Yehovha U Hi Hlayisela Leswaku Hi Ponisiwa
Yehovha U Hi Hlayisela Leswaku Hi Ponisiwa
‘N’wina mi hlayisiwa hi matimba ya Xikwembu hi ripfumelo leswaku mi kuma ku ponisiwa loku lungheleke ku hlavuteriwa enkarhini wo hetelela.’—1 PET. 1:4, 5.
U NGA HLAMULA NJHANI?
Yehovha u hi kokela evugandzerini bya ntiyiso hi ndlela yihi?
Hi nga n’wi pfumelela njhani Yehovha leswaku a hi kongomisa hi ndzayo yakwe?
Yehovha u hi nyika xikhutazo hi ndlela yihi?
1, 2. (a) Hi xihi xitiyisekiso lexi hi nga na xona xa leswaku Xikwembu xi ta hi pfuna leswaku hi tshama hi tshembekile? (b) Yehovha u n’wi tiva kahle ku fikela kwihi un’wana ni un’wana wa hina?
“LOYI a tiyiseleke ku fika emakumu hi yena la nga ta ponisiwa.” (Mat. 24:13) Hi marito wolawo, Yesu u swi veke erivaleni leswaku hi fanele hi tshama hi tshembekile ku fika emakumu leswaku Xikwembu xi ta hi ponisa loko xi lovisa misava leyi ya Sathana. Kambe leswi a swi vuli swona leswaku xi langutele leswaku hi tiyisela hi ku tirhisa vutlhari kumbe matimba ya hina. Bibele ya hi tiyisekisa: “Xikwembu xa tshembeka, a xi nge mi tshiki mi ringiwa hi ndlela leyi tlulaka leswi mi nga swi tiyiselaka, kambe loko mi ringiwa xi ta mi nyika ndlela yo huma, leswaku mi kota ku swi tiyisela.” (1 Kor. 10:13) Ma vula yini marito wolawo?
2 Yehovha a nga swi pfumeleli leswaku hi ringiwa hi ndlela leyi hi nga ta ka hi nga koti ku yi tiyiselela hikuva u hi tiva hi ku helela, ku katsa ni swiphiqo swa hina, vumunhu bya hina nileswaku hi nga tiyisela ku fikela kwihi. Xana Xikwembu xi hi tiva hi ku helela hakunene? Ina. Matsalwa ma hi byela leswaku Yehovha u tiva un’wana ni un’wana wa hina hi ku helela. U tiva leswi hi swi endlaka siku ni siku hambi ku ri leswi nga emiehleketweni ni le timbilwini ta hina.—Hlaya Pisalema 139:1-6.
3, 4. (a) Leswi humeleleke Davhida swi swi kombisa njhani leswaku Yehovha wa khathala hi un’wana ni un’wana wa hina? (b) Hi wihi ntirho wo hlawuleka lowu Yehovha a wu endlaka namuntlha?
3 Xana hakunene Xikwembu xa Matimba Hinkwawo xa khathala hi vanhu va xiyimo xa le hansi hi ndlela yo tano? Endzhaku ka loko mupisalema Davhida a ehleketisise hi xivutiso lexi, u byele Yehovha marito lama nge: “Loko ndzi vona matilo ya wena, mintirho ya tintiho ta wena, n’weti ni tinyeleti leswi u swi lunghiseleleke, xana munhu wa nyama wo va yini lerova u nga n’wi anakanya?” (Ps. 8:3, 4) Kumbexana u vutise xivutiso lexi hikwalaho ka leswi swi n’wi humeleleke. Loko Davhida, rikotse ra Yese, a ha ri xifanyetana, Yehovha u n’wi teke a ri “wanuna la amukelekaka embilwini yakwe” naswona u n’wi hlawule ‘laha a a risa kona ntlhambi, leswaku a va murhangeri’ wa Israyele. (1 Sam. 13:14; 2 Sam. 7:8) Ehleketa ndlela leyi Davhida a faneleke a titwe ha yona loko a xiya leswaku Muvumbi wa vuako hinkwabyo u tiva miehleketo ni mintlhaveko yakwe hambileswi a ha ri xifanyetana lexi nga murisi ntsena!
4 Nakambe ya hlamarisa ndlela leyi Yehovha a khathalaka ha yona hi un’wana ni un’wana wa hina namuntlha. U hlengeleta “swilo leswi navelekaka swa matiko hinkwawo” evugandzerini bya ntiyiso naswona u pfuna malandza yakwe leswaku ma tshama ma tshembekile. (Hag. 2:7) Leswaku hi yi twisisa kahle ndlela leyi Yehovha a hi pfunaka ha yona leswaku hi tshama hi tshembekile, a hi kambisiseni ndlela leyi a kokaka vanhu ha yona leswaku va nghena evugandzerini bya ntiyiso.
U KOKIWE HI XIKWEMBU
5. Yehovha u va koka njhani vanhu leswaku va ya eka N’wana wakwe? Nyika xikombiso.
5 Yesu u te: “Ku hava munhu loyi a nga taka eka mina handle ka loko Tatana, loyi a ndzi rhumeke, a n’wi koka.” (Yoh. 6:44) Marito wolawo ma kombisa leswaku ku va hi va vadyondzisiwa va Kreste, hi fanele hi pfuniwa hi Xikwembu. Yehovha u va koka njhani vanhu lava fanaka ni tinyimpfu leswaku va ya eka N’wana wakwe? U tirhisa ntirho wo chumayela mahungu lamanene ni moya wakwe lowo kwetsima. Hi xikombiso, loko Pawulo ni varhumiwa-kulobye va ri eFilipiya, va hlangane ni wansati loyi a vuriwaka Lidiya naswona va sungule ku n’wi chumayela mahungu lamanene. Bibele yi ri: “Yehovha a pfula mbilu yakwe swinene leswaku yi nyikela nyingiso eka swilo leswi vuriwaka hi Pawulo.” Xikwembu xi tirhise moya wa xona leswaku xi n’wi pfuna a twisisa ni ku amukela rungula leri a ri chumayeriwa naswona sweswo swi endle leswaku yena ni ndyangu wakwe va khuvuriwa.—Mint. 16:13-15.
6. Xikwembu xi hi koke njhani leswaku hi nghena evugandzerini bya ntiyiso?
6 Xana leswi swi endleke eka Lidiya ntsena? Nikatsongo. Loko u ri Mukreste loyi a tinyiketeleke, na wena Xikwembu xi ku kokele evugandzerini bya ntiyiso. Tanihi leswi Tata wa hina wa le tilweni a voneke nchumu wa risima embilwini ya Lidiya, ni le ka wena u vone nchumu lowunene. Loko u sungula ku yingisela mahungu lamanene, Yehovha u tirhise moya wakwe lowo kwetsima leswaku wu ku pfuna u ma twisisa ni ku ma amukela. (1 Kor. 2:11, 12) Loko u tikarhatele ku tirhisa leswi a a wu swi dyondza, U katekise matshalatshala ya wena yo lava ku endla ku rhandza kakwe. Loko u nyiketele vutomi bya wena eka yena, mbilu yakwe yi tsakile. Entiyisweni, Yehovha wa ku pfuna ku sukela loko u sungule ku n’wi tirhela ku ta fikela sweswi.
7. Hi swi tivisa ku yini leswaku Xikwembu xi ta hi pfuna leswaku hi tshama hi tshembekile?
7 Leswi Yehovha a hi pfuneke leswaku hi sungula ku n’wi tirhela, hi nga tiyiseka leswaku u ta hambeta a hi pfuna leswaku hi tshama hi tshembekile. Wa swi tiva leswaku tanihi leswi hi nga nghenangiki entiyisweni hikwalaho ka vutlhari bya hina vini, a hi nge swi koti ku tshama entiyisweni hi vutlhari bya hina. Loko muapostola Petro a tsalela Vakreste lava totiweke u te: ‘N’wina mi hlayisiwa hi matimba ya Xikwembu hi ripfumelo leswaku mi kuma ku ponisiwa loku lungheleke ku hlavuteriwa enkarhini wo hetelela.’ (1 Pet. 1:4, 5) Marito wolawo ma tirha eka Vakreste hinkwavo naswona un’wana ni un’wana wa hina namuntlha u fanele a ma tekela enhlokweni. Ha yini? Hikuva hinkwerhu hi lava mpfuno wa Xikwembu leswaku hi tshama hi tshembekile eka xona.
XIKWEMBU XI N’WI SIVELE KU TEKA GOZA LERI HOXEKE
8. Ha yini hi fanele hi tivonela leswaku hi nga teki goza leri hoxeke?
8 Swiphiqo swa vutomi ni ku nga hetiseki ka hina swi nga endla leswaku hi nga languti swilo hi ndlela leyi Yehovha a swi langutaka ha yona ivi hi va ekhombyeni ro teka goza leri hoxeke handle ko swi xiya. (Hlaya Vagalatiya 6:1.) Sweswo swi tshame swi endleka eka Davhida.
9, 10. Yehovha u n’wi sivele njhani Davhida leswaku a nga teki goza leri hoxeke naswona i yini leswi A hi endlelaka swona namuntlha?
9 Loko Davhida a ri karhi a hlotiwa hi Hosi Sawulo lowa mavondzo, Davhida u tikhomile leswaku a nga rihiseli. (1 Sam. 24:2-7) Kambe eka xiendlakalo xin’wana lexi humeleke endzhakunyana ka kwalaho, Davhida u tsandzekile ku tikhoma. Siku rin’wana a a lavela vavanuna vakwe swakudya naswona hi xichavo u ye a ya swi kombela eka Muisrayele-kulobye loyi a a vuriwa Nabali. Kambe Nabali u n’wi rhuketerile naswona sweswo swi n’wi hlundzukise ngopfu Davhida lerova a lava ku tirihisela eka vavanuna hinkwavo va yindlu ya Nabali, a rivala leswaku loko o dlaya vanhu lava nga riki na nandzu a a ta va ni nandzu wa ngati eka Xikwembu. Kambe Abigayele, nsati wa Nabali, u nghenelerile xisweswo a sivela Davhida ku endla xidyoho xexo lexikulu. Leswi Davhida a xiyeke leswaku Yehovha u tirhise Abigayele leswaku a n’wi sivela, u byele Abigayele a ku: “A a dzunisiwe Yehovha Xikwembu xa Israyele loyi a ku rhumeke esikwini leri leswaku u ta hlangana na mina! Nakambe a ku katekisiwe ku twisisa ka wena, a ku katekisiwe wena u nga ndzi sivela esikwini leri leswaku ndzi nga vi na nandzu wa ngati ni ku endla leswaku voko ra mina ri ndzi ponisa.”—1 Sam. 25:9-13, 21, 22, 32, 33.
10 Hi nga dyondza yini emhakeni leyi? Yehovha u tirhise Abigayele ku sivela Davhida leswaku a nga teki goza leri hoxeke. U endla tano ni le ka hina namuntlha. Kambe a hi fanelanga hi langutela leswaku Xikwembu xi ta rhumela munhu leswaku a ta hi sivela nkarhi wun’wana ni wun’wana loko hi ri kusuhi ni ku endla xihoxo; hambi ku ri ku tibyela leswaku ha swi tiva hi ku kongoma leswi Xikwembu xi nga ta swi endla eswiyin’weni swo karhi kumbe leswi xi nga ta swi pfumelela swi endleka leswaku ku hetiseka xikongomelo xa xona. (Ekl. 11:5) Nilokoswiritano, hi nga tiyiseka leswaku minkarhi hinkwayo Yehovha u tiva swiyimo swa hina naswona u ta hi pfuna leswaku hi tshama hi tshembekile eka yena. Wa hi tshembisa: “Ndzi ta endla leswaku u va ni ku twisisa naswona ndzi ku letela hi ndlela leyi u faneleke u famba ha yona. Ndzi ta ku tsundzuxa ndzi veke tihlo ra mina ri ri ehenhla ka wena.” (Ps. 32:8) Yehovha u hi tsundzuxa njhani? Swi nga hi vuyerisa njhani switsundzuxo swakwe? Naswona hi nga tiyiseka njhani leswaku Yehovha u kongomisa vanhu vakwe namuntlha? Xiya ndlela leyi swivutiso sweswo swi hlamuriwaka ha yona ebukwini ya Nhlavutelo.
VA SIRHELERIWE HI NDZAYO
11. Yehovha u swi tiva kahle ku fikela kwihi leswi endlekaka emavandlheni ya vanhu vakwe?
11 Exivon’weni lexi tsariweke eka Nhlavutelo ndzima ya vumbirhi ni ya vunharhu, Yesu Kreste u kambele mavandlha ya nkombo ya le Asia Minor. U vone swiyimo swo karhi eka wona, ku nga ri mikhuva leyi tolovelekeke ntsena. U boxe swilo leswi a swi humelela naswona u kale a vula ni mavito ya vanhu vo karhi. U tlhele a bumabumela ni ku tshinya vandlha ha rin’we hilaha a swi laveka hakona. Xivono lexi xi vula yini? Mavandlha ya nkombo ma fanekisela Vakreste lava totiweke endzhaku ka 1914 naswona hambileswi ndzayo leyi Kreste a yi nyikeleke a yi kongomisiwe eka vatotiwa, mavandlha hinkwavo ya vanhu va Xikwembu emisaveni namuntlha ma nga vuyeriwa eka yona. Kutani hi nga vula leswaku Yehovha u tirhisa N’wana wakwe leswaku a kongomisa vanhu Vakwe. Hi nga vuyeriwa njhani eka nkongomiso wolowo?
12. Hi nga n’wi pfumelela njhani Yehovha leswaku a hi kongomisa?
12 Ndlela yin’wana leyi hi nga vuyeriwaka ha yona eka nkongomiso wa rirhandzu wa Yehovha i ku va ni dyondzo ya munhu hi yexe. Yehovha u hi nyika switsundzuxo swo tala hi ku tirhisa minkandziyiso ya hlonga ro tshembeka ni ro tlhariha. (Mat. 24:45) Hambiswiritano, leswaku switsundzuxo sweswo swi hi vuyerisa, hi fanele hi tinyika nkarhi wo swi hlaya hi tlhela hi swi tirhisa evuton’wini bya hina. Dyondzo ya munhu hi yexe i ndlela yin’wana leyi Yehovha a hi ‘hlayisaka ha yona leswaku hi nga khuguriwi hi wa.’ (Yudha 24, Bibele—Mahungu Lamanene) Xana u tshame u hlaya mhaka yo karhi eminkandziyisweni ya hina leyi tikombaka onge yi tsaleriwe wena hi ku kongoma? Yi amukele tanihi ndzayo leyi humaka eka Yehovha. Ku fana ni munghana loyi a nga ku khwenutaka ekatleni leswaku a ku xalamukisa hi nchumu wo karhi, Yehovha a nga tirhisa moya wakwe leswaku a ku lemukisa hi mhaka yo karhi leyi u faneleke u yi lulamisa eka mahanyelo kumbe eka vumunhu bya wena. Loko hi amukela nkongomiso wa moya lowo kwetsima hi kombisa leswaku hi pfumelela Yehovha leswaku a hi kongomisa. (Hlaya Pisalema 139:23, 24.) Xisweswo, a hi kambisiseni ndlela leyi hi antswisaka dyondzo ya hina ha yona.
13. Ha yini ku ri vutlhari ku kambisisa nkarhi lowu hi wu hetaka eka dyondzo ya hina ya munhu hi yexe?
13 Ku heta nkarhi wo tala eka vuhungasi swi nga hi dyela nkarhi lowu a hi ta wu tirhisela dyondzo ya munhu hi yexe. Makwerhu un’wana u ri: “Swa olova ku tshika ku va ni dyondzo ya munhu hi yexe. Sweswi vuhungasi byi kumeka hi ku olova swinene naswona byi chipe ngopfu ku tlula rini na rini. Byi kumeka eka TV, khompyuta ni le ka selfoni. Entiyisweni hi rhendzeriwe hi byona.” Loko hi nga tivoneli, hi nga sungula ku tirhisa nkarhi wo tala ngopfu eka vuhungasi lerova hi nga ha vi na wona nkarhi wo va ni dyondzo ya munhu hi yexe. (Efe. 5:15-17) Kutani un’wana ni un’wana u fanele a tivutisa: ‘Xana ndzi tinyika nkarhi wo dyondza hi swilo leswi enteke leswi nga eRitweni ra Xikwembu nkarhi ni nkarhi? Xana ndzi tinyika nkarhi wo dyondza hi swilo leswi enteke ntsena loko ndzi lunghiselela nkulumo kumbe xiavelo xo karhi eminhlanganweni?’ Loko swi ri tano, hi nga ha tirhisa nkarhi wa hina wa dyondzo ya munhu hi yexe kumbe wa Vugandzeri bya Ndyangu bya nimadyambu leswaku hi dzika swinene eku lavisiseni ka vutlhari lebyi nga eBibeleni, lebyi Yehovha a hi nyikaka byona leswaku a hi hlayisela ku ponisiwa.—Swiv. 2:1-5.
XIKHUTAZO XI VA PFUNE LESWAKU VA TIYISELA
14. Matsalwa ma swi kombisa njhani leswaku Yehovha wa yi tiva ndlela leyi hi titwaka ha yona?
14 Davhida u langutane ni swiyimo swo tala swo tika evuton’wini byakwe. (1 Sam. 30:3-6) Bibele yi kombisa leswaku Yehovha a a yi tiva ndlela leyi Davhida a a titwa ha yona. (Hlaya Pisalema 34:18; 56:8.) Wa yi tiva ndlela leyi hi titwaka ha yona. Wa tshinela eka hina loko hi ‘tshoveke mbilu’ kumbe hi ‘pfotlokile emoyeni.’ Mhaka leyi yi nga hi chavelela swinene hilaha yi chaveleleke Davhida hakona, loyi a yimbeleleke a ku: “Ndzi ta tsaka ndzi tsakisisa hi musa wa wena wa rirhandzu, hileswi u voneke ku xaniseka ka mina; wa ma tiva maxangu ya moya-xiviri wa mina.” (Ps. 31:7) Kambe Yehovha a nga voni gome leri hi nga na rona ntsena. U tlhela a hi seketela hi ku hi chavelela ni ku hi khutaza. Ndlela yin’wana leyi a endlaka sweswo ha yona i ku tirhisa minhlangano ya Vukreste.
15. Hi nga dyondza yini emhakeni ya Asafa?
15 Ndlela yin’wana leyi swi vuyerisaka ha yona ku ya eminhlanganweni yi vonaka emhakeni ya mupisalema Asafa. Leswi Asafa a a tshamela ku ehleketa hi ndlela leyi vanhu vo lulama a va xaniseka ha yona kasi vanhu vo biha a swi tikomba swi va fambela kahle, u tivutisile loko ku tirhela Xikwembu swi vuyerisa. Kutani u hele matimba naswona u phofule mintlhaveko yakwe hi ndlela leyi: “Mbilu ya mina a yi karhatekile naswona a ndzi tlhaviwe swinene etinsweni ta mina.” Hikwalaho ka sweswo, a ku lo sala katsongo leswaku a tshika ku tirhela Yehovha. I yini lexi pfuneke Asafa leswaku a lulamisa langutelo rakwe? U te: “Ndzi [fike] evukwetsimelweni lebyikulu bya Xikwembu.” Ku tihlanganisa ni vagandzeri-kulobye swi n’wi pfune leswaku a lulamisa langutelo rakwe. U xiye leswaku ku humelela ka vanhu vo homboloka a ko va ka xinkarhana ntsena nileswaku Yehovha u ta lulamisa timhaka. (Ps. 73:2, 13-22) Na hina hi nga titwa hi ndlela leyi fanaka. Vuhomboloki lebyi hi byi vonaka emisaveni ya Sathana byi nga hi tshikilela ni ku hi heta matimba. Kambe loko hi tihlanganisa ni vamakwerhu swi ta hi phyuphyisa ni ku hi pfuna leswaku hi tlhela hi tsakela ku tirhela Yehovha.
16. Xikombiso xa Hana xi nga hi vuyerisa njhani?
16 Kambe ku vuriwa yini loko ku ri ni swin’wana evandlheni leswi endlaka leswaku swi ku tikela ku ya eminhlanganweni? Kumbexana u khomiwa hi tingana hileswi u bohekeke ku tshika vutihlamuleri lebyi a wu byarhisiwe byona evandlheni kumbe u tlulane milenge ni makwerhu wo karhi. Loko swi ri tano, xikombiso xa Hana xi nga ha ku pfuna. (Hlaya 1 Samuwele 1:4-8.) Tsundzuka leswaku Penina, nkati-kulobye wakwe, a a tshamela ku n’wi dyisa mbitsi. Ngopfu-ngopfu a a dya mbitsi a xeva hi nhlomulo loko ndyangu hinkwawo wu ya endlela Yehovha switlhavelo eXilo lembe ni lembe. A a tshikileleka swinene lerova “a rila a nga dyi.” Kambe, a nga swi pfumelelanga sweswo swi n’wi tshikisa ku ya gandzela Yehovha. Yehovha u xiye ku tshembeka kakwe kutani a n’wi katekisa.—1 Sam. 1:11, 20.
17, 18. (a) Hi tihi tindlela leti hi kumaka xikhutazo ha tona eminhlanganweni ya vandlha? (b) U titwa njhani hi nkhathalelo lowu Yehovha a hi nyikaka wona leswaku a hi pfuna hi kota ku pona?
17 Namuntlha Vakreste va fanele va tekelela xikombiso xa Hana. Hi fanele hi ya eminhlanganweni nkarhi ni nkarhi. Hilaha hinkwerhu hi swi tivaka hakona, minhlangano ya hi khutaza. (Hev. 10:24, 25) Eminhlanganweni, vamakwerhu va hi komba rirhandzu naswona sweswo swa hi chavelela. Hi xikombiso, tinkulumo kumbe tinhlamulo ta vamakwerhu ti nga ha khumba timbilu ta hina. Eka mabulo lawa hi vaka na wona emahlweni kumbe endzhaku ka minhlangano, mupfumeri-kulorhi a nga ha rhiya ndleve loko hi vulavula na yena kumbe a vula swo karhi leswi nga hi chavelelaka. (Swiv. 15:23; 17:17) Nakambe loko hi hlanganyela eku yimbeleleni ka tinsimu to dzunisa Yehovha, ha khutazeka. Ngopfu-ngopfu hi lava xikhutazo lexi hi xi kumaka eminhlanganweni loko ‘miehleketo leyi karhataka’ yi hi tshikilela hikuva hi kona laha Yehovha a hi seketelaka hi ‘nchavelelo wakwe’ ni ku hi pfuna leswaku hi tiyisela ni ku tshama hi tshembekile.—Ps. 94:18, 19.
18 Nkhathalelo wa Xikwembu xa hina wu endla leswaku hi titwa hi sirhelelekile hilaha mupisalema Asafa a titweke hakona loko a xi yimbelelela a ku: “U khome voko ra mina ra xinene. U ta ndzi kongomisa hi xitsundzuxo xa wena.” (Ps. 73:23, 24) Hakunene ha n’wi tlangela Yehovha hileswi a hi hlayisaka leswaku hi ponisiwa!
[Swivutiso Swa Dyondzo]
[Xifaniso lexi nga eka tluka 28]
Na wena u kokiwe hi Yehovha
[Xifaniso lexi nga eka tluka 30]
Ha sirheleleka loko hi tirhisa ndzayo ya Xikwembu
[Xifaniso lexi nga eka tluka 31]
Xikhutazo xi hi pfuna leswaku hi tiyisela
