Daniel Ni Beji Yakwe Ya Ntsombano

YESU u tshinye varhangeri va vukhongeri lava nga ni vutianakanyi lava kombiseke ku hlundzuka loko va vona vana lavatsongo va dzunisa Xikwembu erivaleni. Hilaha ku faneleke, Yesu u va vutisile: “Xana a mi si tshama mi hlaya leswi, ‘U lunghiselele swidzuniso swi huma emilon’wini ya swihlangi ni ya lava an’waka’?”—Matewu 21:15, 16.

Daniel la nga ni malembe ya tsevu, la hlanganyelaka evandlheni ra Xirhaxiya eJarimani, u nyikele xikombiso lexi tiyisekisaka leswaku ni namuntlha ku ni vantshwa lava gandzelaka Yehovha. Yena ni mana wakwe kun’we ni sesi wakwe, va ve kona entsombanweni wa Timbhoni ta Yehovha eDuisburg. A ku ri ro sungula va va entsombanweni lowukulu swonghasi. Swilo hinkwaswo a swi nga tolovelekanga: tihotela, vanhu vo tala lava tshamisekeke masiku manharhu, nkhuvulo, hi nga ha vuli drama. Xana Daniel a a tikhome njhani? Ku tikhoma ka yena a ku ri xikombiso lexinene.

Hi Musumbhunuku endzhaku ka ntsombano, Daniel u pfuke ekaya nimpundzu a ya exikolweni xa tindzumulo. Kambe a ka ha ri na yini ebajini ra yena? A ku ri na beji leyi kombisaka leswaku i mupfhumba la teke entsombanweni! Mana wakwe u n’wi hlamuserile a ku: “Ntsombano wu herile. Namuntlha u nga susa beji.” Kambe Daniel u te: “Ndzi lava leswaku vanhu hinkwavo va vona leswaku a ndzi ri kwihi ni ku tiva leswi ndzi swi dyondzeke.” Kutani siku hinkwaro exikolweni xa tindzumulo a a vehele beji yakwe, a nga khomiwi hi tingana. Loko mudyondzisi wakwe a n’wi vutisa hi yona, u n’wi hlamusele nongonoko wa ntsombano.

Hi ku endla tano, Daniel a a landzela xikombiso xa vana vo tala va malembe-xidzana lama hundzeke lava dzuniseke Yehovha erivaleni.