Ku Tluta eLwandle Lerikulu

EKA Swihlala swa Marshall ku ni swihlala swo tlula 1 200 ni swihlala leswitsongo, naswona swo tala a swi hlomukanga ngopfu ematini. Loko u ri ekulenyana a wu nge swi koti ku swi vona. Kambe, vatluti va khale va le Swihlaleni swa Marshall a va tirhisa swikwekwetsu va ya eswihlaleni leswitsongo hi ku hambana ka swona, va hlanganisa mpfhuka lowu endlaka 650 000 wa swikwere khilomitara eLwandle ra Pacific. Va swi endlise ku yini sweswo? A va kongomisiwa hi “mimepe” yo olova leyi pfunaka swinene, leyi vuriwaka ti-stick chart kumbe tichati ta swimhandzana.

Hi ntokoto lowu va nga na wona, vatluti va le Swihlaleni swa Marshall va dyondze leswaku loko ku ri ni xihlala xin’wana empfhukeni lowu fikaka ni le ka 30 wa tikhilomitara, u ta vona hi muxaka wo karhi wa magandlati. A ku ri ni mixaka yo tala ya magandlati leyi a va fanele va yi dyondza, kutani tichati ta swimhandzana a ti tirha tanihi switsundzuxo. Tichati ta swimhandzana a ku ri yini? Tanihi leswi u swi vonaka eka xifaniso lexi, swimhandzana leswi swi endliweke hi timitsu ta muxaka wun’wana wa ncindzu kumbe hi tinhi ta matluka ya khokhonati a swi lukiwa swi fana ni magandlati ya mixaka-xaka. Tinkatla letitsongo ta le lwandle a ti tirhisiwa ku fungha laha ku nga ni swihlala swin’wana.

Eka malembe yo tala, ku tluta hi ku tirhisa tichati ta swimhandzana a swi ri xihundla, a swi hlavuteriwa eka vanhu vo karhi ntsena lava hlawulekeke. Xana mutluti la nga muntshwa a a dyondza njhani ku tirhisa chati ya swimhandzana? Hi ku leteriwa ni ku titoloveta yona. Mutluti la nga ni ntokoto a a dyondzisa mutluti la nga muntshwa exihundleni, kumbexana hi ku famba na yena eswihlaleni leswi nga kusuhi. Loko loyi a dyondzisiwaka a kota ku xiya mixaka yo hambana-hambana ya magandlati, a a tiyiseka hi chati yakwe ya swimhandzana. Eku heteleleni, a a kota ku tluta a ri yexe elwandle.

Hilaha ku fanaka, Rito ra Xikwembu, Bibele, ri nga tirha tanihi nkongomiso eka riendzo ra hina ra vutomi. Eku sunguleni, un’wana a nga hi pfuna leswaku hi twisisa tidyondzo ta xisekelo ta Matsalwa. Kutani, loko hi ya emahlweni hi dyondza Rito ra Xikwembu naswona hi hanya hi ku pfumelelana ni misinya ya rona ya milawu, hi ta tiyiseka hi leswi ri swi vulaka. Yoxuwa, murhangeri wa Vaisrayele, a a byeriwe leswaku u fanele a hambeta a hlaya Rito ra Xikwembu leswaku a ta “endla hi ku landza hinkwaswo leswi tsariweke eka [rona].” Xikwembu xi byele Yoxuwa xi ku: “Hi kona u nga ta endla ndlela ya wena yi humelela kutani u endla hi vutlhari.” (Yoxuwa 1:8) Ina, Bibele yi nga hi kongomisa hilaha ku humelelaka evuton’wini.

[Laha Xifaniso Xi Humaka Kona eka tluka 32]

© Greg Vaughn