Swivutiso Swa Vahlayi

Muapostola Pawulo u vule leswaku ‘tiko hinkwaro ra Israyele ri ta ponisiwa.’ (Rhom. 11:26) Xana a a vula leswaku a ku ta fika nkarhi lowu Vayuda hinkwavo a va ta hundzuka va va Vakreste?

Doo, Pawulo a a nga vuli swona sweswo. Rixaka leri a ri ri vatukulu va Abrahama ri fularhele Yesu la nga Mesiya. Emalembeni ya le ndzhaku ka ku fa ka Yesu, swi ve erivaleni leswaku Vayuda hinkwavo a va nga ta hundzuka Vakreste. Hambiswiritano, marito ya Pawulo lama nge ‘tiko hinkwaro ra Israyele ri ta ponisiwa’ a ma ri ntiyiso. Hi ndlela yihi?

Yesu u byele varhangeri va vukhongeri va Vayuda va le nkarhini wakwe a ku: “Mfumo wa Xikwembu wu ta tekiwa eka n’wina wu nyikiwa tiko leri humesaka mihandzu ya wona.” (Mat. 21:43) Leswi tiko hinkwaro ra Israyele ri landzuleke Yesu, Yehovha a a ta sungula ku khathala hi tiko lerintshwa ra moya. Tiko leri, Pawulo u ri vule “Israyele wa Xikwembu.”—Gal. 6:16.

Tindzimana tin’wana eMatsalweni ya Vukreste ya Xigriki ti tiyisekisa leswaku “Israyele wa Xikwembu” u vumbiwa hi Vakreste lava totiweke hi moya va 144 000. (Rhom. 8:15-17; Nhlav. 7:4) Leswaku ntlawa lowu a wu ta katsa ni lava nga riki Vayuda swi tiyisekisiwe eka Nhlavutelo 5:9, 10, leyi kombisaka leswaku Vakreste lava totiweke va huma “eka tinyimba hinkwato ni tindzimi hinkwato ni vanhu hinkwavo ni matiko hinkwawo.” Swirho swa Israyele wa moya kahle-kahle a swi hlawuleriwe ku ‘va mfumo ni vaprista naswona swi ta va tihosi emisaveni.’ Hambileswi Yehovha a fularheleke Israyele tanihi tiko leri hlawuriweke, kambe vanhu va tiko rero a va ta swi kota ku va ni vuxaka lebyinene na yena. Swi ve tano hi vaapostola ni Vakreste van’wana vo tala vo sungula. Ina, Vayuda volavo, ku fana ni vanhu lavan’wana hinkwavo a va fanele va xaviwa hi ngati ya Yesu Kreste.—1 Tim. 2:5, 6; Hev. 2:9; 1 Pet. 1:17-19.

Mhaka ya leswaku Vayuda vo tala va ntumbuluko va le ka lembe-xidzana ro sungula va lahlekeriwe hi lunghelo ra ku fuma swin’we na Yesu a yi ku sivelanga ku hetiseka ka xikongomelo xa Xikwembu. Xikongomelo xa Yehovha a xi nga ta siveriwa hikuva u vule hi ku tirhisa muprofeta wakwe a ku: “Hikwalaho ni rito ra mina leri humaka enon’wini wa mina ri ta endlisa sweswo. A ri nge tlheleli eka mina ri nga ri na vuyelo, kambe kunene ri ta endla leswi ndzi swi tsakelaka, naswona ri ta humelela hakunene eka leswi ndzi ri rhumeleke swona.”—Esa. 55:11.

Xikongomelo xa Xikwembu a xi nge cinci loko swi ta emhakeni ya ku veka lava 144 000 leswaku va fuma swin’we ni N’wana wa xona etilweni. Bibele yi swi veka erivaleni leswaku Xikwembu a xi ta tota vanhu lava endlaka nhlayo leyi heleleke ya 144 000. A ku nga ta kayivela ni un’we!—Nhlav. 14:1-5.

Xisweswo, loko Pawulo a tsala leswaku ‘tiko hinkwaro ra Israyele ri ta ponisiwa,’ a a nga vuli swona leswaku Vayuda hinkwavo a va ta hundzuka Vakreste. Ematshan’weni ya sweswo, a a vula leswaku xikongomelo xa Xikwembu xa leswaku Vaisrayele va moya va 144 000 lava nga ta fuma ni N’wana wa xona, Yesu Kreste etilweni, a xi ta hetiseka. Hi nkarhi lowu faneleke wa Xikwembu, nhlayo leyi heleleke ya “tiko hinkwaro ra Israyele” yi ta ponisiwa, kutani eku heteleleni yi ta fuma tanihi tihosi ni vaprista eMfun’weni wa Mesiya.—Efe. 2:8.

[Swifaniso leswi nga eka tluka 28]

Vatotiwa va huma “eka tinyimba hinkwato ni tindzimi hinkwato ni vanhu hinkwavo ni matiko hinkwawo”