Xana Wa Yi Tlangela Hakunene Mikateko Ya Wena?

EKU sunguleni vana va Israyele a va tsake swinene loko va kutsuriwe hi singita evuhlongeni bya le Egipta leswaku va gandzela Yehovha hi ku ntshunxeka. (Eks. 14:29–15:1, 20, 21) Hambiswiritano, endzhakunyana ka sweswo langutelo ra vona ri cincile. Va sungule ku gungula hi xiyimo xa vona. Ha yini? Hikuva va sungule ku ehleketa swinene hi swiphiqo swa ku tshama emananga ematshan’weni yo ehleketa hi leswi Yehovha a va endleleke swona. Va byele Muxe va ku: “Ha yini mi hi humese aEgipta leswaku hi ta fela emananga? Hikuva a ku na xinkwa ni mati, naswona moya-xiviri wa hina se wa xi nyenya xinkwa lexi solekaka [manna].”—Tinhl. 21:5.

Endzhaku ka malembe-xidzana yo hlayanyana, Hosi Davhida wa le Israyele wa khale u yimbelele a ku: “Loko ku ri mina, ndzi tshembe musa wa wena wa rirhandzu; mbilu ya mina a yi tsake hi ku ponisa ka wena. Ndzi ta yimbelelela Yehovha, hikuva u tirhisane na mina hi ndlela leyi vuyerisaka.” (Ps. 13:5, 6) Davhida a nga swi rivalanga swiendlo swa musa leswi Yehovha a n’wi endleleke swona. Kambe u ehlekete ha swona nkarhi na nkarhi. (Ps. 103:2) Yehovha u tlhele a tirhisana na hina hi ndlela leyi vuyerisaka, kutani hi ta va hi endla hi vutlhari loko hi nga swi tekeli ehansi swilo leswi a hi endleleke swona. Kutani a hi kambisiseni mikateko yin’wana ya Xikwembu leyi hi tiphinaka ha yona namuntlha.

“Xinakulobye Na Yehovha”

Mupisalema u yimbelele a ku: “Lava va vaka ni xinakulobye na Yehovha hi lava va n’wi chavaka.” (Ps. 25:14) Hakunene i lunghelo lerikulu ku va vanhu lava nga hetisekangiki va va ni vuxaka na Yehovha! Hambiswiritano, ku vuriwa yini loko hi ehleketa ngopfu hi timhaka ta vutomi bya siku ni siku lerova hi saleriwa hi nkarhi wutsongo wo khongela? Kutani ehleketa leswaku ku ta humelela yini hi vuxaka bya hina lebyinene na Yehovha. Tanihi leswi Yehovha a nga  Munghana wa hina, u langutele leswaku hi n’wi tshemba naswona hi khongela eka yena hi n’wi phofulela leswi nga etimbilwini ta hina, hi n’wi byela leswi hi chavisaka, leswi hi swi navelaka ni leswi hi karhataka. (Swiv. 3:5, 6; Filp. 4:6, 7) Kutani hi fanele hi kambisisa leswaku swikhongelo swa hina swi njhani.

Loko Paul, muntshwa un’wana loyi a nga Mbhoni, a ehlekete hi swikhongelo swakwe, u xiye leswaku a swi lava ku antswisiwa. * U te: “Se a ndzi ri ni mukhuva wo phindha-phindha marito lama fanaka loko ndzi khongela eka Yehovha.” Loko Paul a ri karhi a endla ndzavisiso hi mhaka leyi ebukwini leyi nge Watch Tower Publications Index, u kume leswaku ku ni swikhongelo swa kwalomu ka 180 leswi tsariweke eBibeleni. Eka swona, malandza ya Yehovha ya khale ma phofule leswi a swi ri etimbilwini ta wona. Paul u te: “Loko ndzi anakanyisise hi swikombiso sweswo swa le Matsalweni, ndzi dyondze leswaku ndzi fanele ndzi vula mhaka hi ku kongoma loko ndzi khongela. Leswi swi ndzi pfune ku phofulela Yehovha leswi nga embilwini ya mina. Sweswi ndzi tsakela ku khongela eka yena.”

‘Swakudya Hi Nkarhi Lowu Faneleke’

Nkateko wun’wana lowu hi wu kumeke eka Yehovha i tidyondzo leti humaka eMatsalweni. Loko hi ri karhi hi tiphina hi swakudya swa moya leswi akaka, hi ni xivangelo xo “huwelela hi ku tsaka hikwalaho ka xiyimo lexinene xa mbilu.” (Esa. 65:13, 14) Hambiswiritano, hi fanele hi tivonela leswaku hi nga pfumeleli minkucetelo yo biha leswaku yi hi endla hi nga ha wu hisekeli ntiyiso. Hi xikombiso, ku yingisela tidyondzo ta vagwinehi swi nga hi pfilunganya mianakanyo ni ku hi pfala mahlo hi nga voni nkoka wa ‘swakudya swa moya leswi fikaka hi nkarhi lowu faneleke,’ leswi Yehovha a hi nyikaka swona hi ku tirhisa “hlonga ro tshembeka ni ro tlhariha.”—Mat. 24:45-47.

André, loyi a tirheleke Yehovha malembe yo tala, u humeleriwe hi mhaka yo biha yo hambukisiwa hi tidyondzo ta vagwinehi. A a ehleketa leswaku ku languta katsongo Web site ya vagwinehi a swi nge vi na khombo. U te: “Eku sunguleni, ndzi kokiwe rinoko hi tidyondzo ta vagwinehi leti vuriwaka ta ntiyiso. Loko ndzi ya ndzi kambisisa leswi va swi vuleke, swi ndzi endle ndzi ehleketa leswaku swi fanerile ku tshika nhlengeletano ya Yehovha. Kambe loko ndzi ri karhi ndzi endla ndzavisiso malunghana ni leswi vagwinehi va swi vulaka hi Timbhoni ta Yehovha, ndzi xiye ndlela leyi vadyondzisi va mavunwa a va ri ni vukanganyisi ha yona. Rungula leri va vulaka leswaku i ‘vumbhoni lebyi tiyeke,’ entiyisweni i mhaka leyi va yi vulavulelaka hi ndlela leyi soholotiweke. Xisweswo, ndzi endle xiboho xo tlhela ndzi sungula ku dyondza minkandziyiso ya hina ni ku ya eminhlanganweni. Hi ku hatlisa ndzi xiye ndlela leyi ndzi kayeleke swinene ha yona.” Lexi tsakisaka André u tlhelele evandlheni.

“Nhlengeletano Ya Vamakwenu Hinkwayo”

Ku rhandzana ka hina ni vun’we bya vumakwerhu i mikateko leyi humaka eka Yehovha. (Ps. 133:1) Hi yona mhaka muapostola Petro u tsale a ku: “Rhandzani nhlengeletano ya vamakwenu hinkwayo.” (1 Pet. 2:17) Hi ku va  xiphemu xa vamakwerhu va Vakreste, ha vuyeriwa hi nseketelo ni musa wa lava fanaka ni vatatana, vamanana, vabuti na vasesi entiyisweni.—Mar. 10:29, 30.

Hambiswiritano, swiyimo swo hambana-hambana minkarhi yin’wana swi nga vavisa vuxaka bya hina ni vamakwerhu. Hi xikombiso, swa olova ku hlundzukisiwa hi swihoxo swa un’wana ni ku sungula ku n’wi xopaxopa. Loko wo tshuka u hlundzukisiwa hi sweswo, xana a swi nge ku pfuni ku tsundzuka leswaku Yehovha u rhandza malandza yakwe ku nga khathariseki swihoxo swa wona? Ku tlula kwalaho, “loko hi ku: ‘A hi na xidyoho,’ ha tixisa naswona a hi na ntiyiso.” (1 Yoh. 1:8) Xana a hi fanelanga hi tikarhatela ku ‘hambeta hi lehiselana mbilu ni ku rivalelana hi ku ntshunxeka’?—Kol. 3:13.

Muntshwa un’wana loyi a vuriwaka Ann u dyondze ku vava ndlela leyi vunakulobye bya Vukreste byi nga bya nkoka ha yona. Leswi a endleke ku fana ni n’wana wa vusopfa wa le xifanisweni xa Yesu, u tshike vandlha ra Vukreste. Endzhaku ka nkarhi, u tiehleketile kutani a tlhelela evandlheni. (Luka 15:11-24) Ann u dyondze yini eka leswi n’wi humeleleke? U ri: “Leswi sweswi ndzi tlheleleke enhlengeletanweni ya Yehovha, ndzi rhandza vamakwerhu hinkwavo ku nga khathariseki swihoxo swa vona. Khale a ndzi hatlisela ku va xopaxopa. Kambe sweswi ndzi tiyimisele ku nga pfumeleli nchumu leswaku wu ndzi sivela ku kuma mikateko leyi ndzi yi tsakelaka exikarhi ka vapfumeri-kulorhi. Ku hava nchumu lowu tsakisaka emisaveni lowu nga hi endlaka hi tshika paradeyisi ya moya hikwalaho ka wona.”

Tlangela Mikateko Ya Wena Minkarhi Hinkwayo

Ntshembo wa hina wa leswaku Mfumo wa Xikwembu hi wona lowu nga ta tlhantlha swiphiqo hinkwaswo swa vanhu i xuma xa nkoka swinene. Loko hi kume ntshembo wolowo ro sungula, hi wu tlangele swinene. Hi titwe ku fana ni muxavisi wa le xifanisweni xa Yesu loyi a “[xaviseke] swilo hinkwaswo leswi a a ri na swona” leswaku a ta xava “perela yin’we ya risima lerikulu.” (Mat. 13:45, 46) Yesu a nga vulanga leswaku muxavisi yoloye u kale a sungula ku yi tekela ehansi perela yoleyo. Hilaha ku fanaka, hi nga tshuki hi tshika ku tlangela ntshembo wa hina lowu tsakisaka.—1 Tes. 5:8; Hev. 6:19.

Xiya xikombiso xa Jean, loyi a tirheleke Yehovha malembe lama tlulaka 60. U ri: “Leswi swi ndzi pfuneke leswaku ndzi tshama ndzi ehleketa hi Mfumo wa Xikwembu i ku vulavula ha wona eka van’wana. Loko ndzi vona ndlela leyi va angulaka ha yona loko va dyondze leswaku Mfumo wolowo i yini, swi ndzi tsakise ngopfu. Ku vona ndlela leyi ntiyiso wa Mfumo wu hundzuleke vutomi bya xichudeni xa Bibele ha yona swi ndzi endle ndzi ehleketa ndzi ku, ‘Hakunene ndzi ni ntiyiso lowu hlamarisaka lowu ndzi faneleke ndzi wu byela van’wana!’”

Hi ni swivangelo leswi twalaka swo tlangela mikateko yo tala ya moya leyi hi tiphinaka ha yona. Hambileswi hi nga ha weriwaka hi miringo yo kota nkaneto, vuvabyi, ku dyuhala, ntshikilelo, ku feriwa ni swiphiqo swa ikhonomi, ha swi tiva leswaku i ya xinkarhana. Ehansi ka Mfumo wa Xikwembu hi ta kuma ni mikateko ya nyama. Ku xaniseka hinkwako loku hi ku tiyiselelaka sweswi ku ta herisiwa emafambiselweni lamantshwa ya swilo.—Nhlav. 21:4.

Enkarhini lowu, a hi tlangeleni mikateko ya moya naswona hi kombisa ku tlangela loku fanaka ni ka mupisalema loyi a yimbeleleke a ku: “U endle swilo swo tala, Oho Yehovha Xikwembu xanga, ni mintirho ya wena yo hlamarisa ni miehleketo ya wena eka hina; a nga kona la nga fanisiwaka na wena. Loko a ndzi lava ku vulavula ha yona, yi tele swinene lerova a ndzi nge yi runguli.”—Ps. 40:5.

[Nhlamuselo ya le hansi]

[Xifaniso lexi nga eka tluka 18]

Hi katekisiwe hi nseketelo wa moya eminkarhini yo tika