Yimbelelelani Yehovha

“Ndzi ta yimbelelela Xikwembu xanga miloti loko ntsena ndza ha ri kona.”—PS. 146:2.

1. I yini leswi susumeteleke Davhida ku qambha tin’wana ta tipisalema takwe?

DAVHIDA loko a ha ri muntshwa, u hete tiawara to tala enhoveni ekusuhi ni le Betlehema a rindze mintlhambi ya tata wakwe. Loko a ri karhi a risa tinyimpfu, u langutise swilo swo hlamarisa leswi Yehovha a swi tumbuluxeke: matilo lama teleke hi tinyeleti, “swiharhi swa nhova” ni “tinyenyana ta tilo.” Leswi a swi voneke swi n’wi khumbe swinene lerova u susumeteleke ku qambha tinsimu leti khumbaka mbilu, leti dzunisaka Muvumbi wa swilo sweswo leswi hlamarisaka. Tinsimu to tala leti Davhida a ti qambheke ti kumeka ebukwini ya Tipisalema. *—Hlaya Pisalema 8:3, 4, 7-9.

2. (a) Vuyimbeleri byi nga n’wi khumba njhani munhu? Nyika xikombiso. (b) Hi nga dyondza yini hi vuxaka bya Davhida na Yehovha eka Pisalema 34:7, 8 ni le ka Pisalema 139:2-8?

² Swi nga ha endleka leswaku Davhida u kote ku antswisa vutshila byakwe bya ku yimbelela hi nkarhi wolowo. Entiyisweni, a a ri ni vutshila swinene lerova u komberiwe ku ya tlangela Hosi Sawulo  haripa. (Swiv. 22:29) Vuyimbeleri bya Davhida byi chavelele hosi leyi tshikilelekeke, hilaha vuyimbeleri lebyinene byi talaka ku chavelela vanhu hakona ninamuntlha. Nkarhi wun’wana ni wun’wana loko Davhida a chaya haripa yakwe, “Sawulo a kuma ku wisa naswona a swi n’wi fambela kahle.” (1 Sam. 16:23) Tinsimu leti muyimbeleri loyi la chavaka Xikwembu tlhelo muqambhi a ti tsaleke ta ha pfuna ninamuntlha. Ehleketa hi mhaka leyi. Namuntlha vanhu va timiliyoni lava nga ni swiyimo swo hambana-hambana ni lava tshamaka ematikweni hinkwawo, va hlaya tipisalema ta Davhida nkarhi na nkarhi leswaku va kuma nchavelelo ni ntshembo hambileswi se ku hundzeke malembe yo tlula 3 000 Davhida a file.—2 Tikr. 7:6; hlaya Pisalema 34:7, 8; 139:2-8; Amo. 6:5.

Ndlela Leyi Vuyimbeleri Byi Nga Bya Nkoka Ha Yona eVugandzerini Bya Ntiyiso

3, 4. Hi wahi malunghiselelo yo yimbelela tinsimu to kwetsima lama endliweke enkarhini wa Davhida?

³ Davhida a a ri ni vutshila naswona u byi tirhise hi ndlela leyinene leswaku a dzunisa Yehovha. Endzhaku ka loko a vekiwe ku va hosi ya Israyele, u hlele leswaku ku yimbeleriwa tinsimu to tsakisa loko vanhu va hlengeletanile etabernakeleni. Valevhi hinkwavo va 4 000 lava a va tirha etempeleni a va averiwe ku “dzunisa,” kasi va 288 a va ‘leteriwe hi risimu eka Yehovha, hinkwavo a va ri ni ntokoto.’—1 Tikr. 23:3, 5; 25:7.

⁴ Davhida u qambhe tinsimu to tala leti Valevhi a va ti yimbelela. Vaisrayele lava veke ni lunghelo ro va kona eka swiendlakalo leswi eka swona ku yimbeleriweke tipisalema ta Davhida, va fanele va khumbiwe swinene hi leswi va swi tweke. Endzhakunyana, loko areka ya ntwanano yi yisiwe eYerusalema, “Davhida [u byele] varhangeri va Valevhi leswaku va yimisa vamakwavo lava va yimbelelaka hi swichayachayana swa tinsimu, swichayachayana swa switende, tiharipa ni swiphambati, va chaya hi matimba va endla mpfumawulo wa ku tsaka wu twala ngopfu.”—1 Tikr. 15:16.

5, 6. (a) Ha yini enkarhini wa ku fuma ka Davhida ku endliwe matshalatshala lamakulu yo lunghiselela vuyimbeleri? (b) Hi swi tivisa ku yini leswaku vuyimbeleri a byi tekiwa byi ri bya nkoka evugandzerini eIsrayele wa khale?

⁵ Ha yini enkarhini wa Davhida ku endliwe matshalatshala lamakulu yo lunghiselela vuyimbeleri? Xana a ku ri hileswi hosi ya kona a yi ri muyimbeleri? Doo, a ku ri ni xivangelo xin’wana lexi paluxiweke eka madzana ya malembe lama landzeleke loko Hosi Hezekiya wo lulama a pfuxete vugandzeri bya le tempeleni. Eka 2 Tikronika 29:25 ha hlaya: “[Hezekiya u] veke Valevhi endlwini ya Yehovha, va ri ni swiphambati, va ri ni swichayachayana swa switende ni tiharipa, hi ku landza xileriso xa Davhida ni xa Gadi la vonaka swivono swa hosi, ni xa Natani lowa muprofeta, hikuva xileriso xa vaprofeta vakwe a xi huma evokweni ra Yehovha.”

⁶ Yehovha u tirhise vaprofeta vakwe ku lerisa vagandzeri vakwe leswaku va n’wi dzunisa hi tinsimu. Vayimbeleri va rixaka leri nga vaprista va kale va tshikisiwa mintirho leyi Valevhi van’wana a va boheka ku yi endla leswaku va ta tirhisa nkarhi wa vona wo tala ku va va qambha, kumbexana ni ku titoloveta ku yimbelela.—1 Tikr. 9:33.

7, 8. Loko swi ta emhakeni yo yimbelela tinsimu ta Mfumo, i yini lexi nga xa nkoka ngopfu ku tlula ku va ni vutshila byo yimbelela?

⁷ U nga ha ku, “Loko swi ta emhakeni yo yimbelela kahle, a ndzi ta va ndzi nga katsiwanga exikarhi ka lava nga ni ntokoto lava a va yimbelela etabernakeleni.” Kambe a hi Valevhi hinkwavo lava a va ri ni ntokoto. Hi ku ya hi 1 Tikronika 25:8, a ku ri ni ‘lava dyondzaka.’ Nakambe i swa nkoka ku xiya leswaku swi nga ha endleka a ku ri ni van’wana lava a va ri ni ntokoto eka tinxaka tin’wana ta Israyele, kambe Yehovha u hlawule Valevhi leswaku ku va vona lava yimbelelaka. Hi nga tiyiseka leswaku Valevhi hinkwavo vo tshembeka va endle hinkwaswo leswi va nga swi kotaka leswaku va hetisisa xiavelo xa vona ku nga khathariseki leswaku a va ri ni “ntokoto” kumbe a va ha ‘dyondza.’

⁸ Davhida a a byi rhandza vuyimbeleri naswona a a ri ni vutshila eka byona. Kambe, xana vutshila hi byona ntsena lebyi nga bya nkoka eka Xikwembu? Eka Pisalema 33:3, Davhida u tsale a ku: “Endlani hinkwaswo leswi mi nga swi kotaka eka tingoti ta switende, mi ri karhi mi huwelela hi ku tsaka.” Yinhla-nkulu hi leyi: Lexi nga xa nkoka i ku va hi ‘endla hinkwaswo leswi hi nga swi kotaka’ leswaku hi dzunisa Yehovha.

 Ndela Leyi Vuyimbeleri Byi Tirhisiweke Ha Yona Endzhaku Ka Loko Davhida A File

9. Hlamusela leswi a wu ta va u swi vonile ni ku swi twa loko a wu ve kona eku khanguriweni ka tempele hi nkarhi wa ku fuma ka Solomoni.

⁹ Hi nkarhi wa ku fuma ka Solomoni, vuyimbeleri byi tirhisiwe ngopfu evugandzerini lebyi tengeke. Loko ku khanguriwa tempele, a ku ri ni ntlawa lowukulu lowu heleleke wa vayimbeleri lava tlangaka swichayachayana swo hambana-hambana, laha xiphemu xin’wana xa vona a xi vumbiwa hi vanhu va 120 lava yimbaka timhalamhala. (Hlaya 2 Tikronika 5:12.) Bibele yi hi byela leswaku “vayimbi va timhalamhala [lava hinkwavo a va ri vaprista] ni vayimbeleri va hlanganile swin’we ku humesa mpfumawulo wun’we wo dzunisa ni ku nkhensa Yehovha, . . . ‘hikuva hi lonene, ni musa wakwe wa rirhandzu i wa hilaha ku nga riki na makumu.’” Hi ku hatlisa loko mpfumawulo wolowo wo tsakisa wu sungula ku twakala, “yindlu yi tala papa,” leswi kombisaka leswaku Yehovha wa wu amukela. Hakunene a swi tsakisa ku twa mpfumawulo wa timhalamhala teto hinkwato swin’we ni wa vayimbeleri va magidi wu hlangana wu va nchumu wun’we!—2 Tikr. 5:13.

10, 11. I yini leswi kombisaka leswaku Vakreste vo sungula a va tirhisa vuyimbeleri evugandzerini?

¹⁰ Vuyimbeleri byi tlhele byi tirhisiwa evugandzerini hi Vakreste vo sungula. I ntiyiso leswaku vagandzeri va lembe-xidzana ro sungula a va hlangana emakaya ya vamakwerhu, ku nga ri etabernakeleni kumbe etitempeleni. Hikwalaho ka nxaniso ni swivangelo swin’wana, swiyimo leswi a va hlangana ehansi ka swona hakanyingi a swi nga va pfumeleli leswaku va yimbelela. Hambiswiritano, Vakreste volavo a va yimbelela va dzunisa Xikwembu.

¹¹ Muapostola Pawulo u khutaze Vakreste-kulobye va le Kolosa a ku: “Hambetani mi . . . tsundzuxana hi tipisalema, marito yo dzunisa eka Xikwembu, tinsimu ta moya hi nsovo.” (Kol. 3:16) Endzhaku ka loko Pawulo na Silasi va pfaleriwe ekhotsweni, va sungule ku “khongela ni ku dzunisa Xikwembu hi risimu,” hambileswi a va nga ri na yona buku ya tinsimu leyi a va langutisa eka yona. (Mint. 16:25) Loko a wu pfaleriwe ekhotsweni, i tinsimu tingani ta Mfumo leti a wu ta kota ku ti yimbelela hi nhloko?

12. Hi nga swi kombisa njhani leswaku ha ti tlangela tinsimu ta hina ta Mfumo?

¹² Leswi vuyimbeleri byi nga bya nkoka evugandzerini bya hina, hi fanele hi tivutisa hi ku: ‘Xana ndzi byi teka byi ri bya nkoka? Xana ndzi tikarhatela ku hatla ndzi fika eminhlanganweni, etinhlengeletanweni ni le mintsombanweni leswaku ndzi yimbelela risimu ro pfula ni vamakwerhu? Naswona xana ndzi yimbelela hi mbilu hinkwayo? Xana ndzi khutaza vana va mina leswaku va teka tinsimu leti yimbeleriwaka exikarhi ka Xikolo xa Vutirheli bya le Tilweni ni Nhlangano wa Ntirho ni leti yimbeleriwaka exikarhi ka nkulumo ya le rivaleni ni Dyondzo ya Xihondzo xo Rindza tanihi nkarhinyana wo wisa, lowu va nga wu tirhiselaka ku huma eholweni hambiloko swi nga bohi, kumbexana leswaku va ta tiolola milenge?’ Hi nga rivali leswaku ku yimbelela i xiphemu xa vugandzeri bya hina. Hinkwerhu hi fanele hi yimbelela hi vun’we leswaku hi dzunisa Yehovha, ku nga khathariseki leswaku hi ni “ntokoto” kumbe ha ha ‘dyondza.’—Ringanisa na 2 Vakorinto 8:12.

Swilaveko Swa Hina Swa Cinca Loko Nkarhi Wu Famba

13, 14. Ha yini swi ri swa nkoka ku yimbelela hi mbilu hinkwayo eminhlanganweni ya vandlha? Kombisa.

¹³ Emalembeni lama tlulaka 100 lama hundzeke, Zion’s Watch Tower yi hlamusele xivangelo xin’wana lexi endlaka leswaku tinsimu ta hina ta Mfumo ti va ta nkoka. Yi te: “Ku yimbelela marito lama humaka eBibeleni i ndlela leyinene yo ma dzikisa emianakanyweni ni le timbilwini ta vanhu va Xikwembu.” Marito yo tala lama nga eka tinsimu ta hina ma sekeriwe eMatsalweni, hikwalaho ku dyondza marito ya tinsimu tin’wana ku nga va ndlela leyinene ngopfu yo dzikisa ntiyiso etimbilwini ta hina. Hakanyingi vanhu lava teke eminhlanganweni ya hina ro sungula va khumbiwe swinene hi ndlela leyi vandlha ri yimbeleleke hi mbilu hinkwayo ha yona.

¹⁴ Siku rin’wana nimadyambu hi 1869, C. T. Russell u twe vuyimbeleri lebyi a byi yimbeleriwa eholweni leyi nga exithezini xa le hansi loko a huma entirhweni a tlhelela ekaya. Hi nkarhi wolowo, a a nga ha tshembi leswaku u ta kuma ntiyiso malunghana ni Xikwembu. Kutani u endle xiboho xo tirhisa nkarhi wakwe hinkwawo  eka swa mabindzu. U kale a tibyela leswaku loko o tikumela mali u ta pfuna vanhu hi tlhelo ra nyama hambiloko a nga swi koti ku va pfuna ku dyondza ntiyiso hi Xikwembu. Makwerhu Russell u nghene eholweni leyi thyakeke yi tlhela yi va ni ritshuri naswona u kume leswaku a ku khomiwe nhlengeletano ya kereke. U tshame ehansi a yingisela. Endzhakunyana u tsale leswaku leswi a swi tweke eka madyambu wolawo “a swi ringene eka Xikwembu ku tiyisa ripfumelo [rakwe] leri a ri nga ha tshembi leswaku Bibele yi huhuteriweke hi Xikwembu.” Xiya leswaku nchumu wo sungula lowu kokeke Makwerhu Russell ku ya eka nhlengeletano yoleyo a ku ri vuyimbeleri.

15. Hi yihi mindzulamiso leyi endliweke eka tidyondzo ta hina leyi endleke leswaku swi fanela ku va buku ya tinsimu yi pfuxetiwa?

¹⁵ Loko nkarhi wu ya wu famba, ku endliwa mindzulamiso eka ndlela leyi hi ma twisisaka ha yona Matsalwa. Swivuriso 4:18 yi ri: “Ndlela ya lavo lulama yi fana ni ku vonakala ko vangama loku vonakalaka hakatsongo-tsongo kukondza siku ri simekiwa ri tiya.” Ku vonakala koloko loku hambetaka ku voninga ku endla leswaku ku cinciwa ndlela leyi a hi wu twisisa ha yona ntiyiso, ku katsa ni leswi tsariweke eka tinsimu ta hina. Eka malembe ya 25 lama hundzeke, Timbhoni ta Yehovha ematikweni yo tala ti swi tsakerile ku tirhisa buku ya tinsimu leyi nge Yimbelelelani Yehovha Swidzuniso. * Ku sukela loko buku yoleyo yi kandziyisiwile ro sungula, ku vonakala ku hambete ku voninga eka tidyondzo to tala, naswona marito man’wana lama tirhisiweke ebukwini yoleyo ma hundzeriwe hi nkarhi. Hi xikombiso, a ha ha vulavuli hi “mafambiselo lamantshwa” kambe hi vulavula hi “misava leyintshwa.” Naswona sweswi hi vula leswaku vito ra Yehovha ri ta “kwetsimisiwa” ku nga ri ku “lweriwa.” Kutani hikwalaho ka leswi tidyondzo ta hina ti lulamisiweke, ku ve ni xilaveko xo pfuxeta buku ya hina ya tinsimu.

16. Buku leyintshwa ya tinsimu yi ta hi pfuna njhani leswaku hi landzela ndzayo ya Pawulo leyi nga eka Vaefesa 5:19?

¹⁶ Hikwalaho ka swivangelo sweswo ni swin’wana, Huvo leyi Fumaka yi pfumerile leswaku ku kandziyisiwa buku leyintshwa ya tinsimu leyi nge Yimbelelelani Yehovha. Tinsimu leti nga ebukwini leyintshwa ti hungutiwile ti va 135. Leswi ku nga ni tinsimu titsongo leti nga ta dyondziwa, swi ta hi olovela ku nhlokohata marito ya tinsimu tin’wana letintshwa. Leswi swi pfumelelana ni marito ya Pawulo lama tsariweke eka Vaefesa 5:19.—Yi hlaye.

Ndlela Leyi U Nga Kombisaka Ha Yona Leswaku Wa Ti Tlangela Tinsimu

17. Hi tihi tinhla leti nga hi pfunaka ku hlula ku chava ku khomiwa hi tingana loko swi ta emhakeni yo yimbelela evandlheni?

¹⁷ Xana ku chava ku khomiwa hi tingana swi fanele swi hi tshikisa ku yimbelela eminhlanganweni ya Vukreste? Anakanya hi mhaka leyi: Malunghana ni mavulavulelo ya hina, xana a hi ntiyiso leswaku “hinkwerhu ha khunguvanyeka minkarhi yo tala”? (Yak. 3:2) Kambe a hi ma pfumeleli mavulavulelo ya hina lama nga ni swihoxo ma hi tshikisa ku dzunisa Yehovha hi yindlu ni yindlu. Hi ndlela leyi fanaka, swihoxo leswi hi swi endlaka loko hi yimbelela a swi fanelanga swi hi tshikisa ku N’wi dzunisa. Yehovha, “la nyikeke munhu nomu,” u tsakela ku yingisela marito ya hina loko  hi ma tirhisela ku n’wi dzunisa hi ku yimbelela.—Eks. 4:11.

18. Nyika swiringanyeto swo dyondza marito ya tinsimu.

¹⁸ Ti-CD leti nga ni nhloko-mhaka leyi nge, Yimbelelelani Yehovha—Vuyimbeleri Bya Marito ta kumeka hi tindzimi to tala. Ti ni vuyimbeleri byo tsakisa bya swichaya-chayana ni bya marito ya tinsimu letintshwa. Swa tsakisa swinene ku yingisela ti-CD leti. Ti yingisele nkarhi na nkarhi; kutani u ta hatla u dyondza marito ya tinsimu tin’wana ta hina letintshwa. Marito ya tinsimu to tala ma tsariwe hi ndlela leyi endlaka leswaku loko u yimbelela layini yo sungula, u ta swi kota ku tiva marito lama nga ta landzela. Kutani loko u tlanga ti-CD teto, ha yini u nga ringeti ku fambisana ni vayimbeleri lava yimbelelaka eka tona? Loko se u ma tiva kahle marito ya tinsimu ni machayelo ya tona loko u yimbelela ekaya, a swi kanakanisi leswaku u ta yimbelela hi ku tiyiseka eHolweni ya Mfumo.

19. Hi wahi magoza lama katsekaka loko ku lunghiseleriwa vuyimbeleri bya orchestra bya tinsimu ta hina ta Mfumo?

¹⁹ Swa olova ku va hi nga byi tekeli enhlokweni vuyimbeleri lebyi tlangiwaka loko xiyimiso xa nimixo ni xa nindzhenga swi nga si sungula etinhlengeletanweni ta siku ro hlawuleka, etinhlengeletanweni ta xifundzha ni le mintsombanweni ya muganga. Ku endliwa mintirho yo tala loko byi ri karhi byi lunghiseleriwa. Endzhaku ka loko ku hlawuriwe vuyimbeleri bya kona, ku fanele ku tsariwa tinotsi ta tinsimu hi vukheta leti nga ta chayiwa hi swirho swa 64 swa orchestra swa Watchtower swi tirhisa swichayachayana swo hambana-hambana. Kutani vachayi volavo va heta tiawara to tala va kambisisa tinotsi leti va nga ta titoloveta tona ivi va hetelela va rhekhoda etindhawini to rhekhoda eka tona le Patterson, eNew York. Eka vamakwerhu volavo, khume wa vona a va tshami kona eUnited States. Hinkwavo va swi teka ku ri lunghelo lerikulu ku hoxa xandla eku endleni ka vuyimbeleri lebyi tirhisiwaka eminhlanganweni ya Vukreste. Hi nga kombisa leswaku ha ma tlangela matshalatshala ya vona hi ku byi yingisela hi vurhon’wana vuyimbeleri byebyo. Loko mutshama-xitulu etinhlengeletanweni ni le mintsombanweni a hi rhamba leswaku hi tshama ehansi leswaku hi byi yingisela, a hi hatleni hi tshama ehansi kutani hi yingisela hi vurhon’wana vuyimbeleri byebyo lebyi hi lunghiseleriweke byona hi rirhandzu.

20. I yini leswi u tiyimiseleke ku swi endla?

²⁰ Yehovha u ti tekela enhlokweni tinsimu ta hina to dzunisa. I ta nkoka eka yena. Hi nga tsakisa mbilu yakwe hi ku yimbelela hi timbilu ta hina hinkwato, hinkwako laha hi nga ta va hi hlangane kona hi xikongomelo xo gandzela. Ku nga khathariseki leswaku hi swilombe kumbe ha ha dyondza, a hi ‘yimbeleleleni Yehovha’!—Ps. 104:33.

[Tinhlamuselo ta le hansi]

U Anakanya Yini?

• Hi swihi swikombiso swa le minkarhini ya ku tsariwa ka Bibele leswi kombisaka leswaku vuyimbeleri i bya nkoka evugandzerini bya hina?

• Hi kwihi ku fana loku u ku vonaka exikarhi ko yingisa xileriso xa Yesu lexi nga eka Matewu 22:37 ni ku hlanganyela hi mbilu hinkwayo loko ku yimbeleriwa tinsimu ta Mfumo?

• Hi tihi tindlela tin’wana leti hi nga kombisaka ha tona leswaku ha ti tlangela tinsimu ta hina ta Mfumo?

[Swivutiso Swa Dyondzo]

[Xifaniso lexi nga eka tluka 23]

Xana ndza va alela vana va mina ku huma swi nga fanelanga hi nkarhi wo yimbelela?

[Xifaniso lexi nga eka tluka 24]

Xana u dyondza marito ya tinsimu ta hina letintshwa loko u ri ekaya?