi hi hanyaka eka yona, xi vule leswaku marito ya Yesu lama nga eka Mintirho 1:8 i ya nkoka swinene. Ha yini? Xivangelo hileswaku vuprofeta bya nkoka lebyi nga rivalekiki lebyi nga eka Nhlavutelo 11:15 se byi hetisekile! Mfumo wa Xikwembu lowu nga emavokweni ya Mesiya se wu simekiwile. Namuntlha ntirho wo chumayela wu karhi wa endliwa “ku ya fika endhawini ya le kule swinene ya misava.” (Mintirho 1:8) Makwerhu Pierce u vule leswaku varhumiwa va fanele va nyikela vumbhoni hi Yehovha ni Mfumo wakwe, ku nga ri hi vona vini kumbe hi vutomi bya vona bya khale, ndhavuko wa vona ni tiko leri va humaka eka rona. U khutaze swichudeni leswaku swi dyondzisa “vanhu vo tala hilaha swi nga kotaka hakona enkarhini lowu nga sala.”

Tinhla Tin’wana Ta Nongonoko

Alex Reinmueller, mupfuni eka Komiti ya Vukandziyisi u vulavule hi nhloko-mhaka leyi nge “Yehovha U Ta Mi Nyika Xivindzi.” U vule leswaku loko varhumiwa va titshega hi matimba ya Yehovha, U ta va pfuna va xiya matimba lawa va nga na wona, ku tsana ka vona, va langutana ni ku chava loku va nga na kona ni ku n’wi endlela leswi nga ematimbeni ya vona.

Sam Roberson na William Samuelson, lava nga valeteri va Ndzawulo ya Swikolo swa Vutirheli bya le Tilweni, na vona va vulavule ni swichudeni. Makwerhu Roberson u vulavule hi nhloko-mhaka leyi nge “Ndzi Na Wena,” leyi sekeriweke eka Esaya 41:10. U vule leswaku varhumiwa va ta tiphina swinene, kambe va ta langutana ni swiphiqo. Va nga swi kota ku langutana na swona loko va tekelela Hosi Davhida, loyi a byeleke Tata wakwe wa rirhandzu hi swiphiqo swakwe. (Pisalema 34:4, 6, 17, 19) Nkulumo ya Makwerhu Samuelson yi kandziyise nkoka wa ku hambeta va antswisa vuswikoti byo anakanya. Varhumiwa lava endlaka tano va swi kota ku papalata timhaka leti nga akiki naswona a va hatli va hlundzuka.—Swivuriso 2:10, 11.

Jim Mantz, mupfuni wa Komiti ya Vatsari, u vulavurisane ni xirho xa Komiti ya Rhavi xo huma eRhiphabliki ra Georgia ni xirho xin’wana xo huma eHonduras swin’we ni xirho xa Komiti ya Tiko xo huma eRhiphabliki ra Tajikistan. Vamakwerhu lava, lava nga ni ntokoto va nyike varhumiwa xitsundzuxo xa ndlela leyi va nga vaka vanghana va vanhu lava nga laviki ku twa nchumu hi vona hi ku “hlula swo biha hi leswinene.” (Varhoma 12:21) Mark Noumair, muleteri un’wana wa swichudeni, u vulavurisane ni swichudeni leswi nga ni ntokoto entirhweni wo chumayela leswi tiphineke loko swi leteriwa exikolweni xa Giliyadi. Xiyenge xexo a xi ri ni nhloko-mhaka leyi tlhontlhaka mianakanyo leyi nge, “Xana Ndzi Nga Ku Pfuna?”

Mutshama-xitulu u gimete nongonoko hi ku tshaha marito lama nga eka risimu lerintshwa lama nge, “Tivone U Ri eMisaveni Leyintshwa Loko Hinkwaswo Swi Ri Leswintshwa.” Vanhu va 6 509 lava a va ri kona eka xiendlakalo xexo va ye va tiyimisela swinene ku nyikela vumbhoni hi Yehovha ni N’wana wakwe ku “ya fika endhawini ya le kule swinene ya misava.”

 [Chati/Mepe lowu nga eka tluka 31]

8 matiko lama yimeriweke

56 swichudeni

28 mimpatswa leyi tekaneke

33,6 xiringaniso xa malembe

18,3 xiringaniso xa malembe va khuvuriwile

13,6 xiringaniso xa malembe evutirhelini bya nkarhi hinkwawo

[Mepe]

(Leswaku u vona rungula leri hleriweke hi ku helela, vona nkandziyiso wa kona)

Swichudeni swi averiwe ematikweni ya 22 hilaha swi kombisiweke hakona laha hansi

JAMAICA

HAITI

NICARAGUA

COSTA RICA

PANAMA

CURAÇAO

GUYANA

PERU

BOLIVIA

PARAGUAY

CHILE

MOLDOVA

SERBIA

ALBANIA

CÔTE D’IVOIRE

CONGO, DEM. REP.

UGANDA

BURUNDI

TANZANIA

MOZAMBIQUE

NEPAL

CAMBODIA

[Xifaniso lexi nga eka tluka 31]

Ntlawa Wa Vu-127 Lowu Thwasaka Wa Xikolo Xa Bibele Xa Giliyadi Xa Watchtower

Eka nxaxamelo lowu nga laha hansi, tilayeni ti hlayeriwa ku suka emahlweni ku ya endzhaku, naswona mavito ma xaxametiwe ku suka eximatsini ku ya exineneni eka layeni yin’wana ni yin’wana.

(1) Marshall, T.; Prudent, L.; Mashburn, A.; Rosenström, S.; Testa, A.; Takeyama, M.; Sisk, M.

(2) Grooms, K.; Miura, S.; Camacho, M.; Rozas, S.; Burch, M.; Meza, I.; Young, G.; Geraghty, S.

(3) Bonilla, C.; Knaller, D.; Parrales, R.; Hotti, S.; Takada, A.; Tournade, M.; Sopel, C.

(4) Miura, Y.; Parrales, K.; Prudent, K.; Colburn, S.; Willis, L.; Vääränen, A.; Sisk, B.; Takada, R.

(5) Grooms, J.; Vääränen, M.; Geraghty, B.; Stackhouse, R.; Wilson, A.; Bonell, E.; Camacho, D.; Meza, R.; Bonell, M.

(6) Takeyama, S.; Testa, G.; Colburn, T.; Mashburn, C.; Willis, W.; Tournade, L.; Burch, J.; Stackhouse, J.

(7) Wilson, J.; Young, J.; Marshall, E.; Rozas, M.; Knaller, J.; Hotti, N.; Rosenström, A.; Sopel, J.; Bonilla, O.