XANA a wu swi tiva leswaku muapostola Pawulo a a ri ni maxaka lawa a ma ri valandzeri va Yesu? *— Matsalwa ma kombisa leswaku makwavo wakwe wa xisati swin’we ni muzala wakwe a va ri valandzeri va Yesu. Naswona muzala yoloye u ponise vutomi bya Pawulo! A hi ri tivi vito rakwe ni ra mana wakwe, kambe hi tiva leswi a swi endleke. Xana wa swi lava ku swi tiva?—

Pawulo a a ri eYerusalema a ha ku vuya hi le riendzweni rakwe ra vunharhu ra vurhumiwa. Kumbexana a ku ri hi lembe ra 56 C.E. Pawulo a a pfaleriwile naswona a a ta tengisiwa. Kambe valala va Pawulo a va nga swi lavi leswaku a tengisiwa. A va lava leswaku a dlayiwa! Va endle rhengu ra leswaku vavanuna va kwalomu ka 40 va ya n’wi tumbelela endleleni yo ya Khezariya leswaku va ta n’wi dlaya.

Hi ndlela yo karhi, muzala wa Pawulo u twe hi ta rhengu rero. Xana wa swi tiva leswaku u endle yini hi mhaka leyi?— U ye eka Pawulo a ya n’wi byela hi mhaka leyi. Pawulo u nambe a byela ndhuna ya vuthu xikan’we-kan’we a ku: “Yisa jaha leri endhuneni ya nyimpi, hikuva ri ni swo karhi swo yi vikela swona.” Ndhuna ya vuthu yi ri yise eka ndhuna ya nyimpi, Klawudiyo Lisiya, kutani yi hlamusela leswaku jaha rolero ri ni mhaka ya nkoka. Klawudiyo u teke muzala wa Pawulo a ya vulavula na yena exihundleni hiloko a n’wi vikela mhaka ya kona.

Klawudiyo u tsundzuxe muzala wa Pawulo a ku: “U nga byeli munhu leswaku u paluxe swilo leswi eka mina.” Hiloko a vitana tindhuna timbirhi ta vuthu kutani a ti byela leswaku ti lunghisa masocha ya 200, vagadi va tihanci va 70 ni lava hlomeke hi fumu va 200 leswaku va gwirima va ya eKhezariya. Hi awara ya kaye hi vusiku byebyo, vavanuna va 470 va sukile va heleketa Pawulo eKhezariya naswona u fike a hlayisekile eka Felikisi, Ndhuna-nkulu ya Rhoma. Eka papila leri Klawudiyo a ri tsaleleke Felikisi u n’wi byele hi ta makungu yo dlaya Pawulo.

Kutani Vayuda va sindzisiwe ku hlangana na Pawulo ehubyeni ya nawu eKhezariya leswaku va ta vula swihehlo swa vona. Kambe, entiyisweni a va ri hava vumbhoni bya leswaku Pawulo u endle nchumu lowu hoxeke. Hambiswiritano, Pawulo u pfaleriwe ekhotsweni handle ka xivangelo ku ringana malembe mambirhi. Hikwalaho, u kombele ku ya tengisiwa eRhoma hiloko a rhumeriwa kwale.—Mintirho 23:16–24:27; 25:8-12.

 Xana hi nga dyondza yini eka rungula leri malunghana ni muzala wa Pawulo?— Hi dyondza leswaku swi lava xivindzi ku paluxa nchumu lowu vanhu van’wana va faneleke va wu tiva ni leswaku loko hi wu paluxa hi nga ponisa vutomi bya van’wana. Hambileswi Yesu a a swi tiva leswaku valala “a va lava ku n’wi dlaya,” u hambete a byela vanhu hi Mfumo wa Xikwembu. Yesu u hi byele leswaku hi endla nchumu lowu fanaka. Xana hi ta endla tano? Hi ta endla tano loko hi ri ni xivindzi xo fana ni xa muzala wa Pawulo.—Yohane 7:1; 15:13; Matewu 24:14; 28:18-20.

Pawulo u khutaze munghana wakwe Timotiya loyi a ha ri muntshwa a ku: “Nyikela nyingiso lowu hambetaka eka wena ni le ku dyondziseni ka wena. Tshama eka swilo leswi, hikuva hi ku endla tano, u ta tiponisa wena swin’we ni lava va ku yingisaka.” (1 Timotiya 4:16) Hakunene, muzala wa Pawulo u tirhise xikhutazo xo tano lexi a xi kumeke eka malume wakwe. Xana na wena u ta endla tano?