Wa Tsundzuka Xana?

Xana u swi tsakerile ku hlaya minkandziyiso ya sweswinyana ya Xihondzo xo Rindza? A hi vone loko u nga hlamula swivutiso leswi landzelaka:

• Xana vangoma va swilo swa le mpfhukeni va n’wi endzele rini Yesu?

Buku leyi vulavulaka hi Bibele yi ri: “Vangoma va swilo swa le mpfhukeni a va endzelanga Yesu loyi a ri exitsengeleni hi vusiku lebyi a velekiweke ha byona hilaha varisi va endleke hakona. Va te endzhaku ka tin’hweti to hlayanyana.” Hi nkarhi wolowo Yesu a a ri “n’wana lontsongo” naswona a a tshama endlwini. (Mat. 2:7-11) Loko Yesu a a lo nyikiwa nsuku ni tinyiko ta nkoka hi vusiku lebyi a velekiweke ha byona, xana Mariya a a ta va a nyikele hi swinyenyana swimbirhi etempeleni endzhaku ka masiku ya 40?—1/1, tluka 31.

• Xana vo tala va nga endla yini leswaku va hanyela xo xi tiva?

Un’wana a nga ha vutisa, ‘Xana ndzi nga cinca swiyimo swa mina kutani ndzi olovisa vutomi bya mina?’ Amy u endle tano. A a fume ni swikunwana kambe a a nga tsakanga. U xiye leswaku ku hlongorisa ntirho emisaveni swi lave ku n’wi hambukisa ripfumelweni. Hikwalaho, u endle xiboho xo rhangisa Mfumo naswona u kote ku va phayona malembe yo hlayanyana. Amy u ri: “Sweswi ndzi titwa ndzi enerisekile ku tlula” loko ndzi nga si tivekela tipakani ta moya.—1/15, tluka 19.

• I yini lexi nga ha pfunaka vamanana van’wana leswaku va eneriseka?

Vamanana vo tala va pfuka va ya emintirhweni. Van’wana va endla tano leswaku va wundla mindyangu ya vona, kasi van’wana va lava ku ka va nga kombeli xa munhu kumbe leswaku va kota ku tixavela swilo swo durha. Kasi van’wana va tirha hileswi va rhandzaka ntirho wa vona. Hi ku ya hi Vukreste, vamanana va hoxa xandla swinene endyangwini—ngopfu-ngopfu loko n’wana a ha ri ntsongo. Van’wana va hlawule ku hunguta nkarhi lowu va wu hetaka entirhweni kumbe va tshika ntirho wo tihanyisa leswaku va ta tshama ni ndyangu wa vona, leswi endleke va eneriseka swinene.—2/1, matluka 28-31.

• Yesu a a vulavula hi “xitukulwana” xihi eka Matewu 24:34?

Hakanyingi Yesu a a tirhisa rito “xitukulwana” hi ndlela leyi nga riki yinene loko a vulavula ni vanhu vo homboloka kumbe loko a vulavula hi vona. Kambe a nga ri tirhisanga hi ndlela yoleyo loko a vulavula ni vadyondzisiwa va yena, lava a va ta totiwa hi moya lowo kwetsima ku nga ri khale. Hi vona a va ta kota ku yi twisisa kahle mhaka leyi boxiweke eka Matewu 24:32, 33. Kutani swi tikomba onge Yesu a a vulavula hi valandzeri vakwe lava totiweke, va le ka lembe-xidzana ro sungula ni va manguva lawa.—2/15, matluka 23-4.

• Xana Nawu a wu ri mukongomisi hi ndlela yihi, hilaha swi boxiweke hakona eka Vagalatiya 3:24?

Hakanyingi mukongomisi wa khale a ku ri hlonga leri tshembiwaka leri a ri tiyiseka leswaku n’wana u sirhelelekile ri tlhela ri tiyiseka leswaku ri endla leswi rhandziwaka hi tata wa n’wana. Hilaha ku fanaka Nawu wu sirhelele Vayuda eka minkucetelo leyi onhaka yo tanihi ku tekana ni vahedeni. Kambe ku fana ni mukongomisi wa n’wana, Nawu a wu ri wa xinkarhana, a wu ta tirha kukondza Kreste a fika.—3/1, matluka 18-21.

• Hi ku pfumelelana na Yakobo 3:17, hi tihi timfanelo leti hi faneleke hi ti kombisa?

Leswi hi tengeke, hi fanele hi bakanya swilo swo biha hi ku hatlisa. (Gen. 39:7-9) Nakambe hi fanele hi va lava rhuleke, hi papalata tihanyi kumbe swiendlo leswi nga ta vanga hasahasa. Kutani un’wana ni un’wana wa hina u fanele a tivutisa a ku: ‘Xana ndzi tiviwa tanihi loyi a kondletelaka ku rhula kumbe loyi a vangaka hasahasa? Xana ndzi tshamela ku holova ni van’wana? Xana ndzi hatla ndzi khunguvanyeka kumbe ndzi tala ku khunguvanyisa van’wana? Kumbe, xana ndzi lunghekele ku rivalela kutani ndzi nga hatliseli ku sindzisa leswaku ku landzeriwa milawu ya mina?’—3/15, matluka 24-5.

• Ha yini Yesu a horise wanuna loyi a ri bofu hakatsongo-tsongo? (Marka 8:22-26)

Bibele a yi hlamuseli hi ku kongoma. Hambiswiritano, swi nga ha endleka leswaku eka xiendlakalo lexi, loko Yesu a horisa wanuna loyi a ri bofu hakatsongo-tsongo, a a endlela leswaku a kota ku tolovela ku vona. Leswi swi nga ha va swi kombise leswaku Yesu a a n’wi khathalela swinene wanuna loyi a a ri bofu.—4/1, tluka 30.