Ku Xixima Van’wana—Mhaka Leyi Talaka Ku Honisiwa

“Hinkwaswo leswi a swi endliwa ekampeni a swi fana ni gondzo leri rhelelaka epuweni ra ku khomisa munhu tingana ni ku n’wi susa xindzhuti.”—MAGDALENA KUSSEROW REUTER, LOYI A PONEKE EKAMPENI YA VAKHOTSIWA YA MANAZI.

SWIENDLO swa tihanyi swa le tikampeni ta vakhotsiwa ta Manazi hi nkarhi wa Nyimpi ya Vumbirhi ya Misava a swi nga ri masungulo kumbe makumu ya ku susa munhu xindzhuti. Loko hi languta endzhaku kumbe enkarhini wa hina, mhaka ya xiheri hileswaku: “Gondzo leri rhelelaka epuweni ra ku khomisa munhu tingana ni ku n’wi susa xindzhuti” ri lehile naswona ri pfhumbile.

Hambiswiritano, ku susa munhu xindzhuti a swi vangiwanga hi swiendlo swa tihanyi ntsena leswi veke kona ku sukela khale. Hakanyingi swi endliwa hi tindlela leti tumbeleke swinene. Anakanya hi n’wana loyi a hlekuriwaka hikwalaho ka ndlela leyi a vumbekeke ha yona. Kumbe muluveri loyi a hlekuriwaka hikwalaho ka mikhuva yakwe “yimbe.” Kumbe munhu loyi a khirhiwaka hikwalaho ka muvala wa nhlonge kumbe tiko. Lava endlaka sweswo va nga teka mhaka leyi yi ri matlangwana, kambe lava va endliwaka sweswo va sala va twa ku vava swinene naswona eka vona a hi mhaka leyi hlekisaka.—Swivuriso 26:18, 19.

Xindzhuti Xa Munhu I Yini?

Xihlamusela-marito xin’wana xi hlamusela xindzhuti tanihi ‘mfanelo kumbe xiyimo xa ku titwa u ri munhu la fundzhiwaka kumbe la xiximiwaka.’ Hikwalaho, xindzhuti xi katsa ndlela leyi hi tilangutaka ha yona ni ndlela  leyi van’wana va hi khomaka ha yona. Hambileswi ku nga ni swilo swo hambana-hambana leswi khumbaka ndlela leyi hi titwaka ha yona, leswi van’wana va hi langutisaka swona kumbe leswi va hi khomisaka swona swi yi khumba swinene ndlela leyi hi titwaka ha yona evuton’wini.

Kun’wana ni kun’wana ku ni swisiwana ni vanhu lava nga sirhelelekangiki. Hambiswiritano, swiyimo sweswo hi swoxe a swi tekeli munhu xindzhuti xakwe. Mavonelo ni swiendlo swa van’wana hi swona leswi nga endlaka leswaku munhu a titwa a nga ri nchumu. Mhaka yo vavisa hileswaku vanhu lava nga eswiyin’weni leswi nga tsakisiki hakanyingi va voneriwa ebodlheleni kumbe va khovoleriwa. Hi tala ku twa marito lama nge “xikamba,” “mpheheleni” kumbe “sirha ra le handle” etimhakeni leti khumbaka ku xanisiwa ka vadyuhari, swisiwana, lava vabyaka emianakanyweni kumbe swilema!

Ha yini vanhu va tekelana ehansi? Xana swi ta fika laha vanhu hinkwavo va nga ta kombiwa xichavo? Xihloko lexi landzelaka xi ta nyikela nhlamulo leyi enerisaka yo huma eRitweni ra Xikwembu, ku nga Bibele.