Hambeta U Landzela Ndlela Leyinene Yo Hanya Ha Yona!

“Loko hi hanya ni loko hi fa, hi va Yehovha.”—RHOM. 14:8.

1. I yini leswi Yesu a swi dyondziseke malunghana ni ndlela leyinene yo hanya ha yona?

YEHOVHA u lava leswaku hi hanya hi ndlela leyinene. Vanhu va nga hanya hi tindlela to hambana-hambana, kambe i ndlela yin’we ntsena leyi nga yinene. Ndlela leyinene leyi hi nga hanyaka vutomi bya hina ha yona i ku hanya hi ku pfumelelana ni Rito ra Xikwembu naswona hi dyondza eka N’wana wa xona, Yesu Kreste. Yesu u dyondzise valandzeri va yena ku gandzela Xikwembu hi moya ni ntiyiso, naswona u va lerise leswaku va endla vadyondzisiwa. (Mat. 28:19, 20; Yoh. 4:24) Loko hi hanya hi ku pfumelelana ni swileriso swa Yesu, hi tsakisa Yehovha naswona Wa hi katekisa.

2. Vo tala va angule njhani eka rungula ra Mfumo hi lembe-xidzana ro sungula, naswona a swi vula yini ku va wa “Ndlela”?

² Loko lava nga ni “mboyamelo lowunene eka vutomi lebyi nga heriki” va va vapfumeri kutani va khuvuriwa, hi ni swivangelo leswi twalaka swo vula leswi eka vona, “Hambetani mi landzela ndlela leyinene yo hanya ha yona!” (Mint. 13:48) Hi lembe-xidzana ro sungula ra Nguva ya hina leyi Tolovelekeke, vanhu va magidi lava humaka etinxakeni to hambana-hambana va amukele ntiyiso kutani va kombisa ku tinyikela ka vona eka Xikwembu erivaleni hi ku khuvuriwa. (Mint. 2:41) Vadyondzisiwa volavo vo sungula a va ri va “Ndlela.” (Mint. 9:2; 19:23) Xiga lexi a xi fanela hikuva lava va veke valandzeri va Kreste a va hanya hi ndlela leyi a yi dzike eka ku va ni ripfumelo eka Yesu Kreste swin’we ni ku tekelela xikombiso xa yena.—1 Pet. 2:21.

3. Ha yini vanhu va Yehovha va khuvuriwa, naswona ku khuvuriwe vanhu vangani emalembeni ya khume lama hundzeke?

³ Ntirho wo endla vadyondzisiwa wu kurile emasikwini lawa ya makumu naswona wu endliwa ematikweni yo tlula 230. Emalembeni ya khume lama hundzeke, vanhu vo tlula 2 700 000 va endle xiboho xo tirhela Yehovha kutani va khuvuriwa va kombisa ku tinyiketela ka vona eka yena. I xiringaniso xa vanhu vo tlula 5 000 vhiki na vhiki! Xiboho xa vona xa ku khuvuriwa xi sekeriwe eka ku rhandza Xikwembu, ku tiva Matsalwa ni ku va ni ripfumelo eka leswi va swi dyondzisaka. Nkhuvulo i xiendlakalo xa nkoka evuton’wini bya hina, hikuva wu fungha masungulo ya vuxaka lebyikulu na Yehovha.  Naswona wu kombisa leswaku ha khorwiseka leswaku u ta hi pfuna leswaku hi n’wi tirhela hi ku tshembeka, tanihi leswi a pfuneke malandza ya yena ya khale leswaku ma famba endleleni ya yena.—Esa. 30:21.

Ha Yini U Fanele U Khuvuriwa?

4, 5. Boxa mikateko ni vuyelo lebyi kumiwaka hi vanhu lava khuvuriweke.

⁴ Kumbexana se u ni vutivi hi Xikwembu, u hundzukile emahanyelweni ya wena naswona sweswi se u muhuweleri la nga khuvuriwangiki. Nhluvuko wolowo wa bumabumeriwa. Kambe, xana se u tinyiketerile eka Xikwembu hi xikhongelo, naswona u navela ku khuvuriwa? Leswi se u dyondzeke Bibele, a swi kanakanisi leswaku se wa swi tiva leswaku vutomi bya wena byi fanele byi dzika eku dzuniseni ka Yehovha, ku nga ri eku titsakiseni kumbe eku tihlengeleteleni ka swilo leswi vonakaka. (Hlaya Pisalema 148:11-13; Luka 12:15) Kutani, hi yihi mikateko ni vuyelo lebyi kumiwaka hi vanhu lava khuvuriweke?

⁵ Leswi u nga Mukreste la tinyiketeleke, vutomi bya wena byi ta va ni xikongomelo lexikulu. U ta tsaka hikuva u endla ku rhandza ka Xikwembu. (Rhom. 12:1, 2) Moya lowo kwetsima wa Yehovha wu ta endla leswaku u va ni timfanelo ta Xikwembu to tanihi ku rhula ni ripfumelo. (Gal. 5:22, 23) Xikwembu xi ta hlamula swikhongelo swa wena xi tlhela xi katekisa matshalatshala ya wena yo lava ku hanya hi ku pfumelelana ni leswi kumekaka eRitweni ra xona. U ta tsakela ntirho wa nsimu naswona ku hanya hi ndlela leyi amukelekaka eka Xikwembu swi ta tiyisa ntshembo wa wena wa vutomi lebyi nga heriki. Ku tlula kwalaho, ku tinyiketela ka wena ni ku khuvuriwa swi ta kombisa leswaku u lava ku va Mbhoni ya Yehovha hakunene.—Esa. 43:10-12.

6. Ku khuvuriwa ka hina ku kombisa yini?

⁶ Loko hi tinyiketela eka Xikwembu hi tlhela hi khuvuriwa, hi swi kombisa erivaleni leswaku hi va Yehovha. Muapostola Pawulo u tsarile: “Entiyisweni a nga kona eka hina loyi a tihanyelaka ntsena, naswona a nga kona loyi a tifelaka ntsena; hikuva loko hi hanya hi hanyela Yehovha, ni loko hi fa, hi fela Yehovha. Hikokwalaho loko hi hanya ni loko hi fa, hi va Yehovha.” (Rhom. 14:7, 8) Xikwembu xi kombise leswaku xi hi teka hi ri va nkoka hi ku hi nyika ntshunxeko wo tihlawulela. Loko hi tiyimisela ku hanya hi ndlela yoleyo hikwalaho ka leswi hi rhandzaka Xikwembu, hi tsakisa mbilu ya xona. (Swiv. 27:11) Ku khuvuriwa ka hina i xikombiso xa ku tinyiketela ka hina eka Xikwembu ni ku vula erivaleni leswaku Yehovha i Mufumi wa hina. Swi kombisa leswaku hi seketela yena loko swi ta eka mphikamakaneta ya loyi a nga ni mfanelo yo lawula vuako hinkwabyo. (Mint. 5:29, 32) Hikwalaho, Yehovha u le tlhelweni ra hina. (Hlaya Pisalema 118:6.) Nkhuvulo wu tlhela wu hi pfulela ndlela yo kuma mikateko yin’wana yo tala ya moya sweswi ni le nkarhini lowu taka.

Vadyondzisiwa Lava Khuvuriweke Va Katekisiwa Hi Ku Va Ni Vamakwavo Lava Nga Ni Rirhandzu

7-9. (a) Hi xihi xitiyisekiso lexi Yesu a xi nyikeke lava va siyeke swilo hinkwaswo kutani va n’wi landzela? (b) Xitshembiso xa Yesu lexi kumekaka eka Marka 10:29, 30 xi hetiseka njhani?

⁷ Muapostola Petro u byele Yesu a ku: “Waswivo!  Hi siye swilo hinkwaswo hi ku landzela; kahle-kahle hi ta kuma yini?” (Mat. 19:27) Petro a a lava ku tiva leswaku vumundzuku byi n’wi khomele yini, yena ni vadyondzisiwa lavan’wana va Yesu. Va titsone swilo swa nkoka leswaku va ta tinyiketela hi ku helela entirhweni wo chumayela hi Mfumo. (Mat. 4:18-22) Yesu u va nyike xitiyisekiso xihi?

⁸ Hi ku ya hi rungula leri fanaka ni leri, leri tsariweke hi Marka, Yesu u kombise leswaku vadyondzisiwa va yena va ta va xiphemu xa vamakwavo va moya. U te: “A ku na munhu la siyeke yindlu kumbe vamakwavo va xinuna kumbe vamakwavo va xisati kumbe manana kumbe tatana kumbe vana kumbe masimu hikwalaho ka mina ni hikwalaho ka mahungu lamanene la nga ta ka a nga kumi hilaha ku phindhiweke ka 100 enkarhini lowu, tindlu ni vamakwavo va xinuna ni vamakwavo va xisati ni vamanana ni vana ni masimu, swin’we ni ku xanisiwa, kutani emafambiselweni lama taka ya swilo a kuma vutomi lebyi nga heriki.” (Mar. 10:29, 30) Vakreste va lembe-xidzana ro sungula vo tanihi Lidiya, Akhwila, Prisila na Gayo, i van’wana va vanhu lava pfuleke “tindlu” ta vona kutani va va “vamakwavo va xinuna ni vamakwavo va xisati ni vamanana” eka vapfumeri-kulobye, hilaha Yesu a tshembiseke hakona.—Mint. 16:14, 15; 18:2-4; 3 Yoh. 1, 5-8.

⁹ Leswi Yesu a swi vuleke swi hetiseka ngopfu namuntlha. “Masimu” lawa valandzeri va yena va ma siyaka i mintirho yo tihanyisa leyi vo tala, ku katsa ni varhumiwa, swirho swa ndyangu wa le Bethele, vamakwerhu lava tirhaka ku aka ematikweni man’wana ni van’wana, va yi tshikaka leswaku va ta yisa timhaka ta Mfumo emahlweni ematikweni yo hambana-hambana. Vamakwerhu vo tala va xinuna ni va xisati va sukele makaya ya vona leswaku va ta hanya vutomi byo olova, kutani swa hi tsakisa ku twa mintokoto ya vona leyi kombisaka ndlela leyi Yehovha a va khathaleleke ha yona ni ndlela leyi ku n’wi tirhela swi va tsakisaka ha yona. (Mint. 20:35) Ku tlula kwalaho, malandza hinkwawo ya Yehovha lama khuvuriweke ma nga tiphina hi nkateko wa ku “lava mfumo ni ku lulama ka [Xikwembu] ku sungula” va ri xiphemu xa vamakwerhu va le misaveni hinkwayo.—Mat. 6:33.

Ku Sirheleleka “eNdhawini Ya Le Xihundleni”

10, 11. I yini “[ndhawu] ya le xihundleni ya La nge Henhla-henhla,” naswona hi nga nghena njhani eka yona?

¹⁰ Ku tinyiketela ni ku khuvuriwa swi endla leswaku  munhu a kuma nkateko wun’wana lowukulu—lunghelo ra ku tshama “endhawini ya le xihundleni ya La nge Henhla-henhla.” (Hlaya Pisalema 91:1.) Leyi i ndhawu yo fanekisela leyi sirhelelekeke ni leyi hlayisekeke—xiyimo xa ku sirheleleka eka khombo ra moya. I ‘ndhawu ya le xihundleni’ hikuva yi kumiwa ntsena hi vanhu lava vonaka timhaka hi ndlela leyi Xikwembu xi ti vonaka ha yona va tlhela va xi tshemba. Loko hi hanya hi ku pfumelelana ni ku tinyiketela ka hina hi tlhela hi kombisa leswaku hi n’wi tshemba hi ku helela Yehovha, entiyisweni hi ri eka yena: “U vutumbelo bya mina ni khokholo ra mina, Xikwembu xanga, lexi ndzi nga ta tshembela eka xona.” (Ps. 91:2) Yehovha Xikwembu u va ndhawu ya hina yo tshama eka yona leyi sirhelelekeke. (Ps. 91:9) A ku na ndhawu yin’wana leyi sirhelelekeke ku tlula ndhawu yoleyo.

¹¹ Ku kota ku nghena “endhawini ya le xihundleni” ya Yehovha swi tlhela swi vula leswaku hi katekisiwe hi lunghelo ra ku va ni vuxaka na yena. Vuxaka byebyo byi sungula loko hi tinyiketela kutani hi khuvuriwa. Endzhaku ka sweswo, hi kurisa vuxaka bya hina na Xikwembu hi ku tshinela eka xona hi ku dyondza Bibele, ku khongela swi huma embilwini ni ku xi yingisa hi ku helela. (Yak. 4:8) A nga kona munhu loyi a tshameke a va ekusuhi swinene na Yehovha ku tlula Yesu, loyi a tshembeke Muvumbi minkarhi hinkwayo. (Yoh. 8:29) Hikwalaho, hi nga tshuki hi kanakana Yehovha kumbe ku navela ka yena ni vuswikoti bya yena bya ku hi pfuna leswaku hi hetisisa xihlambanyo xa hina xa ku tinyiketela eka yena. (Ekl. 5:4) Malunghiselelo ya moya lawa Xikwembu xi ma lunghiseleleke vanhu va xona i vumbhoni lebyi tiyeke bya leswaku xa hi rhandza hakunene naswona xi lava leswaku swilo swi hi fambela kahle loko hi xi tirhela.

Yi Teke Yi Ri Ya Risima Paradeyisi Ya Hina Ya Moya

12, 13. (a) I yini paradeyisi ya moya? (b) Hi nga swi kotisa ku yini ku pfuna vanhu lavantshwa?

¹² Ku tinyiketela ni ku khuvuriwa swi tlhela swi hi pfulela ndlela yo tshama eparadeyisini ya moya leyi katekisiweke. I xiyimo xo hlawuleka xa moya lexi ni vapfumeri-kulorhi va nga eka xona, laha va nga ni ku rhula na Yehovha Xikwembu swin’we na hi xivona. (Ps. 29:11; Esa. 54:13) Misava leyi a yi na wona nchumu lowu swi nga fanelaka ku wu fanisa ni paradeyisi ya hina ya moya. Leswi swi vonaka kahle ngopfu-ngopfu loko ku ri ni ntsombano wa matiko, laha vamakwerhu va xinuna ni va xisati lava humaka ematikweni yo tala, lava vulavulaka tindzimi to hambana-hambana ni lava humaka etinxakeni to hambana-hambana va hlanganaka hi moya wo rhula, wa vun’we va tlhela va rhandzana.

¹³ Paradeyisi ya moya leyi hi tiphinaka ha yona yi hambana swinene ni swiyimo leswi tsemaka nhlana leswi nga kona emisaveni namuntlha. (Hlaya Esaya 65:13, 14.) Hi ku chumayela rungula ra Mfumo, hi ni lunghelo ra ku rhamba van’wana leswaku va nghena eparadeyisini ya moya. Nakambe i nkateko ku pfuna lava ha ku sungulaka ku hlanganyela evandlheni naswona va nga ta vuyeriwa loko va leteriwa ensin’wini. Loko vakulu va hi komberile, hi nga ha katekisiwa hi lunghelo ra ku pfuna vanhu vo karhi, hilaha Akhwila na Prisila va “[hlamuseleke] ndlela ya Xikwembu hilaha ku lulameke” eka Apolosi hakona.—Mint. 18:24-26.

Hambeta U Dyondza Eka Yesu

14, 15. Hi swihi swivangelo leswi twalaka leswi hi nga na swona swo hambeta hi dyondza hi Yesu?

¹⁴ Hi ni swivangelo leswi twalaka swo hambeta hi dyondza eka Yesu. Loko a nga si va munhu wa nyama, Yesu u hete magidi ya malembe yo tala swinene a ri karhi a tirha na Tata wa yena. (Swiv. 8:22, 30) A a swi tiva leswaku ndlela leyinene yo hanya i ya ku tirhela Xikwembu ni ku nyikela vumbhoni hi ntiyiso. (Yoh. 18:37) A swi ri erivaleni eka Yesu leswaku ku hanya hi ndlela yin’wana a ku ta va ku ri vutianakanyi ni vuphukuphuku. A a swi tiva leswaku u ta ringiwa hi ndlela leyikulu kutani a dlayiwa. (Mat. 20:18, 19; Hev. 4:15) Tanihi Xikombiso xa hina, u hi dyondzise ndlela leyi hi nga tshembekaka ha yona.

¹⁵ Endzhakunyana ka loko Yesu a khuvuriwile, Sathana u n’wi ringile leswaku a fularhela ndlela leyinene yo hanya ha yona—kambe u tsandzekile. (Mat. 4:1-11) Leswi swi hi dyondzisa leswaku ku nga khathariseki leswaku Sathana u endla yini, hi nga tshama hi tshembekile. U tala ku hlasela lava va lavaka ku khuvuriwa swin’we ni lava va ha ku khuvuriwaka. (1 Pet. 5:8) Swirho swa mindyangu ya hina swi nga ha hi kaneta hikwalaho ka leswi swi byeriweke rungula leri hoxeke malunghana ni Timbhoni ta Yehovha naswona swi nga ha anakanya leswaku swa hi sirhelela. Kambe, miringo yo tano yi hi nyika nkarhi wo kombisa timfanelo letinene ta Vukreste, to tanihi xichavo ni vuxiya-xiya, loko hi  hlamula swivutiso ni loko hi chumayela. (1 Pet. 3:15) Hikwalaho mintokoto yoleyo yi nga va ni vuyelo lebyinene eka lava va hi yingiselaka.—1 Tim. 4:16.

Namarhela Ndlela Leyinene Yo Hanya Ha Yona!

16, 17. (a) Hi swihi swilaveko swinharhu swa xisekelo swo hanya ha swona leswi kumekaka eka Deteronoma 30:19, 20? (b) Yesu, Yohane na Pawulo va swi seketele njhani leswi Muxe a swi tsaleke?

¹⁶ Kwalomu ka malembe ya 1 500 Yesu a nga si ta laha misaveni, Muxe u khutaze Vaisrayele ku hlawula ndlela leyinene yo hanya ha yona. U te: “Ndzi teka matilo ni misava swi va timbhoni ehenhla ka n’wina namuntlha, leswaku ndzi veke vutomi ni rifu, nkateko ni ndzhukano emahlweni ka n’wina; mi fanele mi hlawula vutomi leswaku mi ta ya emahlweni mi hanya, n’wina ni vana va n’wina, hi ku rhandza Yehovha Xikwembu xa n’wina, hi ku yingisa rito rakwe ni ku n’wi namarhela.” (Det. 30:19, 20) Vaisrayele a va tshembekanga eka Xikwembu, kambe swilaveko swinharhu swa xisekelo swo hanya ha swona leswi boxiweke hi Muxe a swi cincanga. Swi tlhele swi vuriwa hi Yesu ni hi van’wana.

¹⁷ Xo sungula, ‘hi fanele hi rhandza Yehovha Xikwembu xa hina.’ Hi kombisa leswaku hi rhandza Xikwembu hi ku hanya hi ku pfumelelana ni tindlela ta xona to lulama. (Mat. 22:37) Xa vumbirhi, ‘hi fanele hi yingisa rito ra Yehovha’ hi ku dyondza Rito ra Xikwembu hi tlhela hi yingisa swileriso swa xona. (1 Yoh. 5:3) Sweswo swi vula leswaku hi fanele hi va kona nkarhi na nkarhi eminhlanganweni ya Vukreste, laha ku buriwaka hi Bibele. (Hev. 10:23-25) Xa vunharhu, ‘hi fanele hi namarhela Yehovha.’ Ku nga khathariseki leswaku hi fanele hi langutana na yini, minkarhi hinkwayo a hi kombiseni ripfumelo eka Xikwembu hi tlhela hi landzela N’wana wa xona.—2 Kor. 4:16-18.

18. (a) Xihondzo xo Rindza xi wu hlamusele njhani ntiyiso hi 1914? (b) Hi fanele hi titwa njhani hi ku vonakala ka ntiyiso namuntlha?

¹⁸ Hakunene i nkateko lowukulu ku hanya hi ku pfumelelana ni ntiyiso wa le Bibeleni! Hi 1914, ku kandziyisiwe mhaka leyi ya nkoka eka Xihondzo xo Rindza: “Xana hina a hi vanhu lava katekisiweke, lava tsakeke? Xana Xikwembu xa hina a xi tshembeki? Loko munhu wihi na wihi a tiva ku ri ni nchumu wun’wana wo antswa ku tlula lowu, a a teke wona. Loko munhu wihi na wihi exikarhi ka n’wina a kuma nchumu wo antswa ku tlula lowu, hi tshemba leswaku u ta hi byela. A wu kona nchumu wo antswa ku tlula lowu hi wu kumeke eRitweni ra Xikwembu. . . . A swi koteki ku hlamusela ku rhula, ntsako ni nkateko lowu timbilu ta hina ni vutomi bya hina byi veke na swona hikwalaho ka ku xi tiva kahle Xikwembu xa ntiyiso. Mhaka ya Vutlhari bya Xikwembu, Vululami bya xona, Matimba ya xona ni Rirhandzu ra xona yi ku enerisa hi ku helela ku navela ka mianakanyo ya hina ni ka timbilu ta hina. Se hi enerisekile. Nchumu lowu hi wu navelaka i ku kurisa vutivi bya hina malunghana ni Xikwembu.” (Xihondzo xo Rindza [xa Xinghezi] xa December 15, 1914, matluka 377-378) Ndlela leyi hi ku tlangelaka ha yona ku vonakala ka moya ni ntiyiso a yi hundzuki. Hakunene, sweswi hi ni xivangelo lexikulu xo tsaka hi leswi hi “famba[ka] eku vonakaleni ka Yehovha.”—Esa. 2:5; Ps. 43:3; Swiv. 4:18.

19. Ha yini lava fanelekelaka ku ya khuvuriwa va fanele va teka goza rolero hi xihatla?

¹⁹ Loko u lava ku “famba eku vonakaleni ka Yehovha” kambe u nga si va Mukreste la tinyiketeleke a tlhela a khuvuriwa, u nga ha heti nkarhi. Endla xin’wana ni xin’wana lexi lavekaka leswaku u fikelela swilaveko swa le Bibeleni swa ku khuvuriwa, ku nga ndlela yo hlawuleka yo kombisa ku nkhensa leswi Xikwembu na Kreste va hi endleleke swona. Nyika Yehovha nchumu wa risima swinene lowu u nga na wona—vutomi bya wena. Kombisa leswaku u tiyimisele ku endla ku rhandza ka Xikwembu hi ku landzela N’wana wa xona. (2 Kor. 5:14, 15) Handle ko kanakana, yoleyo i ndlela leyinene yo hanya ha yona!

U Nga Hlamula Njhani?

• Ku khuvuriwa ka hina ku kombisa yini?

• Loko munhu a tinyiketela eka Xikwembu a tlhela a khuvuriwa u ta kuma mikateko yihi?

• Ha yini swi ri swa nkoka swinene ku dyondza eka Yesu?

• I yini lexi nga ta hi pfuna leswaku hi namarhela ndlela leyinene yo hanya ha yona?

[Swivutiso Swa Dyondzo]

[Xifaniso lexi nga eka tluka 25]

Ku khuvuriwa ka wena ku kombisa leswaku u hlawule ndlela leyinene yo hanya ha yona

[Swifaniso leswi nga eka tluka 26]

Xana u sirhelelekile “endhawini ya le xihundleni”?