Xana U Swi Lunghekerile Ku Lwela Ripfumelo Ra Wena?

XANA u tshama u tikuma u ri eka xiyimo lexi u titweke u boheka ku lwela ripfumelo ra wena? Xiya leswi humeleleke Susana, makwerhu wa xisati wa malembe ya 16 hi vukhale wa le Paraguay. Loko a ri etlilasini exikolweni xa vona, ku vuriwe leswaku Timbhoni ta Yehovha a ti pfumeli eka “Testamente ya Khale,” eka Yesu Kreste, kumbe eka Mariya. Ku tlhele ku vuriwa ni leswaku Timbhoni ti hisekela etlhelo lerova swi nga antswa ti fa ematshan’weni yo amukela vutshunguri byo karhi. Xana a wu ta va u endle yini?

Susana u khongele eka Yehovha kutani a tlakusa voko ra yena. Mudyondzisi a a ri ekusuhi ni ku huma etlilasini, kutani u kombele mpfumelelo eka mudyondzisi wakwe leswaku a vulavurisana ni vadyondzi-kulobye malunghana ni leswi a swi pfumelaka tanihi leswi a nga Mbhoni ya Yehovha. Mudyondzisi wakwe u pfumerile. Eka mavhiki mambirhi lama landzeleke, Susana u lunghiselele rungula rakwe a tirhisa broxara leyi nge Timbhoni Ta Yehovha—I Vamani? Ti Pfumela Yini Ke?

Siku ra mbulavurisano ri fikile. Susana u hlamusele leswaku ha yini hi vitaniwa Timbhoni ta Yehovha. U tlhele a hlamusela ntshembo wa hina wa vumundzuku nileswaku ha yini hi nga pfumeli ku pomperiwa ngati. Kutani u nyike swichudeni nkarhi wo vutisa swivutiso. Swichudeni swo tala swi vutisile. Mudyondzisi u tsakile loko a twa xinhwanyatana lexi xi hlamula swivutiso leswi hi Matsalwa.

Xichudeni xin’wana xi te: “Ndzi tshame ndzi ya eHolweni ya Mfumo, naswona a ndzi vonanga ni xifaniso ni xin’we.” Mudyondzisi u lave ku tiva leswaku ha yini. Susana u hlaye Pisalema 115:4-8 na Eksoda 20:4. Hi ku hlamala, mudyondzisi u te: “Swi tisa ku yini leswaku tikereke ta hina ti va ni swifaniso swo tala kasi Bibele yi vula leswaku swi hoxile ku tirhisa swifaniso swa vukhongeri?”

Bulo ra swivutiso ni tinhlamulo ri ye emahlweni ku ringana timinete ta 40. Loko Susana a vutise swichudeni loko swi swi tsakela ku hlalela vhidiyo leyi nge, No Blood—Medicine Meets the Challenge, hinkwaswo a swi lava ku yi hlalela. Kutani mudyondzisi u veke nkarhi wun’wana leswaku bulo ri ta yisiwa emahlweni hi xa mundzuku wa kona. Endzhaku ko vona vhidiyo, Susana u hlamusele leswaku Timbhoni ta Yehovha tin’wana ti pfumela ku tshunguriwa hi tindlela tin’wana leti ku nga tirhisiwiki ngati. Malunghana na byona, mudyondzisi u te: “A ndzi nga swi tivi leswaku ku ni tindlela to tala ta vutshunguri leti ku nga tirhisiwiki ngati; naswona a ndzi nga swi tivi leswaku ku ni vuyelo lebyinene byo tirhisa vutshunguri lebyi ku nga tirhisiwiki ngati. Xana i Timbhoni ta Yehovha ntsena leti tshunguriwaka hi ndlela yoleyo?” Loko mudyondzisi a twa leswaku mani na mani a nga tshunguriwa hi ndlela yoleyo, u te: “Loko Timbhoni ta Yehovha ti ndzi endzela ekaya, ndzi ta vulavula na tona.”

Susana a a lunghiselele mbulavurisano wa 20 wa timinete kambe wu hete  tiawara tinharhu. Endzhaku ka vhiki, swichudeni swin’wana swi vulavule hi leswi swi pfumelaka eka swona tanihi leswi a swi nghena tikereke. Loko swi heta ku vulavula, ku vutisiwe swivutiso swo tala, kambe swichudeni swoleswo swi tsandzekile ku lwela ripfumelo ra swona. Mudyondzisi u swi vutisile a ku: “Xana swi ta njhani mi tsandzeka ku lwela ripfumelo ra n’wina kasi xichudeni-kulobye lexi nga Mbhoni ya Yehovha xi ri lwerile?”

Swi te: “Lava va dyondza Bibele hakunene. Hina a hi yi dyondzi.”

Mudyondzisi u vulavule na Susana a ku: “Kunene n’wina ma yi dyondza Bibele naswona mi endla matshalatshala yo endla leswi yi swi vulaka. Mi fanele mi bumabumeriwa.”

Susana a a ta va a miyerile. Kambe, hi ku vulavula ka yena u landzele xikombiso lexinene xa xinhwanyatana xa Muisrayele lexi vito ra xona ri nga boxiwangiki, lexi a xi yisiwe evuhlongeni hi Vasiriya. Xinhwanyatana lexi xi hetelele xi ri ekaya ra Namani ndhuna-nkulu ya le Siriya, loyi a a ri ni vuvabyi byo nyenyetsa bya nhlonge. Xinhwanyatana xa Muisrayele xi vulavule ni n’wini wa xona wa xisati xi ku: “Loko hosi yanga a yi ri emahlweni ka muprofeta loyi a nga eSamariya! Hi ndlela yoleyo a a ta n’wi hanyisa eka nhlokonho yakwe.” Xinhwanyatana lexi xi susumeteleke ku nyikela vumbhoni malunghana ni Xikwembu xa ntiyiso. Sweswo swi endle leswaku Namani a hetelela a ve mugandzeri wa Yehovha.—2 Tih. 5:3, 17.

Hilaha ku fanaka, Susana a nga tshikanga ku nyikela vumbhoni malunghana na Yehovha ni vanhu va yena. Hi ku lwela ripfumelo ra yena loko leswi a swi pfumelaka swi soriwa, Susana a a yingisa xileriso xa le Matsalweni lexi nge: “Kwetsimisani Kreste tanihi Hosi etimbilwini ta n’wina, nkarhi hinkwawo mi lunghekela ku tihlamulela emahlweni ka mani na mani la lavaka ku tiva hi ta ntshembo lowu mi nga na wona, kambe mi swi endla hi moya wo rhula ni xichavo lexi enteke.” (1 Pet. 3:15) Xana u swi lunghekerile ku lwela ripfumelo ra wena loko u pfulekeriwa hi nkarhi wo endla tano?

[Xifaniso lexi nga eka tluka 17]

Broxara leyi ni vhidiyo leyi swi nga ku pfuna leswaku u lwela ripfumelo ra wena