Papila Leri Humaka eTikweni Ra Australia

“Ndzi Ta Tshama eNdzilweni Madyambu Lawa Ndzi Yi Hlaya”

TINDHAWU ta le makaya ta le Australia ti ndzi tsundzuxa makwandzasi, maxelo lama hisaka swinene ni tindhawu letikulu leti nga riki na vaaki. Hambiswiritano, etindhawini toleto ku tshama vanhu va kwalomu ka 180 000, ku nga vanhu lava endlaka phesente yin’we ya vaaki va tiko hinkwaro.

Vatswari va mina lava nga Timbhoni ta Yehovha va tshame va famba na mina va ya chumayela etindhawini toleto loko ndza ha ri ntsongo. Ndzi kokiwe rinoko hi vukulu ni vuxongi bya tona. Ndzi tlhele ndzi tsakela ndlela leyi vaaki va kona va rhuleke ha yona. Leswi sweswi ndzi nga ni ndyangu lowutsongo, ndzi tsakele leswaku nsati wa mina ni vana va hina vambirhi, lava nga ni malembe ya 10 na 12, na vona va ya vona tindhawu toleto.

Ku Lunghiselela Riendzo

Xo sungula hi tshame ehansi hi hlayela ntsengo. Xana a yi ta hi fikisa kwihi mali leyi a hi ri na yona? Xana a hi ta famba nkarhi wo tanihi kwihi? Vatekani ni vachumayeri vambirhi va nkarhi hinkwawo va mahungu lamanene va le vandlheni ra hina va swi tsakerile ku famba na hina. Hi pfumelelane ku teka riendzo leri hi nkarhi wa ku pfala ka swikolo exikarhi ka lembe. Hiloko hi tsalela rhavi ra Timbhoni ta Yehovha ra le Australia leri nga edorobeni ra Sydney hi kombela ndhawu leyi a hi ta ya chumayela eka yona. Hi nyikiwe ndhawu ya le kule swinene ekusuhi na Goondiwindi, ku nga xidorobana xa le makaya lexi nga kwalomu ka 400 wa tikhilomitara evupela-dyambu bya doroba ra Brisbane, laha hi tshamaka kona.

Hi twe leswaku eGoondiwindi ku ni vandlha leritsongo ra Timbhoni ta Yehovha. Wolowo a ku ri nkateko wun’wana. Ku hlangana ni Vakreste-kulorhi a ku ta va nchumu wun’wana lowu tsakisaka eriendzweni ra hina. Hi va bele riqingho hi va byela hi ta riendzo ra hina. Ndlela leyi va hlamuleke ha yona hi ku hiseka yi hi endle hi vona leswaku a va ku langutele hi mahlo-ngati ku fika ka hina.

Emahlweninyana ko va hi teka riendzo ra hina, ntlawa wa hina wu hlanganile wu bula hi ndlela leyinene yo chumayela mahungu lamanene ya Mfumo wa Xikwembu eka vanhu lava tshamaka etindhawini ta le makaya. Ngopfu-ngopfu a hi lava ku xixima ndhavuko ni mikhuva ya vaaki vo sungula va tiko ra Australia lava a hi ta hlangana na vona. Hi xikombiso, tinxaka tin’wana ti teka miganga ya tona yi ri ndhawu ya tona ntsena. Kutani ku nghena emigangeni ya tona u nga rhambiwanga swi kombisa ku nga vi na mahanyelo.

Hi Khoma Ndlela Yo Ya eTindhawini Ta Le Makaya

Siku-nkulu ri hetelele ri fika. Timovha ta hina timbirhi leti a ti tele hi mindzhwalo ti kongome etindhawini ta le makaya. Eku sunguleni hi vone masimu, kambe loko hi ri karhi hi famba hi kongoma eGoondiwindi, hi sungule ku vona rivala leri nga ni byanyi ni mirhi yi nga ri yingani leyi tshamaka yi ri rihlaza. Dyambu ra xixika a ri tlhave kahle exibakabakeni lexi nga riki na mapapa. Endzhakunyana ka tiawara hi fike eGoondiwindi kutani hi hirha tiyindlu leti akiweke hi mapulanga endhawini leyi vanhu va pakaka tikharavhani leswaku va etlela eka tona.

 Hi siku leri landzeleke hi Sonto, dyambu a ri tlhave kahle naswona a ku hunga rimoyana lerinene—maxelo wolawo a ma faneleka leswaku hi ya chumayela. Endhawini leyi, ku hisa ka kona hi nguva ya ximumu ku fika eka 40°C! Ndhawu yo sungula laha hi nga fika hi yima kona hi le mugangeni wa vaaki vo sungula va tiko ra Australia lowu nga kwalomu ka 30 wa tikhilomitara ku suka eGoondiwindi. Hi kombiwe ndlela yo ya eka Jenny, ku nga mukhegula loyi a nga ni timpfu loyi a nga ndhuna ya muganga. U rhiye ndleve loko hi ri karhi hi vulavula na yena hi ku tirhisa Matsalwa naswona u yi amukele hi ntsako buku leyi nge Dyondza Eka Mudyondzisi Lonkulu. * Hiloko a hi pfumelela ku nghena emugangeni wakwe leswaku hi ya chumayela vaaki va kwalaho.

Vana va le mugangeni wolowo va tsutsume emahlweni ka hina va ya va tivisa hi ta riendzo ra hina. Vini va miti hinkwavo lava hi vulavuleke na vona va yingisele rungula ra hina hi xichavo naswona va amukele tibuku leti sekeriweke eBibeleni. Minkandziyiso ya hina yi hele hi ku hatlisa naswona a ku ri nkarhi wo tlhelela edorobeni leswaku hi ya eminhlanganweni ya vandlha. Loko hi nga si suka hi tshembise ku tlhela hi endzela lava hi nga swi kotangiki ku vulavula na vona.

Nhlikanhi wolowo, Holo ya Mfumo a yi tele hi vanhu lava tsakeke lava a va bula ni vanghana va vona lavantshwa. Timbhoni ta kwalaho ta 25 a ti chumayela rungula ra Mfumo hi ku tshembeka eka vanhu va kwalomu ka 11 000 emigangeni leyi loko yi pimiwa yi endlaka 30 000 wa swikwere-khilomitara etindhawini ta le makaya. Mbhoni yin’wana yi te: “Hi nkhensa matshalatshala lawa mi ma endleke ya leswaku mi ta mi ta hi pfuna.” Endzhaku ka minhlangano leyi tsakisaka, hinkwerhu hi dye swakudya hi nwa ni swo tima torha. Loko hi nga si ya eku etleleni evusikwini byebyo, hi phamele swihadyana swa kwalaho leswi vuriwaka ti-possum, leswi a swi tlanga-tlanga endhawini leyi a hi tshama eka yona laha a ku pakiwa tikharavhani.

“ENdzilweni Madyambu Lawa”

Eka masiku mambirhi lama landzeleke, mintlawa ya hina yimbirhi leyi a yi famba hi timovha yi endzele tiyindlu tin’wana leti nga ekule swinene endzilakaneni lowu nga exikarhi ka xifundzha xa Queensland ni xa New South Wales. Tindhawu to tala ta le makaya a ti ri ni mirhi yo koma leyi omeke erivaleni leri nga ni byanyi laha tinyimpfu ni tihomu swi dyaka kona. Loko hi ri endleleni, hi vone ti-kangaroo to hlayanyana leti a ti yimisa tindleve ta tona loko ti hi twa hi hundza. Tinyenyana letikulu to fana ni tinca leti vuriwaka ti-emu a ti rhangise swifuva loko ti ri karhi ti tsemakanya rivala leri tihanci ti tsutsumaka eka rona.

Hi Ravumbirhi nindzhenga hi hlangane ni ntlhambi lowukulu wa tihomu wu ri karhi wu famba egondzweni hi ku nonoka. Swi tolovelekile ku vona vanhu lava tirhaka ku khayima swifuwo va swi rhurhisela endhawini yin’wana, ngopfu-ngopfu hi minkarhi ya dyandza. Hi ku hatlisa hi hlangane ni murisi loyi a a gade hanci yakwe. Ndzi yimise movha etlhelo ka gondzo, kutani ndzi huma ndzi n’wi xeweta. U hlamule a ku, “I nhlikanhi warikwerhu.” Mukhalabye loyi loyi a a ri ni mbyana yakwe leyi a yi n’wi pfuna ku risa tihomu u yimile leswaku hi vulavula.

Endzhaku ko bulanyana na yena hi dyandza, ndzi sungule ku vulavula hi rungula ra hina leri humaka eBibeleni. Mukhalabye yoloye u te, “Ku sukela loko ndzi velekiwile, a ndzi si tshama ndzi twa mhaka leyi humaka eBibeleni!” A a ehleketa leswaku varhangeri va vukhongeri hi vona va endlaka leswaku vanhu va va ni mahanyelo yo biha emisaveni. Hambiswiritano, a a yi xixima swinene Bibele. Endzhaku ka bulo rolero lerinene ra Matsalwa, ndzi n’wi nyike buku leyi nge Xana Bibele Yi Dyondzisa Yini Hakunene? * U yi tekile, a yi hoxa exikhwameni xa hembe yakwe kutani a ku, “Loko yi ndzi byela leswi Bibele yi swi dyondzisaka, ndzi ta tshama endzilweni madyambu lawa ndzi yi hlaya.”

Ku Tlhelela Ekaya

Hi madyambu wolawo loko hi ri eHolweni ya Mfumo hi rungulele Vakreste-kulorhi mintokoto ya hina. Va hi tshembise leswaku va ta tlhelela eka vanhu lava tsakeleke rungula ra hina. Loko minhlangano yi hela, a swi tika ku hambana na vona. Se a hi va rhandza swinene. Hinkwerhu hi titwe hi fuwile hikwalaho ka leswi hi khutazaneke.—Varhoma 1:12.

Hi siku leri landzelaka hi tlhelele ekaya. Loko hi anakanya hi riendzo ra hina, ha pfumela leswaku Yehovha u ma katekise swinene matshalatshala ya hina. Hi titwe hi ri ekusuhi na Yehovha. Loko hi fika ekaya, ndzi vutise vana ndzi ku: “Xana mi lava hi endzela kwihi enkarhini lowu taka? Xana mi lava leswaku hi ya khandziya tintshava?” Va hlamule va ku, “E-e Tatana, hi lava ku tlhela hi ya chumayela etindhawini ta le makaya.” Nsati wa mina na yena u hlamule a ku: “Va vurisile, a hi tlheleleni etindhawini ta le makaya. A ku ri riendzo ro tsakisa ku tlula hinkwawo lawa hi nga tshama hi va na wona!”

[Tinhlamuselo ta le hansi]