“Mpfuno Wa Mina Wu Huma Eka Yehovha”

Ku Tinyiketela Ku Tisa Mikateko Ya Yehovha

WANUNA u tsemakanya makhwati lama tlhumeke ya le Cameroon hi xikanyakanya. U famba nkarhi wo leha a langutane ni khombo emapatwini lama nga ni mati ni ndzhope, leswaku a ya pfuna van’wana. Le Zimbabwe van’wana va famba mpfhuka wo ringana 15 wa tikhilomitara va tsemakanya milambu leyi khapaka, va rhwale tinguvu ta vona ni tintangu hi nhloko leswaku swi nga tsakami, va ya dyondzisa ntlawa lowu nga woxe. Kun’wana wansati un’wana u pfuka hi mata-ku-xa leswaku a endzela muongori loyi a kumaka awara yin’we ntsena yo dyondza nimixo.

Xana i yini lexi vanhu lava va endlaka matshalatshala yo tano va fanaka ha xona? I vatirheli va nkarhi hinkwawo lava nga Timbhoni ta Yehovha lava khomekeke hi ku dyondzisa ntiyiso wa Bibele. Va katsa maphayona ya nkarhi hinkwawo ni yo hlawuleka, varhumiwa, valanguteri lava famba-fambaka, ni magidi ya vatirhi vo tirhandzela lava kumekaka emakaya ya Bethele emisaveni hinkwayo. Hinkwavo ka vona va tiveriwa ku va ni moya wa ku tikarhata swinene. *

Xikongomelo Lexinene

Timbhoni ta Yehovha ti yingisa marito ya muapostola Pawulo loko a tsundzuxa Timotiya a ku: “Endla hinkwaswo leswi u nga swi kotaka leswaku u tivonakarisa u amukeleka eka Xikwembu, u ri mutirhi la nga riki na nchumu wo khomiwa hi tingana ha wona, u ri tamela khwatsi rito ra ntiyiso.” (2 Timotiya 2:15) Xana i yini lexi susumetaka magidi-gidi ya Timbhoni leswaku ti nghenela ntirho wa nkarhi hinkwawo?

Loko lava ngheneleke ntirho wa nkarhi hinkwawo va vutisiwa leswaku ha yini va tirhela Yehovha hi matimba, nhlamulo ya vona hileswaku va endla tano hikwalaho ka leswi va rhandzaka Xikwembu ni vanhu-kulobye. (Matewu 22:37-39) Leswi swi fanerile, hikuva ntirho wun’wana ni wun’wana lowu va wu endlaka kambe va nga susumetiwi hi rirhandzu, wu ta hundzuka nyuku wa mbyana.—1 Vakorinto 13:1-3.

Ntirho Wo Tinyiketela Hi Mbilu Hinkwayo

Vakreste hinkwavo lava tinyiketeleke va amukela xirhambo xa Yesu lexi nge: “Loko munhu a lava ku ndzi landzela, a a titshike kutani a rhwala mhandzi yakwe ya nxaniso a ndzi landzela nkarhi hinkwawo.” (Matewu 16:24) Ku titshika swi vula ku tinyiketela hi ku swi rhandza leswaku hi lawuriwa ni ku kongomisiwa hi Yehovha Xikwembu na Yesu Kreste. Leswi swi endle leswaku vo tala va tinyiketa eka ntirho lowu wa nkarhi hinkwawo.

Timbhoni to tala ti tikarhata swinene leswaku ti ndlandlamuxa ntirho lowu ti wu endlelaka Yehovha. Ehleketa hi Júlia wa malembe ya 56 hi vukhale loyi a nga phayona ra nkarhi hinkwawo eSão Paulo, le Brazil. U ri: “Makwerhu wa Muchayina u ndzi bele riqingho a lava ku tiva loko ndzi nga swi tsakela ku dyondza Xichayina. Tanihi leswi ndzi kuleke, a ndzi nga lorhi hi ku dyondza ririmi rin’wana. Kambe endzhaku ka masikunyana ndzi pfumerile. Namuntlha, ndzi kota ku chumayela hi Xichayina.”

Rhavi ra Timbhoni ta Yehovha ra le Peru ri vika mhaka leyi: “Emalembeni ya sweswinyana, madzana  ya maphayona ya nkarhi hinkwawo ma kombise moya wo tinyiketela ni ku va ni xivindzi hi ku rhurhela ensin’wini leyi nga aviwangiki. Ma rhurhela emadorobeni lama nga ekule, laha ku nga riki na swilo leswi faneleke swa manguva lawa ni mintirho yi kayivelaka. Vamakwerhu lava va tiyimiserile ku tshama eswiavelweni swa vona hambiloko ko ba lexi dumaka. Kambe xa nkoka swinene hileswi ntirho wa vona wo chumayela wu nga nkateko lowukulu etindhawini to tala. Valanguteri lava famba-fambaka va vula leswaku ku vumbiwe mintlawa leyintshwa hikwalaho ka mpfuno wa maphayona ya nkarhi hinkwawo lama tinyiketeleke.”

Vakreste van’wana va veke vutomi bya vona ekhombyeni leswaku va pfuna vapfumeri-kulobye. (Varhoma 16:3, 4) Mulanguteri wa xifundzha wa le tikweni rin’wana leri hlakatiweke hi nyimpi eAfrika u ri: “Loko hi nga si fika eka masocha yo hetelela lama sechaka, endzilakaneni wa ndhawu leyi nga vutliwa hi vaxandzuki ni leyi yi lawuriwaka hi mfumo, mina ni nkatanga hi tikume hi rhendzeriwe hi tindhuna ta mune ta ntlawa wa vaxandzuki ni vasirheleri va tona lava a va lava mapasi ya hina. Loko va ri karhi va kamba mapasi ya hina va lemuke leswaku hi huma eka ndhawu leyi lawuriwaka hi mfumo, hiloko va sungula ku ka va nga hi tshembi. Va vule leswaku ndzi nhlori. Hiloko va lava ku ndzi lahlela emugodini. Ndzi va hlamusele leswaku hi hina vamani hiloko va hetelela va hi tshika hi famba.” Mavandlha a ma tsake ngopfu hileswi mpatswa lowu, lowu tinyiketeleke wu swi koteke ku va endzela!

Hambileswi vamakwerhu va hlangavetanaka ni swiyimo swo tika, lava nghenelaka ntirho wa nkarhi hinkwawo va ya va engeteleka emisaveni hinkwayo. (Esaya 6:8) Vatirhi lava va gingiritekaka va ri tlangela swinene lunghelo ra vona ro tirhela Yehovha. Namuntlha vanhu va timiliyoni va dzunisa Yehovha va ri ni moya lowu fanaka wa ku tinyiketela. Hikwalaho ka sweswo u va katekisa ngopfu. (Swivuriso 10:22) Leswi va tiyisekaka leswaku va ta hambeta va kuma mikateko ni nseketelo, va ni langutelo ro fana ni ra mupisalema loyi a yimbeleleke a ku: “Mpfuno wa mina wu huma eka Yehovha.”—Pisalema 121:2.

[Nhlamuselo ya le hansi]

[Marito lama tshahiweke exihlokweni lama nga eka tluka 9]

“Vanhu va wena va ta tinyikela hi ku tirhandzela esikwini ra vuthu ra wena ra nyimpi.”—PISALEMA 110:3

[Bokisi leri nga eka tluka 8]

YEHOVHA U KHATHALELA MALANDZA YAKWE LAMA TINYIKEKETELEKE

“Tserhamani, mi nga tsekatsekisiwi, nkarhi hinkwawo mi va ni swo tala swo swi endla entirhweni wa Hosi, mi ri karhi mi tiva leswaku ntirho wa n’wina a hi wa hava eHosini.”—1 Vakorinto 15:58.

“Xikwembu a xi pfumali ku lulama lerova xi nga rivala ntirho wa n’wina ni rirhandzu leri mi ri kombiseke hikwalaho ka vito ra xona.”—Vaheveru 6:10.