Mahungu Lamanene Hi Tindzimi Ta 500

HI NKARHI wa nyimpi ya xin’wana-manana eRwanda, ntlawa lowutsongo wa vahundzuluxeri wu baleke emakaya ivi wu siya nhundzu ya wona. Hambiswiritano, wu swi kotile ku teka tikhompyuta ta wona, wu famba na tona etikampeni ta vahlapfa. Ha yini? Leswaku wu ta hambeta wu hundzuluxela minkandziyiso leyi sekeriweke eBibeleni hi ririmi ra Xikinyarwanda.

Wansati la ha riki muntshwa wa le Dzonga-vuxa bya Asia u tirhe hi khompyuta yakwe kukondza ku va vusiku naswona a a tirha a karhele endhawini yo hisa naswona gezi a ri tshamela ku famba ivi ri kavanyeta ntirho wakwe wo hundzuluxela. Xana pakani ya yena a ku ri yini? A a lava leswaku swilo leswi a a swi hundzuluxela swi kandziyisiwa ka ha ri ni nkarhi.

Vahundzuluxeri lava, i ntlawa wa vahundzuluxeri va kwalomu ka 2 300 lava tirhaka etindhawini leti tlulaka 190 emisaveni hinkwayo. Va ni malembe lama sukelaka eka 20 ku ya eka ya kwalomu ka 90 naswona va tirha hi matimba swinene leswaku vanhu va kuma rungula leri chavelelaka ra le Bibeleni hi tindzimi ta 500.—Nhlavutelo 7:9.

Ku Fikelela Vanhu Va Tindzimi To Tala

Emalembeni ya sweswinyana, ntirho wo hundzuluxela wa Timbhoni ta Yehovha wu andze hi ndlela leyi hlamarisaka swinene. Hi xikombiso, hi 1985, Xihondzo xo Rindza a xi huma hi nkarhi wun’we hi tindzimi ta 23, ku nga ntirho lowu a wu hlamarisa hi nkarhi wolowo. Namuntlha, Xihondzo xo Rindza xi kumeka hi tindzimi ta 176 naswona minkandziyiso hinkwayo ya xona yi huma hi nkarhi wun’we leswaku vahlayi va xona emisaveni hinkwayo va ta kota ku hlaya rungula leri fanaka hi nkarhi wun’we.

Xihondzo xo Rindza hi wona ntsena magazini lowu kandziyisiwaka minkarhi hinkwayo hi tindzimi ta kwalomu ka 50. Ha yini? Hikuva tikhampani leti kandziyisaka tibuku a ti swi rhandzi ku kandziyisa minkandziyiso hi tindzimi leti vulavuriwaka hi vanhu va ndhawu yoleyo. Kambe Timbhoni ta Yehovha emisaveni hinkwayo ti nyikela hi ku tirhandzela leswaku Rito ra Xikwembu ni minkandziyiso leyi sekeriweke eBibeleni yi ta kumiwa hi munhu un’wana ni un’wana loyi a lavaka ku yi hlaya.—2 Vakorinto 8:14.

Vanhu va ri teka ri ri ra nkoka rungula ra Bibele loko va ri twa hi ririmi ra rikwavo. Hi xikombiso, minkandziyiso leyi sekeriweke eBibeleni ya ha ku humesiwa hi Ximiskito, ku nga ririmi leri vulavuriwaka hi vanhu va kwalomu ka 200 000 eNicaragua. Wansati un’wana u kombele buku leyi nge, Buku Yanga Ya Timhaka Ta Bibele * hi Ximiskito naswona loko va n’wi tisela yona, a ku ri ni mufundhisi wa ndhawu ya kwalaho. Loko mufundhisi a vona buku yoleyo yo xonga, u lave leswaku yi va ya yena. Wansati yoloye u arile ku n’wi nyika yona, hambileswi mufundhisi yoloye a a lava ku n’wi nyika kofi leyi ringanaka tikhilogiramu ta 20, leswaku a n’wi nyika buku yoleyo!

 Eka malembe ya khume lama hundzeke, minkandziyiso ya Bibele yi hundzuluxeriwe hi tindzimi leti tlulaka 12 ta le Mexico, leti katsaka Ximaya, Xinahuatl na Xitzotzil. Emalembeni lama nga ehansi ka khume, mavandlha ya Timbhoni ta Yehovha lama tirhisaka tindzimi ta kwalaho swin’we ni ririmi ra mavoko ma andzile ku suka eka 72 ma va mavandlha lama tlulaka 1 200. Timbhoni ta Yehovha ti byala mbewu ya rungula ra Bibele etimbilwini ta vanhu kambe ti tshika Xikwembu leswaku xi kurisa mbewu yoleyo ya ntiyiso.—1 Vakorinto 3:5-7.

Vuhundzuluxeri Bya Bibele Bya Manguva Lawa Hi Tindzimi Ta 80

Emalembeni ya sweswinyana, Timbhoni ta Yehovha ti tirhe hi matimba leswaku ti humesa Bibele leyi vuriwaka Vuhundzuluxeri Bya Misava Leyintshwa Bya Matsalwa Yo Kwetsima yi helerile kumbe yi nga helelanga hi tindzimi ta 80. Xana ku ve ni vuyelo byihi? Loko Mbhoni yin’wana ya laha Afrika Dzonga yi vulavula hi Bibele ya Xitswana yi ri: “Hakunene lexi i xitirhisiwa lexi pfunaka. Xi ta ndzi pfuna leswaku ndzi twisisa naswona ndzi tlangela Rito ra Xikwembu. Ririmi leri tirhisiweke eka xitirhisiwa lexi ra olova ri tlhela ri tsakisa.” Muhlayi un’wana la hlayaka Xitsonga wa le Mozambhiki u ri: “Hambiloko hi ri ni minkandziyiso hinkwayo leyi sekeriweke eBibeleni, ku nga vi ni Bibele swi fana ni loko ku ri ni ku dzindza ni rihati kambe ku nga ni mpfula! Hambiswiritano, mpfula yi sungule ku na loko ku humesiwa Bibele ya Vuhundzuluxeri Bya Misava Leyintshwa hi Xitsonga.”

Hi ndlela yo hlamarisa, vahundzuluxeri lava hundzuluxelaka ni ku hangalasa mahungu lamanene lama nga eBibeleni va hetisisa vuprofeta bya khale swinene. Yesu Kreste hi byakwe u te: “Mahungu lamanene lawa ya mfumo ma ta chumayeriwa emisaveni hinkwayo leyi akiweke leswaku byi va vumbhoni ematikweni hinkwawo; kutani hi kona makumu ma nga ta fika.”—Matewu 24:14.

[Nhlamuselo ya le hansi]

[Grafu leyi nga eka tluka 25]

(Leswaku u vona rungula leri hleriweke hi ku helela, vona nkandziyiso wa kona)

VUHUNDZULUXERI BYA MINKANDZIYISO YIN’WANA

MISAVA LEYINTSHWA

Yi helerile kumbe yi

nga helelanga

80 2010 500 2010

36 2000

13 1990 200 1990

190 1980

7 1970 165 1970

125 1960

1 1950 88 1950

NHLAYO YA TINDZIMI

[Swifaniso leswi nga eka tluka 24, 25]

Vahundzuluxeri va ku tirhandzela va kwalomu ka 2 300, va hundzuluxela minkandziyiso ya Bibele hi tindzimi ta 500

BENIN

SLOVENIA

ETHIOPIA

BRITAIN