“Rin’wana Ra Masiku Lama Ndzi Tsakiseke Ngopfu eVuton’wini”

HI KU vula ka vandla ra Beyondblue leri seketeriwaka hi hulumendhe le Australia, “ntshikilelo wa mianakanyo i vuvabyi lebyi ku ririwaka ngopfu ha byona, naswona byi chongorisa vantshwa vo tala.” Minkambisiso yi paluxa leswaku kwalomu ka vantshwa va 100 000 va le Australia va cinisiwa gija hi ntshikilelo wa mianakanyo lembe ni lembe.

Vantshwa va Vakreste na vona va khumbeka. Hambiswiritano, ku va ni ripfumelo eka Yehovha swi pfune vo tala va vona leswaku va hlula mintlhaveko leyi va tshikilelaka kutani va humelela evuntshweni bya vona. Sweswo swi endla leswaku va va ni nsusumeto lowunene eka van’wana. Njhani?

Xiya ntokoto wa Claire loyi a nga ni 18 wa malembe. Yena ni mana wakwe va le vandlheni ra Timbhoni ta Yehovha ra le Melbourne. Loko tata wakwe a rhurha a siya ndyangu, Claire u ve ni ntshikilelo wa mianakanyo. Kambe ripfumelo ra yena eka Yehovha Tata wa yena wa le tilweni, ri tshame ri tiyile. Siku rin’wana, Lydia loyi a nga dokodela wa ndyangu wolowo u ye eka va Claire a ya kambela mana wa yena loyi a a vabya. Endzhaku u teke Claire a famba na yena emavhengeleni. Loko va ri endleleni, u vutise Claire loko a ri ni xigangu. Claire u vule leswaku tanihi leswi a nga Mbhoni ya Yehovha a nga tsutsuma-tsutsumi ni vafana. Sweswo swi hlamarise dokodela. Claire u ye emahlweni a hlamusela ndlela leyi Bibele yi n’wi pfuneke ha yona leswaku a endla swiboho swa vutlhari evuton’wini. Eku heteleleni, Claire u tshembise dokodela leswaku u ta n’wi yisela kopi ya buku leyi fambisanaka ni Bibele leyi n’wi pfuneke swinene. Buku ya kona a yi ku Swivutiso Leswi Vantshwa Va Swi Vutisaka—Tinhlamulo Leti Tirhaka.

Loko ku hundze masiku manharhu a kume buku leyi, Lydia u bele mana wa Claire riqingho a n’wi byela ndlela leyi a yi tsakeleke ha yona loko a yi hlaya. Hiloko a kombelela vatirhi-kulobye tikopi ta tsevu. Loko Claire a yisa tibuku ta kona, dokodela u hlamusele ndlela leyi ripfumelo ra Claire ri n’wi khumbeke ha yona. Claire u ringanyete dyondzo ya Bibele eka dokodela loyi, hiloko a pfumela.

Claire u hete tin’hweti to hlayanyana a dyondza na dokodela hi nkarhi wo wisa wa swakudya swa nhlikanhi. Hiloko Lydia a kombela Claire leswaku a ta nyikela nkulumo eka seminara leyi a yi ta vulavula hi ntshikilelo wa mianakanyo wa vantshwa. Hambileswi a a chuhile, Claire u pfumerile. Ku te vanhu vo tlula 60 eka seminara yoleyo. Mune wa vativi-nkulu va rihanyo ra mianakanyo a va ri swivulavuri swa kona, naswona a ku nga ri na muntshwa exikarhi ka vona. Hiloko ku fika nkarhi wa Claire wa ku vulavula. U kandziyise mhaka leyi swi nga swa nkoka ha yona leswaku vantshwa va va ni vuxaka ni Xikwembu. U vule leswaku Yehovha Xikwembu u va khathalela ngopfu vantshwa naswona u va pfuna hinkwavo lava kombelaka nseketelo ni nchavelelo eka yena. Nakambe u hlamusele hi ku tiyiseka leswaku ku nga ri khale Yehovha u ta herisa vuvabyi hinkwabyo bya miri kumbe bya mianakanyo. (Esaya 33:24) Xana byi ve byihi vuyelo bya vumbhoni byo tano lebyinene?

Claire u te: “Vo tala va te eka mina endzhaku ka seminara va vula leswaku va khumbeke ngopfu loko va twa muntshwa a vulavula hi Xikwembu. Ndzi fambise tikopi ta 23 ta buku leyi nge Vantshwa Va Vutisa. Vanhwanyana vanharhu lava a va ri kona va ndzi nyike tinomboro ta vona ta tinqingho. Un’wana wa vanhwanyana volavo sweswi u dyondza Bibele. Ri ve rin’wana ra masiku lama ndzi tsakiseke ngopfu evuton’wini.”