Minyikelo Leyi Tsakisaka Mbilu Ya Xikwembu

YINGISELA mhaka leyi hlomulaka mbilu. Nkosikazi Ataliya u vutle vuhosi bya le Yuda hi vukanganyisi ni hi ku halata ngati. Hi ku tibyela leswaku vadyandzhaka va dlayiwe va hela hinkwavo, u tiendle hosi. Yehoxeba lowa n’wana hosi, ku nga wansati loyi a a rhandza Yehovha ni Nawu wakwe, u kanye mbilu a tumbeta n’wana wa le vukosini la vuriwaka Yehowaxi. Yehoxeba ni nuna wakwe, ku nga Muprista Lonkulu Yoyada, va tumbete mudyandzhaka loyi malembe ya tsevu endlwini ya vona ya le tempeleni.—2 Tihosi 11:1-3.

Loko Yehowaxi a va ni malembe ya nkombo hi vukhale, Muprista Lonkulu Yoyada u endle makungu ya ku jitamisa nkosikazi exiluvelweni lexi yi xi kumeke hi vunjanganja. U humese mufana loyi laha a a n’wi tumbete kona kutani a n’wi veka evuhosini tanihi mudyandzhaka la faneleke wa mfumo. Hiloko Nkosikazi Ataliya lowo homboloka a huduleriwa ehandle ka timbala ta tempele hi varindzi va le vuhosini kutani va n’wi dlaya, leswi nga siya vanhu va humurile naswona va tsakile. Hi swiendlo swa vona, Yoyada na Yehoxeba va hoxe xandla swinene eku kondleteriweni ka vugandzeri bya ntiyiso etikweni ra Yuda. Kambe xa nkoka swinene, va hoxe xandla eku londzovotiweni ka ntlhandlamano wa tihosi ta yindlu ya Davhida, laha Mesiya a a ta huma kona eku heteleleni.—2 Tihosi 11:4-21.

Hosi leya ha ku vekiwaka na yona a yi ta teka goza leri a ri ta tsakisa Xikwembu. Yindlu ya Yehovha a yi lava ku pfuxetiwa swi nyawula. Torha ra Ataliya ra ku fuma tiko ra Yuda a ri yexe ri endle leswaku ku honisiwa tempele yi tlhela yi phangiwa. Kutani Yehowaxi u veke mbilu yakwe eku pfuxetiweni ka tempele. Handle ko hlwela-hlwela, u humese rito ra ku hlengeleta mali leyi lavekaka ya ku pfuxeta yindlu ya Yehovha. U te: “Mali hinkwayo ya magandzelo yo kwetsima leyi tisiwaka endlwini ya Yehovha, mali leyi un’wana ni un’wana a pimeriwaka yona, mali ya mimoya-xiviri hi ku ya hi nxavo wa munhu un’wana ni un’wana, mali hinkwayo leyi humaka embilwini ya un’wana ni un’wana leswaku a yi tisa endlwini ya Yehovha, vaprista a va titekele yona, un’wana ni un’wana eka loyi a tolovelaneke na yena; a va lunghise timfa ta yindlu, kun’wana ni kun’wana laha rifa ri kumekaka kona.”—2 Tihosi 12:4, 5.

Vanhu va nyikele swi huma embilwini. Kambe vaprista a va nga tinyiketelanga hi mbilu hinkwayo eku hetisiseni ka vutihlamuleri bya vona bya ku pfuxeta tempele. Kutani hosi yi nambe yi byarha vutihlamuleri lebyi, yi lerisa leswaku minyikelo hinkwayo yi hoxiwa ebokisini ro hlawuleka. Yi veke Yoyada leswaku a langutela ntirho lowu, naswona xiviko xi ri: “Yoyada lowa muprista a teka bokisi a boxa mbhovo exipfalweni xa rona, a ri veka etlhelo ka alitari, exineneni leswaku loko munhu a nghena endlwini ya Yehovha, vaprista, valanguteri va tinyangwa va chela mali hinkwayo leyi yi tisiwaka endlwini ya Yehovha. Hi ku hatlisa loko va vona leswaku a ku ri ni mali yo tala ngopfu ebokisini, matsalana wa hosi ni muprista lonkulu a va fika kutani va yi bohelela naswona va hlaya mali leyi a yi kumiwa endlwini ya Yehovha. Mali leyi a yi hlayiwile, a va yi  nyiketa emavokweni ya lava va endlaka ntirho lava a va hlawuriwile endlwini ya Yehovha. Na vona a va hakela lava va tirhaka hi ntsandza ni vaaki lava a va tirha endlwini ya Yehovha, ni lava va akaka hi maribye ni lava va vatlaka maribye, ni ku xava timhandzi ni maribye lama vatliweke leswaku va lunghisa timfa ta yindlu ya Yehovha ni hinkwaswo leswi a swi tirhisiwa endlwini leswaku yi lunghisiwa.”—2 Tihosi 12:9-12.

Vanhu va angule kahle ngopfu. Yindlu ya Yehovha ya vugandzeri yi pfuxetiwile leswaku vugandzeri byakwe byi ya emahlweni hi ndlela leyi xiximekaka. Xisweswo mali hinkwayo leyi nyikeriweke yi tirhisiwe hi ndlela ya kona. Hosi Yehowaxi u tiyisekise leswaku swi va tano!

Namuntlha, nhlengeletano ya Yehovha leyi vonakaka yi tshama yi pfule mahlo leswaku mali hinkwayo leyi nyikeriweke yi tirhisiwa ku yisa vugandzeri bya Yehovha emahlweni, kutani Vakreste va ntiyiso va angule ku fana ni Vaisrayele va khale—hi mbilu hinkwayo. Kumbexana u un’wana wa lava va nyikeleke leswaku ku yisiwa timhaka ta Mfumo emahlweni eka lembe ra ntirho leri hundzeke. A hi kambisiseni tindlela tin’wana leti minyikelo ya wena yi tirhisiweke ha tona.

MINKANDZIYISO

Emisaveni hinkwayo, ku kandziyisiwe minkandziyiso leyi landzelaka leswaku yi dyondziwa kumbe yi fambiseriwa vanhu:

• Tibuku: 47 490 247

• Swibukwana: 6 834 740

• Tibroxara: 167 854 462

• Tikhalendara: 5 405 955

• Timagazini: 1 179 266 348

• Swiphephana: 440 995 740

• Tivhidiyo: 3 168 611

Swilo leswi swi kandziyisiwa eAfrika, Amerika N’walungu, Amerika Xikarhi, Amerika Dzonga, Asia, Yuropa, ni le swihlaleni swin’wana swa le Pacific—xisweswo swi kandziyisiwa ematikweni ya 19 loko ma hlanganile.

“Hi mina Katelyn May. Ndzi ni malembe ya nhungu. Ndzi tsakela ku mi rhumela [R192] leswaku mi yi tirhisela ku hakelela michini yo kandziyisa. I makwenu wa n’wina lontsongo, Katelyn.”

“Hi hlanganile tanihi ndyangu hi vulavula hi michini leyintshwa. N’wana wa hina wa malembe ya 11 ni ndzisana ya yena ya malembe ya 9 va endle xiboho xa ku nyikela hi mali leyi va tivekeleke yona. Amukelani minyikelo yo huma eka vona ni le ka hina.”

 NTIRHO WO AKA

Laha hansi ku xaxametiwe mintirho yo aka leyi endleriweke ku pfuneta entirhweni wa Timbhoni ta Yehovha:

• Tiholo ta Mfumo ematikweni lama sweleke: 2 180

• Tiholo ta Tinhlengeletano: 15

• Marhavi: 10

• Vamakwerhu lava pfunetaka ku aka ematikweni man’wana: 2 342

“Eka mahelo-vhiki lawa hi khangule Holo ya hina ya Mfumo leyintshwa. Swa hi tsakisa swinene ku va ni ndhawu leyi faneleke yo dzunisa Tata wa hina, Yehovha Xikwembu eka yona. Hi nkhensa Yehovha kun’we na n’wina hileswi mi khathalelaka swilaveko swa hina hi ku aka Tiholo ta Mfumo leti engetelekeke. Kunene, Holo ya hina ya Mfumo i mpfuno lowukulu emugangeni wa ka hina.”—Chile.

“Vamakwerhu va wu tlangela swinene mpfuno wa nhlengeletano ya Yehovha. Ni sweswi ha ha vulavula hi nkarhi wo tsakisa lowu hi wu heteke ni vamakwerhu lava a va hi pfuna ku aka.”—Moldova.

“Mina ni nkatanga ha ha ku hlanganisa malembe ya 35 hi tekanile. A hi ringeta ku anakanya leswi hi nga xavelanaka swona, kambe hi endle xiboho xa ku nyikela swo karhi eka Yehovha ni le ka nhlengeletano yakwe, hikuva handle ka vona, kumbexana vukati bya hina ni ku fa ingi byi file. Hi tsakela leswaku mali leyi teke ni papila leri yi tirhisiwa ku pfuneta eku akeni ka Holo ya Mfumo eka rin’wana ra matiko lama sweleke.”

“Ku nga ri khale ndzi kume ndzhaka, naswona leswi ‘swilo leswi ndzi swi lavaka’ ni ‘leswi ndzi swi pfumalaka’ swi nga talangiki, ndzi tsakela leswaku mali leyi teke ni papila leri yi pfuneta eku akeni ka Tiholo ta Mfumo, tanihi leswi ti lavekaka ngopfu ematikweni yo tala.”

 MPHALALO WA TIMHANGU

Emasikwini lawa yo hetelela, timhangu hakanyingi ti hlasela ti nga rhanganga hi ku ndzawuta. Vunyingi bya Timbhoni ta Yehovha ti nyikela mali leyi engetelekeke leswaku ku pfuniwa vamakwavo lava nga etindhawini leti weriweke hi timhangu. Tsundzukani leswaku minyikelo ya mphalalo wa timhangu yi tirhisiwa tanihi xiphemu xa minyikelo ya ntirho wa misava hinkwayo. Laha hansi ku longoloxiwe tindhawu leti Timbhoni ta Yehovha ti pfuneke vanhu lava weriweke hi timhangu:

• Afrika

• Asia

• Tindhawu ta le Kharibiya

• Swihlala swa le Pacific

“Mina na nuna wa mina hi rhandza ku mi nkhensa swinene hi ku hi rhumela swilo swa mphalalo loko hi weriwe hi mhangu ya swidzedze. Hi kote ku fulela yindlu ya hina hi vuntshwa. Ha nkhensa swinene leswi mi hatliseke mi ta hi phalala.”

“Hi mina Connor naswona ndzi ni malembe ya 11. Loko ndzi vone leswi tsunami yi swi endleke, ndzi lave ku pfuna. Ndza tshemba leswaku minyikelo leyi yi ta pfuna vamakwerhu.”

 VAMAKWERHU LAVA NGA ENTIRHWENI WO HLAWULEKA WA NKARHI HINKWAWO

Vakreste vo talanyana va le ntirhweni wa nkarhi hinkwawo eku chumayeleni kumbe emakaya ya Bethele. Vamakwerhu van’wana lava nga evutirhelini bya nkarhi hinkwawo va wundliwa hi minyikelo ya ku tirhandzela. Van’wana va vona hi lava:

• Varhumiwa: 2 635

• Valanguteri lava famba-fambaka: 5 325

• Vatirhi va le Bethele: 20 092

“Leswi malembe ya mina ma nga si ndzi pfumelelaka leswaku ndzi ta tirha eBethele [mufana wa malembe ya ntlhanu], ndzi rhumela minyikelo leyi hi rirhandzu lerikulu. Loko se ndzi kurile, ndzi ta ta eBethele ndzi ta tirha hi matimba.”

Ku Yisa Dyondzo Ya Bibele eMahlweni

Yesu Kreste u lerise valandzeri vakwe leswaku va “endla vanhu va matiko hinkwawo va va vadyondzisiwa.” (Matewu 28:19) Hikwalaho, Timbhoni ta Yehovha ti khomekile entirhweni wo chumayela ni ku dyondzisa rungula ra Bibele ematikweni ya 235. Ti endla minkandziyiso leyi sekeriweke eBibeleni hi tindzimi ta 413 kutani ti yi fambisela vanhu.

Kunene, nchumu wa nkoka swinene lowu Mukreste a nga nyikelaka ha wona eku pfuneni ka vanhu lava engetelekeke leswaku va dyondza hi Xikwembu ni swikongomelo swa xona i nkarhi wa yena. Timbhoni ta Yehovha ti nyikele nkarhi wo tala ni matimba ya tona leswaku ti pfuna vaakelani va tona. Nakambe ti pfule xandla ti nyikela hi mali, kutani minyikelo ya tona hinkwayo yi pfunete hi ndlela yo karhi eku endleni ka leswaku vito ra Yehovha ni swikongomelo swakwe swi tiviwa emisaveni hinkwayo. Onge Yehovha a nga hambeta a katekisa matshalatshala wolawo yo pfuna van’wana leswaku va dyondza leswi engetelekeke malunghana na yena. (Swivuriso 19:17) Ku tiyimisela ku pfuna hi ndlela yoleyo swi tsakisa mbilu ya Yehovha!—Vaheveru 13:15, 16.

[Bokisi leri nga eka tluka 28-30]

Tindlela Leti Van’wana Va Hlawulaka Ku Nyikela Ha Tona

MINYIKELO YA NTIRHO WA MISAVA HINKWAYO

Vo tala va tivekela mali yo karhi leyi va nga ta hamba va yi nghenisa emabokisini ya minyikelo lama nga ni mfungho lowu nge “Minyikelo Ya Ntirho Wa Misava Hinkwayo—Matewu 24:14.”

N’hweti na n’hweti mavandlha ma rhumela minyikelo leyi erhavini ra Timbhoni ta Yehovha leri langutelaka matiko lawa ma nga eka wona. Nakambe minyikelo ya ku tirhandzela yi nga rhumeriwa hi ku kongoma eka Watch Tower Bible and Tract Society of Pennsylvania, Attention Accounting Office, Private Bag X2067, Krugersdorp, 1740, South Africa, kumbe ehofisini ya rhavi ya Timbhoni ta Yehovha leyi langutelaka tiko ra ka n’wina. Loko u nyikela hi cheke eka adirese leyi nga laha henhla, tsala leswaku mali ya kona yi ya eka “Watch Tower.” Swin’wetsin’wetsi kumbe swilo swin’wana swa nkoka na swona swi nga nyikeriwa. Minyikelo yo tano yi fanele ku fambisana ni papila ro koma leri hlamuselaka leswaku leyi i nyiko.

NYIKO LEYI KUNGUHATIWEKE

Ku engetela eka minyikelo leyi kongomeke, ku ni tindlela tin’wana ta ku nyikela leti vuyerisaka ntirho wa Mfumo wa misava hinkwayo. Tona ti katsa:

Ndzindza-khombo: Watch Tower yi nga tsarisiwa tanihi leyi nga ta sala yi tirhisa mali ya ndzindza-khombo wa vutomi kumbe ya ku tshika ntirho kumbe ya mudende loko n’wini wa yona a file.

Mali Leyi Lombisiweke Hi Ntswalo: Mali leyi lombisiweke hi ntswalo yi nga nyikeriwa eka Watch Tower, tanihi nyiko leyi heleleke.

Ndhawu: Ndhawu leyi xavisekaka yi nga ha nyikeriwa hi ku kongoma kumbe loko ku ri yindlu yinene, ku endliwa ntwanano wa leswaku yi ta tekiwa ntsena loko loyi a nyikeleke ha yona a rhurha kumbe a fa. Tivisa hofisi ya rhavi ya le tikweni ra ka n’wina u nga si nyikela hi ndhawu.

Swiboho: Nhundzu kumbe mali swi nga ha nyikeriwa eka Watch Tower hi ku tirhisa xileriso xa mufi lexi nga enawini.

Loko u lava rungula leri engetelekeke, u fanele u vutisa Accounting Office hi ku ba riqingho kumbe hi ku tsalela eka adirese leyi nga laha hansi kumbe u vutisa hofisi ya rhavi ya Timbhoni ta Yehovha leyi langutelaka ntirho wo chumayela etikweni ra ka n’wina.

Accounting Office:

Watch Tower Bible and Tract Society of Pennsylvania

Private Bag X2067

Krugersdorp, 1740

South Africa

Riqingho: (011) 761 1000

[Laha Xifaniso Xi Humaka Kona eka tluka 27]

Faithful video: Stalin: U.S. Army photo