Swivutiso Swa Vahlayi

Xana swi fanerile leswaku makwerhu wa xisati a funengeta nhloko loko a toloka tinkulumo ta Bibele hi ririmi ra mavoko eminhlanganweni ya Vukreste, etinhlengeletanweni kumbe emintsombanweni?

Entiyisweni, wansati la nga Mukreste u fanele a ambala xo funengeta nhloko loko a endla mintirho leyi hi ntolovelo yi endliwaka hi nuna wa yena kumbe makwerhu wo karhi wa xinuna evandlheni. Leswi swi fambisana ni nawu lowu kongomisaka lowu vuriweke hi muapostola Pawulo wa leswaku “wansati un’wana ni un’wana loyi a khongelaka kumbe ku profeta a nga funengelanga nchumu enhlokweni u tsongahata nhloko ya yena” hikuva “nhloko ya wansati i wanuna.” (1 Kor. 11:3-10) Loko makwerhu wa xisati a ambala xo funengeta nhloko lexi xiximekaka ni lexi fanelekaka eka swiyimo sweswo, u va a komba leswaku wa titsongahata eka malunghiselelo ya Xikwembu lama nga kona evandlheni ra Vukreste.—1 Tim. 2:11, 12. *

Kambe, xana ku vuriwa yini eka xiyimo lexi makwerhu wa xinuna a nyikelaka nkulumo ivi ku hundzuluxela makwerhu wa xisati hi ririmi ra mavoko? I ntiyiso leswaku makwerhu yoloye wa xisati u hundzisa rungula leri sukaka eka xivulavuri ri ya eka vayingiseri. Sweswo swi vula leswaku a hi yena la dyondzisaka kambe ku dyondzisa makwerhu wa xinuna loyi a n’wi tolokelaka. Hambiswiritano, ndlela leyi ririmi ra mavoko ri tolokiwaka ha yona yi hambanile swinene ni ndlela leyi tindzimi leti vulavuriwaka ti tolokiwaka ha yona. Loko ku tolokiwa tindzimi leti vulavuriwaka, vayingiseri va nga yingisela xivulavuri va tlhela va yingisela ni loyi a tolokaka. Nakambe, ku hambana ni loko ku tolokiwa ririmi ra mavoko, vamakwerhu va xisati lava tolokaka tindzimi leti vulavuriwaka, hi ntolovelo nyingiso a wu dzikisiwi eka vona. Minkarhi yin’wana, va nga ha hlawula ku tshama ehansi loko va ri karhi va toloka kumbe loko va yimile, va nga languta xivulavuri ematshan’weni yo languta vayingiseri. Kutani a swi nge bohi leswaku makwerhu wa xisati la tolokaka a yisa eka ririmi leri vulavuriwaka a funengeta nhloko.

Ku engetela kwalaho, hikwalaho ka swilo swa  thekinoloji leswi tirhisiwaka loko nkulumo yi tolokiwa hi ririmi ra mavoko, minkarhi yo tala loyi a tolokaka hi yena la voniwaka hi vayingiseri. Hakanyingi loyi a tolokaka hi ririmi ra mavoko hi yena a humelelaka eka thelevhixini, kasi swi nga ha endleka leswaku vayingiseri va nga n’wi voni loyi a nyikelaka nkulumo. Hikwalaho ka leswi, swi ta va swi ri swinene leswaku makwerhu wa xisati la tolokaka hi ririmi ra mavoko a xixima ntirho wa yena wo toloka hi ku funengeta nhloko.

Xana nkongomiso lowu, lowu antswisiweke wu yi khumba njhani mhaka ya ku toloka hi ririmi ra mavoko eka swiyenge swo karhi swa Xikolo xa Vutirheli bya le Tilweni, minkombiso ni loko ku hlamuriwa hi nkarhi wa Dyondzo ya Bibele ya Vandlha, Nhlangano wa Ntirho ni loko ku ri Dyondzo ya Xihondzo xo Rindza? Xana makwerhu wa xisati loyi a tolokaka hi ririmi ra mavoko u fanele a funengeta nhloko loko a toloka swiyenge leswi? Minkarhi yin’wana a swi bohi leswaku makwerhu wa xisati a funengeta nhloko, hikuva hinkwavo lava nga kona enhlanganweni wolowo va fanele va swi twisisa leswaku a hi yena a wu fambisaka. Hi xikombiso, a nge funengeti nhloko loko a toloka tinhlamulo ta vayingiseri, tinkulumo leti nyikeriwaka hi vamakwerhu va xisati kumbe minkombiso. Hambiswiritano, loko a toloka tinkulumo ta vamakwerhu va xinuna hi nkarhi wa minhlangano yoleyo, loko a tolokela makwerhu la fambisaka Dyondzo ya Xihondzo xo Rindza kumbe loyi a fambisaka Dyondzo ya Bibele ya Vandlha, kumbe loko a rhangela eku yimbeleriseni ka tinsimu, u fanele a funengeta nhloko. Hi nkarhi wa minhlangano, swi nga ha lava leswaku makwerhu wa xisati a tolokela vamakwerhu va xinuna, va xisati, vana swin’we ni vakulu. Hikwalaho, swi nga va swinene leswaku a funengeta nhloko kukondza minhlangano yi hela.

[Nhlamuselo ya le hansi]