Xana Tidyondzo Ta Kreste Ti Tirhisiwa Kwihi Namuntlha?

YESU KRESTE u tekiwa tanihi un’wana wa tinghwazi leti tshameke ti hanya. Van’wana va n’wi teka a ri nghwazi. Ku ringana malembe ya kwalomu ka 2 000, tidyondzo ta yena ti byi khumbe swinene vutomi bya vanhu—“swiendlo swa vona leswitsongo ni leswikulu swa tintswalo,” ku tsala Melvyn Bragg mutsari un’wana wa Munghezi.

Xana Vanhu Va Ni Langutelo Rihi Hi Vukreste?

Xana vanhu va ni langutelo rihi hi Vukreste? Byi hlamuseriwa tanihi “lebyi tiseke nhluvuko lowukulu eka vanhu hi tlhelo ra moya.” Nhlamuselo yin’wana yi vuriwe hi David Kelso wa le Yunivhesiti ya Caledonia le Glasgow, eScotland. U tsarile: “Matimu ya Vukreste ya malembe ya 2 000 ma tele hi nhluvuko lowu nga pimanisiwiki na nchumu eka ntivo-vuxongi, ntivo-vuaki, filosofi, vuyimbeleri ni ntshamisano.”

Hambiswiritano, vo tala va ni langutelo leri hambaneke. A va lwisani ni Vukreste—vukhongeri lebyi sekeriweke eka tidyondzo ta Yesu Kreste ni dyondzo ya leswaku a a ri n’wana wa Xikwembu. Kambe, va nyangatsiwa hi swiendlo swa mavandla ni tinhlengeletano ta vukhongeri leti vulaka leswaku ti yimela Vukreste.

Hi xikombiso, Friedrich Nietzsche mutivi wa filosofi wa Mujarimani wa lembe-xidzana ra vu-19 u hlamusela Vukreste tanihi “xivati lexi vanhu va faka na xona.” U tsale leswaku Vukreste hi byona “xihlovo-nkulu xa ndzhukano ni vukanganyisi, . . . naswona byi tirhisa nsele, ku nga tshembeki ni xitumbelelana leswaku byi fikelela swikongomelo swa byona.” I ntiyiso leswaku langutelo ra Nietzsche ri nga vonaka ri hundzeleta ngopfu,  kambe vakambisisi van’wana lava nga ni ntokoto na vona va gimete hi ndlela leyi fanaka. Hikwalaho ka yini? Hikuva ku sukela khale, mahanyelo ya lava tivulaka Vakreste a ma nga fambisani ni timfanelo ta Yesu Kreste, kambe a ma fambisana ni “ku hohloka ka mahanyelo, vugevenga lebyi chavisaka ni xisandzu.”

Xana Kreste Wa Ha Ri Na Vona Lava Tivulaka Vakreste?

Hikokwalaho, i swinene ku vutisa, “Xana Kreste wa ha ri na vona lava tivulaka Vakreste?” Vo tala va nga hlamula va ku, “Ina wa ha ri na vona! Xana a nga va tshembisanga valandzeri vakwe leswaku a a ta va na vona ‘ku ko ku hela misava’?” (Matewu 28:20, Bibele Ya Xitsonga) Ina, Yesu u swi vurile sweswo. Kambe, xana a a vula leswaku a a ta va ni un’wana ni un’wana la tivulaka mulandzeri wakwe, ku nga khathariseki leswaku u tikhome njhani?

Tsundzuka, varhangeri van’wana va vukhongeri va le sikwini ra Yesu, a va anakanya leswaku Xikwembu xi na vona hi ku helela. Leswi Xikwembu a xi hlawule Israyele leswaku xi hetisisa xikongomelo xo karhi xa nkoka, varhangeri van’wana va vukhongeri a va anakanya leswaku Xikwembu a xi nge pfuki xi va fularherile hambi vo endla yini. (Mikiya 3:11) Hambiswiritano, eku heteleleni va yi bakanye hi ku helela milawu ya Xikwembu. Hikwalaho, Yesu Kreste u va byele hi ku kongoma a ku: “Maswivo! Yindlu ya n’wina yi tshikeriwa n’wina.” (Matewu 23:38) Xikwembu xi fularhele mafambiselo hinkwawo ya vukhongeri. Xi ma bakanyile naswona xi pfumelele mavuthu ya Rhoma ma lovisa ntsindza wa vukhongeri lebyi, ku nga Yerusalema kun’we ni tempele ya wona hi 70 C.E.

Xana leswi fanaka swi nga endleka eka Vukreste? A hi kambisiseni swilaveko leswi Yesu a swi katseke eka xitshembiso xakwe xa ku va ni valandzeri vakwe ku ko “ku hela misava.”

 [Swifaniso leswi nga eka tluka 2, 3]

Tidyondzo ta Yesu Kreste ti khumbe vanhu va timiliyoni emisaveni hinkwayo