Amukela Vulawuri Bya Yehovha
Amukela Vulawuri Bya Yehovha
“Ku rhandza Xikwembu, hi kona ku hlayisa swileriso swa xona; kasi loko swi ri swileriso swa xona a swi tiki.”—1 YOH. 5:3.
1, 2. (a) Ha yini mhaka ya ku titsongahatela vulawuri yi nyangatsa vanhu vo tala namuntlha? (b) Xana vanhu lava nga laviki ku titsongahatela vulawuri bya van’wana va tilawula hakunene? Hlamusela.
NAMUNTLHA vanhu a va swi lavi ku lawuriwa. Vo tala va vula leswaku swa nyangatsa ku titsongahata eka munhu un’wana. Vanhu lava nga laviki ku titsongahatela vulawuri bya van’wana va tibyele leswaku, “A ku na munhu la nga ndzi byelaka leswi ndzi faneleke ndzi swi endla.” Kambe, xana vanhu lava va tilawula hakunene? Nikatsongo! Vo tala va landzela nkongomiso lowu vunyingi byi wu landzelaka tanihi leswi byi “titwananisa[ka] ni mafambiselo lawa ya swilo.” (Rhom. 12:2) Hi ku ya hi marito ya muapostola Petro loyi a a ri Mukreste, vanhu lava a va tilawuli, kahle-kahle i “mahlonga ya ku onhaka.” (2 Pet. 2:19) Va famba “hi ku ya hi mafambiselo ya swilo ya misava leyi, hi ku ya hi mufumi wa vulawuri bya moya,” Sathana Diyavulosi.—Efe. 2:2.
2 Mutsari un’wana u vule hi ku tibuma a ku: “A ndzi titshegi hi vatswari va mina kumbe mudyondzisi kumbe muprista, kumbe Bibele leswaku ndzi byeriwa leswinene leswi ndzi faneleke ndzi swi endla.” Van’wana va byi tirhisa hi ndlela yo biha vulawuri bya vona naswona a hi fanelanga hi va yingisa. Kambe xana ku ala leswaku ha wu lava nkongomiso hi yona nhlamulo? Loko hi languta tinhloko-mhaka ta maphepha-hungu hi kuma nhlamulo leyi nga tsakisiki. Swi twisa ku vava leswaku enkarhini lowu vanhu va wu lavaka swinene nkongomiso, vanhu vo tala a va ha tiyimiselanga ku wu amukela.
Ndlela Leyi Hi Tekaka Vulawuri Ha Yona
3. Vakreste va lembe-xidzana ro sungula va swi kombise njhani leswaku a va endli xin’wana ni xin’wana lexi valawuri va lavaka leswaku va xi endla handle ko lava ku tiva xivangelo?
3 Tanihi Vakreste, hi ni langutelo leri hambaneke ni ra vanhu va misava loko swi ta emhakeni ya vulawuri. Kambe sweswo a swi vuli swona leswaku hi endla hinkwaswo leswi hi byeriwaka swona handle ko lava ku tiva xivangelo xa kona. Ku hambana ni sweswo, minkarhi yin’wana hi fanele hi ala ku yingisa nawu wa vanhu van’wana hambiloko va ri ni vulawuri byo karhi. Ni Vakreste va lembe-xidzana ro sungula va endle tano. Hi xikombiso, loko vaapostola va byeriwe leswaku va tshika ku chumayela, a va n’wi yingisanga muprista lonkulu ni valawuri lavan’wana lava a va ri swirho swa Sanedri. A va tshikanga ku tikhoma hi ndlela leyinene leswaku va ta titsongahatela vulawuri bya vanhu.—Hlaya Mintirho 5:27-29.
4. Hi swihi swikombiso leswi kumekaka eMatsalweni ya Xiheveru leswi kombisaka leswaku vanhu vo tala va Xikwembu va endle swiboho leswi a swi nga tolovelekanga?
4 Malandza yo tala ya Xikwembu ya le mahlweni ka nguva ya Vukreste na wona ma endle tano. Hi xikombiso, Muxe “u ale ku vuriwa n’wana wa N’wa-Faro, a hlawula ku xaniseka ni vanhu va Xikwembu” hambileswi ku endla sweswo a swi ta ‘hlundzukisa hosi.’ (Hev. 11:24, 25, 27) Yosefa u ale ku etlela ni nkata Potifaro hambileswi a a swi tiva leswaku nsati loyi u ni matimba yo tirihisela eka yena. (Gen. 39:7-9) Daniyele na yena “a a tiyimiserile embilwini yakwe leswaku a a nga ta tinyamisa hi switshongo swa hosi,” hambileswi mutirhi lonkulu wa le hubyeni ya Babilona a swi n’wi tikela ku amukela mhaka yoleyo. (Dan. 1:8-14) Swikombiso leswi swi swi veka erivaleni leswaku vanhu va Xikwembu i khale va lwela swilo leswinene ku nga khathariseki vuyelo bya kona. A va yingisanga vanhu leswaku va ta amukeleka eka vona; na hina hi fanele hi endla tano.
5. Ndlela leyi hi byi langutaka ha yona vulawuri yi hambane njhani ni ndlela leyi vanhu va misava va byi langutaka ha yona?
5 Ku va ni xivindzi ka hina a ku fanelanga ku hlanganisiwa ni ku tiomisa nhloko; nakambe a hi fani ni lava xandzukaka lava kombisaka leswaku a va pfumelelani ni fambiselo ra politiki. Ematshan’weni ya sweswo, hi tiyimisele ku amukela vulawuri bya Yehovha ku tlula bya munhu. Loko nawu wa munhu wu lwisana ni nawu wa Xikwembu, hi xi tiva kahle xiboho lexi hi faneleke hi xi endla. Ku fana ni vaapostola va le ka lembe-xidzana ro sungula, hi yingisa Xikwembu tanihi mufumi ku tlula vanhu.
6. Ha yini minkarhi hinkwayo swi ri swa nkoka ku yingisa milawu ya Yehovha?
6 I yini lexi hi pfuneke leswaku hi amukela vulawuri bya Xikwembu? Hi pfumelelana ni leswi vuriweke eka Swivuriso 3:5, 6, leyi nge: “Tshemba Yehovha hi mbilu ya wena hinkwayo naswona u nga titshegi hi ku twisisa ka wena n’wini. N’wi tivise tindlela ta wena hinkwato, kutani yena u ta lulamisa tindlela ta wena.” Ha tiyiseka leswaku swilo hinkwaswo leswi Xikwembu xi swi languteleke eka hina swi ta hetelela swi hi vuyerisile. (Hlaya Deteronoma 10:12, 13.) Yehovha u tihlamusele eka Vaisrayele tanihi “Loyi a ku dyondziselaka ku ku pfuna, Loyi a ku fambisaka endleleni leyi u faneleke u famba hi yona.” U tlhele a ku: “Kunene loko a wu yingise swileriso swa mina! Kutani ku rhula ka wena a ku ta fana ni nambu, ni ku lulama ka wena a ku ta fana ni magandlati ya lwandle.” (Esa. 48:17, 18) Ha ma tshemba marito wolawo. Ha tiyiseka leswaku ku yingisa milawu ya Xikwembu swi vuyerisa hina.
7. Hi fanele hi endla yini loko hi nga xi twisisi xileriso xo karhi lexi tsariweke eRitweni ra Xikwembu?
7 Hi amukela vulawuri bya Yehovha ni ku n’wi yingisa hambiloko hi nga xi twisisi hi laha ku heleleke xivangelo xa nawu wo karhi lowu tsariweke eRitweni ra yena. Leswi a swi vuli swona leswaku hi pfumela lexi hi nga xi tiviki; kambe swi vula ku n’wi tshemba. Swi kombisa leswaku hi tshemba hi mbilu hinkwayo leswaku Yehovha wa swi tiva leswi nga swinene eka hina. Ku yingisa ka hina i xikombiso xin’wana xa leswaku hi rhandza Yehovha, hikuva muapostola Yohane u tsale a ku: “Ku rhandza Xikwembu, hi kona ku hlayisa swileriso swa xona.” (1 Yoh. 5:3) Kambe ku ni swin’wana leswi hi faneleke hi nga swi honisi emhakeni yo yingisa.
Ku Letela Matimba Ya Hina Ya Ku Twisisa
8. ‘Ku leteriwa ka matimba ya hina ya ku twisisa’ swi fambisana njhani ni ku amukela vulawuri bya Yehovha?
8 Bibele yi hi byela leswaku hi fanele hi ‘letela matimba ya hina ya ku twisisa hi ku ma tirhisa leswaku hi hambanisa leswi lulameke ni leswi hoxeke.’ (Hev. 5:14) Hikwalaho, pakani ya hina a hi ku yingisa milawu ya Xikwembu ntsena hi nga rhanganga hi anakanya ha yona; ematshan’weni ya sweswo, hi lava ku kota ku “hambanisa leswi lulameke ni leswi hoxeke” hi ku ya hi milawu ya Yehovha. Hi lava ku vona vutlhari bya tindlela ta Yehovha leswaku hi ta vula hilaha mupisalema a vuleke hakona loko a ku: “Nawu wa wena wu le ndzeni ka swirho swa mina swa le ndzeni.”—Ps. 40:8.
9. Hi nga ri letela njhani ripfalo ra hina leswaku ri fambisana ni milawu ya Yehovha, naswona ha yini swi ri swa nkoka leswaku hi endla tano?
9 Leswaku hi twisisa milawu ya Xikwembu hilaha mupisalema a endleke hakona, hi fanele hi anakanyisisa hi leswi hi swi hlayaka eBibeleni. Hi xikombiso, loko hi dyondza hi nawu wo karhi wa Yehovha, hi nga ha tivutisa leswi: ‘Ha yini xileriso kumbe nsinya lowu wa nawu wu ri wa vutlhari? Ha yini swi ta ndzi vuyerisa ku wu yingisa? Hi byihi vuyelo byo biha lebyi kumiweke hi lava honiseke ndzayo leyi ya Xikwembu?’ Loko ripfalo ra hina ri pfumelelana ni tindlela ta Yehovha, hi ta endla swiboho leswi fambisanaka ni ku rhandza ka yena. Hi ta kota ku ‘hambeta hi twisisa leswi ku rhandza ka Yehovha ku nga swona,’ kutani hi yingisa. (Efe. 5:17) Leswi a hi minkarhi hinkwayo swi olovaka.
Sathana U Lava Leswaku Vulawuri Bya Xikwembu Byi Deleriwa
10. Hi kwihi laha Sathana a laveke leswaku vulawuri bya Xikwembu byi deleriwa?
10 I khale Sathana a lava leswaku vulawuri bya Xikwembu byi deleriwa. Moya wa yena wa ku tilawula wu vonaka hi tindlela to tala. Hi xikombiso, vona ndlela leyi vanhu va nga ri xiximiki ha yona lunghiselelo ra Xikwembu ra vukati. Van’wana va hlawula ku tshama swin’we va nga tekananga, kasi van’wana va hlawula ku dlaya vukati. Vanhu lava endlaka leswi va nga ha pfumelelana ni mutlangi wa tifilimi wa xisati la dumeke loyi a nga te: “A swi koteki ku va ni munghana un’we wa vukati.” U tlhele a ku: “A ku na munhu loyi ndzi n’wi tivaka loyi a tshembekeke eka munghana wa yena wa vukati kumbe la lavaka ku tshembeka.” Mutlangi un’wana wa tifilimi wa xinuna la dumeke loko a vulavula hi ku tshikiwa ka yena hi vavasati vo hlayanyana, na yena u te: “A ndzi tiyiseki loko ku ri leswaku i swa ntumbuluko ku tshama ni munghana un’we wa vukati vutomi bya hina hinkwabyo.” Hi fanele hi tivutisa leswi, ‘Xana ndza byi amukela vulawuri bya Yehovha emhakeni ya vukati kumbe ndzi ngheniwe hi langutelo ra misava?’
11, 12. (a) Ha yini swi nga ha va tikelaka vantshwa leswaku va amukela vulawuri bya Yehovha? (b) Hlamusela ntokoto lowu kombisaka khombo ra ku tlula milawu ni misinya ya milawu ya Yehovha.
11 Loko u ri muntshwa la nga enhlengeletanweni ya Yehovha, Sathana u ku yimele hi mahlo-ngati leswaku a ringeta ku ku kanganyisa u vona onge vulawuri bya Yehovha a byi ku pfuni nchumu. “Ku navela loku fambisanaka ni vuntshwa” swin’we ni ntshikilelo wa tintangha swi nga ha ku endla u anakanya leswaku milawu ya Xikwembu ya tika. (2 Tim. 2:22) U nga swi pfumeleli sweswo swi ku kanganyisa. Tikarhatele ku vona leswaku milawu ya Xikwembu i ya vutlhari. Hi xikombiso, Bibele yi ku byela leswaku u ‘balekela vumbhisa.’ (1 Kor. 6:18) Ni laha, tivutise swivutiso leswi landzelaka: ‘Ha yini xileriso lexi xi ri xa vutlhari? Xana loko ndzi xi yingisa swi ta ndzi vuyerisa njhani?’ Swi nga ha endleka u tiva vanhu vo karhi lava nga tshama va honisa ndzayo leyi ya Xikwembu. Xana va tsakile hakunene sweswi? Xana va hanya vutomi lebyi tsakisaka ku tlula lebyi a va byi hanya loko va ha ri enhlengeletanweni ya Yehovha? Xana hakunene va xi kumile xihundla xa ntsako lexi malandza hinkwawo ya Xikwembu ma vonakaka ma nga ri na xona?—Hlaya Esaya 65:14.
12 Xiya leswi tshameke swi vuriwa hi Mukreste la vuriwaka Sharon, u te: “Leswi ndzi fularheleke nawu wa Yehovha, se ndzi khomiwe hi vuvabyi lebyi dlayaka bya AIDS. Hakanyingi ndzi tsundzuka malembe yo tala lawa ndzi tiphineke ha wona ndzi tirhela Yehovha.” U swi xiyile leswaku a ku ri vuphukuphuku ku tlula milawu ya Yehovha ni leswaku a a fanele a yi teke yi ri ya nkoka swinene. Milawu ya Yehovha ya hi sirhelela. Sharon u fe endzhaku ka mavhiki ya nkombo a tsale marito lama nga laha henhla. Ntokoto wakwe wo vava wu swi veka erivaleni leswaku a ku na nchumu lexinene lexi Sathana a xi nyikaka lava va vaka xiphemu xa mafambiselo lawa yo biha. Tanihi leswi a nga “tata wa mavunwa,” u endla switshembiso swo tala, kambe a xi kona ni xin’we lexi a xi hetisisaka, hilaha a nga xi hetisisangiki xitshembiso lexi a xi endleke eka Evha. (Yoh. 8:44) Entiyisweni, minkarhi hinkwayo i swinene ku amukela vulawuri bya Yehovha.
Tivonele Eka Moya Wo Tilawula
13. Hi rini laha hi faneleke hi tivonela eka moya wo tilawula?
13 Loko hi amukela vulawuri bya Yehovha hi fanele hi tivonela eka moya wo tilawula. Moya wo tikukumuxa wu nga hi endla hi vona onge a hi lavi ku kongomisiwa hi munhu. Hi xikombiso, hi nga ha ala ndzayo leyi hi yi nyikiwaka hi vanhu lava rhangelaka vanhu va Xikwembu. Xikwembu xi simeke lunghiselelo ra leswaku hlonga ro tshembeka ni ro tlhariha ri phamela swakudya swa moya hi nkarhi lowu faneleke. (Mat. 24:45-47) Hi fanele hi swi xiya leswaku leyi hi yona ndlela leyi Yehovha a va khathalelaka ha yona vanhu vakwe namuntlha. Hi fanele hi fana ni vaapostola lavo tshembeka. Loko vadyondzisiwa van’wana va khunguvanyekile ivi va tshika ku n’wi landzela, Yesu u vutise vaapostola a ku: “N’wina a mi swi lavi ku famba, a hi swona ke?” Petro u te: “Hosi, xana hi ta ya eka mani? Hi wena u nga ni marito ya vutomi lebyi nga heriki.”—Yoh. 6:66-68.
14, 15. Ha yini hi fanele hi titsongahatela ndzayo ya le Bibeleni?
14 Ku amukela vulawuri bya Yehovha swi katsa ku landzela ndzayo leyi sekeriweke eRitweni ra yena. Hi xikombiso, ntlawa wa hlonga ro tshembeka ni ro tlhariha wu hi khutaza leswaku hi “[hiteka] hi hlayisa mianakanyo ya hina leyi hlutekeke.” (1 Tes. 5:6) Ndzayo yo tano ya fanela swinene emasikwini lawa yo hetelela tanihi leswi vanhu vo tala va nga ‘lava tirhandzaka, ni ku va varhandzi va mali.’ (2 Tim. 3:1, 2) Xana na hina hi nga va ni langutelo leri, leri tolovelekeke? Ina. Tipakani leti nga riki ta moya ti nga hi yenga leswaku hi etlela hi tlhelo ra moya kumbe hi nga ha ngheniwa hi moya wo rhandza rifuwo. (Luka 12:16-21) Hikwalaho, hi ta va hi tlharihile loko hi amukela ndzayo ya le Bibeleni kutani hi papalata moya wa vutianakanyi lowu tolovelekeke emisaveni leyi ya Sathana.—1 Yoh. 2:16.
15 Vakulu lava vekiweke va hundzisela emavandlheni swakudya swa moya leswi phameriweke hi hlonga ro tshembeka ni ro tlhariha. Bibele ya hi tsundzuxa yi ku: “Yingisani lava rhangelaka exikarhi ka n’wina naswona mi titsongahata, hikuva va tshama va rindze mimoya-xiviri ya n’wina hikuva hi vona va nga ta hlamusela; leswaku va endla leswi hi ntsako ku nga ri hi ku vilela, hikuva leswi swi nga mi vavisa.” (Hev. 13:17) Xana leswi swi vula leswaku vakulu a va endli swihoxo? Nikatsongo! Xikwembu hi xona xi vonaka ndlela leyi va nga hetisekangiki ha yona ku tlula munhu wihi ni wihi. Nilokoswiritano, xi langutele leswaku hi titsongahata eka vona. Ku tirhisana ni vakulu hambiloko va nga hetisekanga swi nyikela vumbhoni bya leswaku ha byi amukela vulawuri bya Yehovha.
Nkoka Wa Ku Titsongahata
16. Hi nga n’wi komba njhani xichavo Yesu tanihi Nhloko ya vandlha ra Vukreste?
16 Hi fanele hi tshama hi ri karhi hi tsundzuka leswaku Yesu i Nhloko ya xiviri ya vandlha. (Kol. 1:18) Lexi i xin’wana xa swivangelo leswi endlaka hi titsongahata eka nkongomiso wa vakulu lava vekiweke, hi va komba “xichavo lexi tlulaka ngopfu lexi tolovelekeke.” (1 Tes. 5:12, 13) Vakulu na vona va fanele va kombisa leswaku va titsongahata hi ku dyondzisa vandlha rungula ra Xikwembu ku nga ri leswi humaka emianakanyweni ya vona. A va “hundzeli halahaya ka swilo leswi tsariweke” leswaku va nga dyondzisi mianakanyo ya vona.—1 Kor. 4:6.
17. Ha yini moya wa ku tilavela ndhuma wu ri ni khombo?
17 Hinkwerhu evandlheni hi fanele hi tivonela leswaku hi nga tilaveli ndhuma. (Swiv. 25:27) Entiyisweni, lexi a ku ri xirimbana eka un’wana wa vadyondzisiwa loyi muapostola Yohane a hlanganeke na yena. U tsale a ku: “Diyotrefo, loyi a lavaka ku tiveka emahlweni ka vona, xin’wana ni xin’wana lexi humaka eka hina a nga xi amukeli hi xichavo. Hi yona mhaka leyi loko ndzi ta, ndzi nga ta endla leswaku ku tsundzukiwa mintirho ya yena leyi a tamaka a yi endla, a jakatseka hi hina hi marito yo homboloka.” (3 Yoh. 9, 10) Na hina hi nga dyondza swo karhi emhakeni leyi namuntlha. Hi ni xivangelo lexi twalaka xa ku tsuvula mianakanyo hinkwayo ya ku navela ku va ni ndhuma leyi hi nga ha vaka hi ri na yona. Bibele ya hi byela: “Ku tinyungubyisa ku le kusuhi ni ku wa, ni moya lowu titlakusaka wu le kusuhi ni ku khunguvanyeka.” Lava amukelaka vulawuri bya Xikwembu va fanele va lwisana ni ntlhamu wa ku tikukumuxa, loko va nga endli tano swi ta va vangela tingana.—Swiv. 11:2; 16:18.
18. I yini lexi nga ta hi pfuna leswaku hi amukela vulawuri bya Yehovha?
18 Tikarhatele ku lwisana ni moya wa misava wa ku lava ku tilawula kutani u amukela vulawuri bya Yehovha. Tshama u ri karhi u anakanyisisa hi lunghelo lerikulu leri u nga na rona ra ku tirhela Yehovha. Leswi u nga le xikarhi ka vanhu va Xikwembu i vumbhoni bya leswaku xi ku kokile hi moya wa xona lowo kwetsima. (Yoh. 6:44) U nga tshuki u byi tekela ehansi vuxaka bya wena ni Xikwembu. Tikarhatele ku endla hinkwaswo leswi u nga swi kotaka ku kombisa leswaku wa wu ala moya wo tilawula kambe u amukela vulawuri bya Yehovha.
Wa Tsundzuka Xana?
• Ku amukela vulawuri bya Yehovha swi katsa yini?
• Ku letela matimba ya hina ya ku twisisa swi fambisana njhani ni ku amukela vulawuri bya Yehovha?
• Hi swihi swilo leswi Sathana a swi endlaka leswaku a delela vulawuri bya Xikwembu?
• Ha yini ku titsongahata swi ri swa nkoka loko hi amukela vulawuri bya Yehovha?
[Swivutiso Swa Dyondzo]
[Xifaniso lexi nga eka tluka 18]
“Hi fanele ku yingisa Xikwembu tanihi mufumi ku tlula vanhu”
[Xifaniso lexi nga eka tluka 20]
I vutlhari ku landzela milawu ya Xikwembu minkarhi hinkwayo