Tshinela Eka Xikwembu

“Xikwembu Xa Nchavelelo Hinkwawo”

2 Vakorinto 1:3, 4

KU NI swilo swo tala evuton’wini leswi nga endlaka leswaku vanhu va va ni gome, swo tanihi ku xaniseka, ku hela matimba ni xivundza. Eminkarhini yo tano u nga ha tivutisa u ku, ‘Xana ndzi nga wu kuma kwihi mpfuno?’ Marito ya muapostola Pawulo lama kumekaka eka 2 Vakorinto 1:3, 4 ma vulavula hi xihlovo lexi tshembekaka xa nchavelelo—Yehovha Xikwembu.

Eka ndzimana ya vunharhu, Xikwembu xi vitaniwa “Tatana la nga ni tintswalo letikulu.” Xana sweswo swi vula yini? Rito ra Xigriki leri hundzuluxeriweke ri va “tintswalo letikulu” ri vula ku va twela vusiwana lava xanisekaka. * Buku yin’wana ya tinhlamuselo ta Bibele yi vula leswaku xiga lexi xi nga ha hundzuluxeriwa xi va “ntwela-vusiwana” kumbe “ku khathala swinene.” “Tintswalo letikulu” ta Xikwembu ti xi susumetela ku teka goza. A swi kanakanisi leswaku ku tiva mfanelo leyi ya Xikwembu swi hi endla hi tshinela eka xona.

Pawulo u tlhele a vula leswaku Yehovha i “Xikwembu xa nchavelelo hinkwawo.” Laha Pawulo u tirhisa rito leri ku vuriwaka leswaku ri vula “ku chavelela munhu loyi a nga emaxangwini ni ku endla swo karhi leswaku u n’wi pfuna kumbe u n’wi khutaza.” Buku yin’wana ya tinhlamuselo ta Bibele yi ri: “Hi chavelela munhu loyi a xanisekaka loko hi n’wi khutaza leswaku a tiyiselela ku vava loku a ku twaka.”—The Interpreter’s Bible.

U nga ha tivutisa, ‘Xana Xikwembu xi hi chavelela hi ndlela yihi naswona xi hi nyika njhani xivindzi xo tiyiselela ku vava loku hi twaka?’ Hakanyingi sweswo xi swi endla hi ku tirhisa Rito ra xona, ku nga Bibele, ni hi ku tirhisa nyiko ya xikhongelo. Pawulo u hi byela leswaku Xikwembu xi hi nyika Rito ra xona leswaku “hi ta va ni ntshembo . . . hikwalaho ka nchavelelo lowu humaka eMatsalweni.” Ku engetela kwalaho, loko hi khongela hi mbilu hinkwayo hi nga va ni “ku rhula ka Xikwembu loku tlulaka miehleketo hinkwayo.”—Varhoma 15:4; Vafilipiya 4:7.

Xana Yehovha u va chavelela ku fikela kwihi vanhu vakwe? Pawulo u vula leswaku Xikwembu xi hi “[chavelela] enhlomulweni wa hina hinkwawo.” (2 Vakorinto 1:4) Ku nga khathariseki ntshikilelo, ku vaviseka ni ku xaniseka loku hi nga ha hlangavetanaka na kona, Xikwembu xi nga hi nyika xivindzi ni matimba lawa hi ma lavaka leswaku hi kota ku tiyisela. Xana sweswo a swi hi chaveleli?

Nchavelelo lowu Xikwembu xi hi nyikaka wona wu hi susumetela ku endla swin’wana. Pawulo u ya emahlweni a vula leswaku Xikwembu xi hi chavelela leswaku “hi ta swi kota ku chavelela lava nga emahlomulweni ya mixaka-xaka hi nchavelelo lowu Xikwembu xi hi chavelelaka ha wona.” Leswi se hi kumeke nchavelelo enhlomulweni wa hina, hi pfuniwa ku va ni ntwela-vusiwana eka van’wana naswona hi susumeteleka ku pfuna lava lavaka mpfuno.

Leswi Yehovha a nga “Xikwembu xa nchavelelo hinkwawo,” a swi vuli swona leswaku u endla leswaku swiphiqo kumbe maxangu ya hina ma hela. Kambe hi nga tiyiseka hi mhaka leyi: Loko hi khongela eka yena leswaku a hi chavelela, a nga hi tiyisa leswaku hi tiyiselela ni ku hlula maxangu man’wana ni man’wana lawa hi nga ha langutanaka na wona evuton’wini. Hakunene Xikwembu xo tano xa ntwela-vusiwana xi faneriwa hi ku gandzeriwa ni ku dzunisiwa.

[Nhlamuselo ya le hansi]