1. Hi yihi mfanelo leyikulu ya Xikwembu, naswona ku tiva mfanelo yoleyo swi ku endla u titwa njhani hi xona?

BIBELE yi hi byela leswaku “Xikwembu i rirhandzu.” (1 Yohane 4:8) Kambe, xana leswi swi vula yini? Rirhandzu a ko va yin’wana ya timfanelo ta Yehovha letinene ntsena. I mfanelo yakwe leyikulu. A ngo va na rirhandzu ntsena. I rirhandzu. Rirhandzu ri kongomisa hinkwaswo leswi a swi endlaka. Hakunene ha swi tlangela leswi rirhandzu ri susumeteleke Yehovha leswaku a vumba vuako hinkwabyo ni swilo hinkwaswo leswi hanyaka!

2. Rirhandzu ra Xikwembu ri hi tiyisekisa hi yini? (Vona xifaniso lexi nga eku sunguleni ka xihloko lexi.)

² Yehovha u ni musa ni ntwelavusiwana eka swivumbiwa swakwe. Rirhandzu rakwe ra hi tiyisekisa leswaku xikongomelo xakwe hi vanhu xi ta hetiseka hi ndlela leyikulu. Loko xi hetisekile lava n’wi yingisaka va ta kuma ntsako wa xiviri. Hi xikombiso, hikwalaho ka rirhandzu, Yehovha u “veke siku leri [a] nga ni xikongomelo xo avanyisa misava leyi akiweke hi ku lulama hi wanuna loyi [a] n’wi vekeke,” ku nga Yesu Kreste. (Mintirho 17:31) Ha tiyiseka leswaku  ku avanyisa loku ku ta va kona. Eka vanhu lava yingisaka, ku avanyisa koloko ku ta endla leswaku va va ni vumundzuku lebyinene bya hilaha ku nga heriki.

3. Vutomi a byi ta va njhani loko Xikwembu a xi nga va rhandzi vanhu?

³ Vumundzuku bya vanhu a byi ta va njhani loko rirhandzu a ku nga ri mfanelo ya Xikwembu leyikulu? Vanhu a va ta ya emahlweni va fuma van’wana naswona a va ta kuceteriwa hi xikwembu lexi nga riki na rirhandzu, ku nga Sathana. (2 Vakorinto 4:4; 1 Yohane 5:19; hlaya Nhlavutelo 12:9, 12.) Vumundzuku a byi ta va lebyi chavisaka loko Yehovha a a nga hi rhandzi!

4. Ha yini Yehovha a pfumelele ku xandzuka ku lwisana ni ku fuma ka yena evuakweni hinkwabyo?

⁴ Loko Sathana a xandzukela vulawuri bya Xikwembu, u tlhele a kucetela vatswari va hina leswaku na vona va xandzuka. U kanakane mfanelo ya Xikwembu yo fuma Vuako Hinkwabyo. Sathana u vule leswaku yena a a ta fuma vanhu ku antswa ku tlula Xikwembu. (Genesa 3:1-5) Hi vutlhari, Yehovha u pfumelele Sathana swa xinkarhana leswaku a kombisa loko leswi a swi vuleke ku ri ntiyiso. Kambe leswi endlekaka swi swi kombisa kahle leswaku vanhu kumbe Sathana a va nge swi koti ku va vafumi lavanene.

5. I yini leswi matimu ya vanhu ma swi kombiseke kahle?

⁵ Namuntlha misava yi ya yi nyanya ku biha. Vanhu vo tlula 100 wa timiliyoni va dlayiwile etinyimpini eka malembe ya 100 lama hundzeke. Bibele yi vula leswi malunghana ni ‘masiku yo hetelela’: “Vanhu vo homboloka ni vaxisi va ta ya emahlweni va nyanya evubihini bya vona.” (2 Timotiya 3:1, 13) Bibele yi tlhela yi ku: “Oho Yehovha, ndzi swi tiva kahle leswaku ndlela ya munhu wa la misaveni a yi le ka yena. Munhu loyi a fambaka a nga ka a nga wu kongomisi nkondzo wa yena.” (Yeremiya 10:23) Matimu ma swi kombise kahle leswaku marito wolawo i ntiyiso. Yehovha a nga vumbanga vanhu va ri ni vuswikoti kumbe mfanelo yo tifuma handle ka nkongomiso wakwe.

6. Ha yini Xikwembu xi pfumelele vuhomboloki?

⁶ Hi ku pfumelela vubihi leswaku byi ya emahlweni ku ringana nkarhi wo karhi, Yehovha u tlhele a kombisa leswaku i mfumo wakwe ntsena lowu nga ta humelela. Enkarhini lowu taka, Xikwembu xi ta herisa vubihi hinkwabyo. Endzhaku ka sweswo, loko un’wana a tshuka a lwisana ni ndlela yakwe ya rirhandzu yo fuma, xi ta teka goza hi nkarhi wolowo. Xi ta tirhisa matimu ya vanhu ku kombisa leswaku ku xandzuka koloko ku fanele ku susiwa hi ku hatlisa. Vuhomboloki a byi nge he tlheli byi pfumeleriwa.

7, 8. Yehovha u ri kombise njhani rirhandzu rakwe?

⁷ Yehovha u kombise rirhandzu ra yena lerikulu hi tindlela to tala. Anakanya hi mpimo ni ku saseka ka vuako bya hina. Byi ni swirimele swa tibiliyoni naswona xirimele ha xin’we xi ni tinyeleti ni tipulanete ta tibiliyoni. Eka xirimele xa hina xa Milky Way, yin’wana ya tinyeleti i dyambu. Handle ka dyambu, swivumbiwa leswi hanyaka a swi nga ta va kona emisaveni. Swilo leswi hinkwaswo swi kombisa leswaku Yehovha i Muvumbi wa hina naswona swi kombisa timfanelo takwe to tanihi matimba, vutlhari ni rirhandzu. “Timfanelo ta [Xikwembu] leti nga  vonakiki ta voniwa ku sukela loko misava yi tumbuluxiwile ku ya emahlweni, hikuva ti xiyeka hi swilo leswi endliweke, ni hi matimba ya xona lama nga riki na makumu ni Vukwembu bya xona.”—Varhoma 1:20.

⁸ Yehovha u endle misava hi xikongomelo xa leswaku ku hanyiwa eka yona. Swilo hinkwaswo leswi nga laha misaveni swi vuyerisa vanhu ni swiharhi. Xikwembu xi endle ntanga wo saseka leswaku ku va kaya leri vanhu va nga ta tshama eka rona xi tlhela xi va nyika mianakanyo leyi hetisekeke ni mimiri leyi vumberiweke ku hanya hilaha ku nga heriki. (Hlaya Nhlavutelo 4:11.) Ku engetela kwalaho, ‘xi nyika nyama hinkwayo swakudya: hikuva musa wa xona wa rirhandzu i wa hilaha ku nga riki na makumu.’—Pisalema 136:25.

9. Hambileswi Yehovha a nga Xikwembu lexi nga ni rirhandzu, i yini leswi a swi vengaka?

⁹ Yehovha i Xikwembu xa rirhandzu, hikwalaho wa swi venga swilo swo biha. Hi xikombiso, Pisalema 5:4-6 yi vula leswi hi Yehovha: “A wu Xikwembu lexi tsakisiwaka hi vuhomboloki . . . Wa va venga hinkwavo lava hanyaka hi swo biha.” U tlhela a venga “munhu la halataka ngati ni wa vuxisi.”

10, 11. (a) Ku ta endleka yini eka vanhu lavo homboloka? (b) Yehovha u ta va hakela njhani vanhu lava yingisaka?

¹⁰ Hi nkarhi lowu faneleke, Yehovha u ta susa vuhomboloki emisaveni hinkwayo hikuva i Xikwembu xa rirhandzu naswona u venga leswo biha. Rito ra Xikwembu ri hi tshembisa leswi: “Hikuva lava endlaka swo biha va ta herisiwa, kambe lava tshembaka Yehovha hi vona lava nga ta dya ndzhaka ya misava. Hi nkarhinyana, lowo homboloka a nge he vi kona.” Valala va Yehovha “va fanele va herisiwa hi musi.”—Pisalema 37:9, 10, 20.

¹¹ Rito ra Xikwembu ri tlhela ri hi tshembisa leswaku: “Lavo lulama va ta dya ndzhaka ya misava, va ta tshama eka yona hi masiku.” (Pisalema 37:29) Vanhu vo tshembeka “va ta kuma ntsako lowu heleleke eku rhuleni lokukulu.” (Pisalema 37:11) Ha yini? Hikuva Xikwembu xa hina xa rirhandzu xi endlela malandza ya xona yo tshembeka leswinene. Bibele yi ri: “Xi ta sula mihloti hinkwayo ematihlweni ya vona, rifu a ri nge he vi kona, hambi ku ri ku kolola, ni xirilo ni xitlhavi a swi nge he vi kona. Swilo swo sungula swi hundzile.” (Nhlavutelo 21:4) Mayana vumundzuku lebyinene lebyi nga ta kumiwa hi vanhu vo tshembeka lava tlangelaka rirhandzu ra Xikwembu!

12. I mani loyi a “pfumalaka xisandzu”?

¹² Bibele yi ri: “Languta la pfumalaka xisandzu naswona u vona la lulameke, hikuva vumundzuku bya munhu yoloye byi ta va ni ku rhula. Kambe lava tlulaka nawu kunene va ta lovisiwa swin’we; vumundzuku bya lavo homboloka byi ta herisiwa hakunene.” (Pisalema 37:37, 38) “La pfumalaka xisandzu” u ta tiva Yehovha ni N’wana wakwe naswona u kombisa ku yingisa hi ku endla ku rhandza ka Xikwembu. (Hlaya Yohane 17:3.) U tiyimisela ku pfumela leswaku “misava ya hundza ni ku navela ka yona, kambe loyi a endlaka ku rhandza ka Xikwembu u tshama hi masiku.” (1 Yohane 2:17) Hikuva makumu ya misava ma le kusuhi, i swa xihatla leswaku hi “tshemba Yehovha [hi] hlayisa ndlela yakwe.”—Pisalema 37:34.

13. A ku ri xihi xikombiso lexikulu xa rirhandzu ra Xikwembu?

¹³ Hambileswi hi nga hetisekangiki, hi nga yingisa Xikwembu. Hi nga tlhela hi va ni vuxaka lebyikulu na Yehovha hikwalaho ka gandzelo ra nkutsulo ra Yesu, loyi a nga xikombiso lexikulu xa rirhandzu ra Xikwembu. Yehovha u nyikele hi nkutsulo leswaku vanhu lava yingisaka va ta kuma lunghelo ro ntshunxiwa eka xidyoho ni rifu. (Hlaya Varhoma 5:12; 6:23.) Yesu a a tshembekile eka Xikwembu ku ringana nkarhi wo leha etilweni, kutani Yehovha a a tiyiseka leswaku N’wana wakwe u ta tshama a tshembekile loko a ri laha misaveni. Tanihi Tatana wa rirhandzu, Yehovha u twe ku vava loko a vona vanhu va khoma N’wana wakwe hi ndlela yo biha. Kutani, Yesu u seketele mfanelo ya Xikwembu yo fuma hi ku tshembeka naswona u kombise leswaku munhu la hetisekeke a nga tshama a tshembekile eka Xikwembu hambi loko a ri eswiyin’weni swo tika.

14, 15. Rifu ra Yesu ri va endlele yini vanhu?

¹⁴ Ku nga khathariseki miringo leyikulu leyi Yesu a langutaneke na yona, u tshame a tshembekile ni ku seketela mfanelo ya Yehovha yo fuma. Hi fanele hi kombisa ku tlangela hi leswi hi rifu ra yena, Yesu a hakeleke nkutsulo hikuva wu nyika vanhu lunghelo ro hanya hi laha ku nga heriki emisaveni leyintshwa ya Xikwembu! Muapostola Pawulo u hlamusele rirhandzu leri Yehovha na Yesu va ri kombiseke hikwalaho ka nkutsulo. U te: “Kunene, loko ha ha tsanile, Kreste, u fele vanhu lava nga xiximiki Xikwembu hi nkarhi lowu vekiweke. Hikuva a nga kona loyi a nga felaka munhu la lulameke; kunene, kumbexana un’wana a nga ha xinyata a fela munhu lonene. Kambe Xikwembu xi tiyisekisa rirhandzu ra xona n’wini eka hina, hileswi Kreste a hi feleke, loko ha ha ri vadyohi.” (Varhoma 5:6-8) Muapostola Yohane u tsarile: “Rirhandzu ra Xikwembu ri kombisiwile eka hina, hileswi Xikwembu xi rhumeke N’wana wa xona la tswariweke a ri swakwe emisaveni leswaku hi ta kuma vutomi ha yena. Rirhandzu ri tise xileswi, ku nga  ri leswaku hina hi rhandze Xikwembu, kambe xona xi hi rhandzile kutani xi rhuma N’wana wa xona a va gandzelo ra ku vuyelelana ra swidyoho swa hina.”—1 Yohane 4:9, 10.

¹⁵ Yesu u vule leswaku “Xikwembu xi rhandze misava swinene xi kala xi nyikela hi N’wana wa xona la tswariweke a ri swakwe, leswaku un’wana ni un’wana loyi a kombisaka ripfumelo eka yena a nga lovisiwi kambe a va ni vutomi lebyi nga heriki.” (Yohane 3:16) Hambileswi Yehovha a a twa ku vava, u nyikele hi N’wana wakwe tanihi nkutsulo. Leswi swi kombisa ndlela leyi a rhandzaka vanhu ha yona. Naswona rirhandzu rolero i ra hilaha ku nga heriki. Pawulo u tsarile: “Ndza kholwa leswaku rifu ni vutomi ni tintsumi ni tihulumendhe ni swilo leswi nga laha sweswi ni swilo leswi taka ni vaungameri ni vutlakuki ni vuenti ni xivumbiwa xihi ni xihi xin’wana a swi nge swi koti ku hi hambanisa ni rirhandzu ra Xikwembu leri nga eka Kreste Yesu Hosi ya hina.”—Varhoma 8:38, 39.

16. I yini Mfumo wa Mesiya naswona i vamani lava Yehovha a va hlawuleke leswaku va fuma eka wona?

¹⁶ Mfumo wa Xikwembu, ku nga Mfumo wa Mesiya na wona wu kombise ndlela leyi Yehovha a rhandzaka vanhu ha yona. Njhani? Yehovha se u veke Mufumi loyi a rhandzaka vanhu naswona wa faneleka leswaku a fuma, ku nga Yesu Kreste. (Swivuriso 8:31) Xikwembu xi hlawule vanhu va 144 000 leswaku va fuma na Kreste etilweni. Loko va pfuxeriwa etilweni, va va va ha ri ni ntokoto wa leswi ku va munhu wa nyama swi nga xiswona. (Nhlavutelo 14:1) Loko Yesu a ha ri laha misaveni, Mfumo wa Xikwembu a ku ri nhlokomhaka leyi a a dyondzisa ha yona naswona u dyondzise vadyondzisiwa vakwe ku khongela va ku: “Tata wa hina la nge matilweni, vito ra wena a ri kwetsimisiwe. Mfumo wa wena a wu te. Ku rhandza ka wena a ku endleke emisaveni, hilaha ku endlekaka hakona etilweni.” (Matewu 6:9, 10) Hi swi langutele hi mahlongati ku hetiseka ka swikhongelo swo tano loko Mfumo wa Xikwembu wu tisela vanhu mikateko yo tala!

17. Pimanisa ndlela leyi Yesu a fumaka ha yona ni leyi vanhu va fumaka ha yona.

¹⁷ Ku ni ku hambana lokukulu exikarhi ka ndlela ya rirhandzu leyi Yesu a fumaka ha yona ni le ka ndlela leyi vanhu va fumaka ha yona. Ku fuma ka vanhu ku endle leswaku ku va ni tinyimpi leti dlayeke timiliyoni ta vanhu. Kambe Yesu, Mufumi wa hina wa hi rhandza hakunene naswona u tekelela timfanelo ta Xikwembu letinene, ngopfungopfu rirhandzu. (Nhlavutelo 7:10, 16, 17) Yesu u te: “Tanani eka mina, n’wina hinkwenu lava tirhaka hi matimba ni lava tikeriwaka, ndzi ta mi phyuphyisa. Tlhandlekani joko ra mina ehenhla ka n’wina mi tlhela mi dyondza eka mina, hikuva ndzi ni moya wo rhula ni mbilu yo titsongahata, kutani mi ta kumela mimoya-xiviri ya n’wina ku phyuphya. Hikuva joko ra mina ra olova ni ndzhwalo wa mina wa vevuka.” (Matewu 11:28-30) Hakunene xexo i xitshembiso lexi kombisaka rirhandzu!

18. (a) I yini leswi endlekeke ku sukela hi 1914? (b) I yini leswi hi nga ta swi tlhuvutsa exihlokweni lexi landzelaka?

¹⁸ Bibele yi kombisa leswaku Mfumo wa Xikwembu wu sungule ku fuma etilweni hi 1914. Ku sukela kwalaho, a ku hlengeletiwa swirho leswi a swi sele leswi a swi ta fuma na Yesu etilweni ni “ntshungu lowukulu” wa vanhu lava nga ta pona makumu ya mafambiselo lawa ya swilo kutani va nghena emisaveni leyintshwa. (Nhlavutelo 7:9, 13, 14) Xana namuntlha ntshungu wolowo wu kule ku fikela kwihi? I yini leswi Xikwembu xi swi languteleke eka wona? Xihloko lexi landzelaka xi ta tlhuvutsa swivutiso leswi.